ངོས་འདིར་རིས་སུ་མ་ཆད་པའི་འཕགས་བོད་ཀྱི་སྐྱེས་ཆེན་རྣམས་ཀྱིས་གནང་བའི་ཞལ་གདམས་རྣམས་ལས་ཉུང་ངུ་རེ་བཏུས་ཏེ་བཀོད་ཡོད།
| རྒྱལ་མཆོག་བདུན་པ་བསྐལ་བཟང་རྒྱ་མཚོའི་ཞལ་ནས། ད་ལྟ་རང་དབང་ཡོད་དུས་འདིར་གྲོང་ཁྲོད་དུ་མི་འགྲོ་བར་དགོན་པར་བསྡད་དེ། མང་ཐོས་ཡོན་ཏན་གྱི་སྐྱེས་བུ་དམ་པ་ལེགས་པར་བསྟེན། ལྟ་སྤྱོད་མཐུན་ཞིང་དགེ་ཆོས་ཀྱི་ཕྱོགས་ལ་ཡང་དག་པར་བསྐུལ་བའི་ཁྲིམས་ལྡན་གྱི་གྲོགས་བཟང་པོ་མིག་ཟུང་དུ་ལྕི་ཡོ་རེ་བ་དཔུང་གདེངས་བསྒྲིལ་ནས་བཞུགས་པ་དང་ལྷན་དུ་བྱང་ཆུབ་ལམ་རིམ་ཁོ་ན་ཤེས་བྱེད་ཀྱི་ཐབས་ལ་ཡིད་གཏོད་པའི་ལེགས་སྨོན་ཚང་བར་བྱས། སྔོན་ཡང་བསོད་ནམས་ཀྱི་མཐུ་ཆེ་མོད། ད་ལྟ་ཡང་ཆོས་བྱེད་པ་ལ་བར་ཆད་མི་འབྱུང་ཞིང་། བྱུང་ཡང་མི་ཚུགས་པར་བྱ་བའི་ཚོགས་བསགས་ཀྱིས་རྒྱབ་འཁྱོག་པ་ཞིག་ལག་ལེན་ལ་འདེབས་པར་མཛོད། |
| རྒྱལ་མཆོག་བདུན་པ་བསྐལ་བཟང་རྒྱ་མཚོའི་ཞལ་ནས། དཀོན་མཆོག་སྤྱི་བོར་བཟུང་ནས་རྒྱུན་དུ་མཆོད་པ། རྣམ་སྨིན་ལ་འཇིགས་ནས་ལས་འབྲས་ཀྱི་བླང་དོར་འབྱེད་པ། ཚུལ་ཁྲིམས་དག་པའི་སྟེང་ནས་བྱམས་སྙིང་རྗེ་བྱང་ཆུབ་ཀྱི་སེམས་སྦྱངས་ཏེ་རང་རྒྱུད་འདུལ་བའི་ཉམས་ལེན་ལ་བརྩོན་པ་ནི་རྭ་སྒྲེང་དུ་བཞུགས་པའི་ཇོ་བོ་བཀའ་གདམས་པ་རྣམས་ཀྱི་རྣམ་ཐར་ཡིན་ནོ། ། |
| རྒྱལ་མཆོག་བདུན་པ་བསྐལ་བཟང་རྒྱ་མཚོའི་ཞལ་ནས། མ་གུས་པ་ལྟུང་བ་འབྱུང་བའི་སྒོ་ཡིན་པས། སྟོན་པ་དང་དེས་བཅས་པའི་བསླབ་བྱ། དེ་ཉམས་སུ་ལེན་པའི་ཁྲིམས་གྲོགས་ཚངས་པར་སྤྱོད་པ་རྣམས་ལ་སྙིང་ནས་གུས་པར་བྱས་ཏེ། མངོན་ཤེས་ཡོད་ཟེར་བ་དང་། ལྷའི་ཞལ་མཐོང་ཟེར་བ་སོགས་རྩིས་མི་བྱེད་པར་ཚུལ་ཁྲིམས་དག་པ་ལ་ཡོན་ཏན་གྱི་མཆོག་ཏུ་འཛིན་པར་བྱའོ། ། |
| རྒྱལ་མཆོག་བདུན་པ་བསྐལ་བཟང་རྒྱ་མཚོའི་ཞལ་ནས། ཐོས་བསམ་སྒོམ་གསུམ་སོགས་དགེ་བའི་བྱ་བ་གང་ལས་ཀྱང་། བླ་མའི་ཡོན་ཏན་བསམ་པའི་སྒོ་ནས་དད་གུས་དྲག་པོ་བྱེད་པ་བོགས་ཆེ་སྟེ། ཏེ་ལོ་བས་ན་རོ་བ་ལ། བོགས་འདོན་ཀུན་ཀྱི་མཆོག་གྱུར་པ། །བླ་མ་ཡིན་ནོ་ནཱ་རོ་བ། །ཞེས་གསུངས་ཤིང་། རྨོག་ཅོག་པ་ཆེན་པའི་ཞལ་ནས། སྒོམ་སྲན་གྱི་གྲོལ་བ་ཐེ་ཚོམ་ཟ། །དད་གུས་ཀྱི་གྲོལ་བ་ཐེ་ཚོམ་མེད། །ཐུགས་རྗེ་ཆེན་པོ་རང་དཀར་ནའང་དཀར། རྗེ་མ་རང་དམར་ནའང་དམར། ཀྱཻ་རྡོར་རང་སྔོ་ནའང་སྔོ། ཁོ་བོ་ནི་བླ་མའི་སྣང་བ་དང་བྲལ་མ་མྱོང་། ཚེ་གཅིག་གིས་སངས་རྒྱས་བྱ་བ་དེ་ད་ཡོང་ཡོང་འདྲ་གསུངས། |
| ཨ་རོལ་ལུང་རྟོགས་བསྟན་པའི་རྒྱལ་མཚན་གྱི་ཞལ་ནས། པཎ་ཆེན་བློ་བཟང་ཆོས་རྒྱན་གྱིས་རྗེ་བླ་མའི་སྙན་བརྒྱུད་ཐུན་མོང་མིན་པ་སངས་རྒྱས་ལས་ཀྱང་དཀོན་པའི་བླ་མའི་རྣལ་འབྱོར་སེམས་དཔའ་སུམ་བརྩེགས་ཀྱི་གདམས་པ་འདི་ཉིད་ཉམས་པ་ལ་ལྷག་པར་བཟོད་གླགས་མེད་པའི་ཐུགས་ཀྱིས་གདམས་པ་དེ་རྣམས་ཀྱི་ཆོ་ག་ནག་འགྲོས་སུ་བཀོད་པ་བླ་མ་མཆོད་པ་བདེ་སྟོང་དབྱེར་མེད་མར་གྲགས་པ་འདི་ཉིད་མཛད་པས། དེང་དུས་སྐྱ་སེར་བྱིས་པ་ཀློག་ཤེས་པ་ཚུན་ཆད་ཀྱིས་ཀྱང་རྒྱ་བོད་ཀྱི་མཁས་གྲུབ་དམ་པ་རྣམས་ཀྱི་སྙན་ནས་སྙན་དུ་བརྒྱུད་པའི་མན་ངག་རིག་པའི་གནས་ལྔ་ལ་སྦྱངས་པའི་མཁས་པར་གྲགས་པ་རྣམས་ཀྱིའང་སྤྱོད་ཡུལ་དུ་མ་གྱུར་པ་རྣམས་ལ་ཅི་དགར་སྤྱོད་ཆོག་པ་འདི་བཞིན་བྱུང་བས་པཎ་ཆེན་བློ་བཟང་ཆོས་རྒྱན་དགེ་ལུགས་པའི་ཕྱོགས་འཛིན་ཀུན་ལ་བཀའ་དྲིན་ཆེ་ཟེར་བ་ཡང་དེ་ལ་ཟེར་གྱི། བརྒྱ་བཞི་དང་། ཁ་འབར་མ་སོགས་གྲོང་ཆོག་གི་ཟ་ཆོས་འཐུང་ཆོས་འགའ་ཞིག་ལྗགས་རྩོམ་མཛད་པ་ལ་བཀའ་དྲིན་ཆེ་བར་འཛིན་ཅིང་སྨྲ་བ་ནི་རང་གི་མཚང་འདྲུ་བ་མེད་པར་རྡོལ་བའི་གཏམ་ཡང་དག་པའོ། ། |
| བྱ་བྲལ་རྒྱལ་རོང་དགེ་བཤེས་ཚུལ་ཁྲིམས་ཉི་མའི་ཞལ་ནས། ཚེ་འདི་ལ་བློ་མ་ལོག་ན་ཆོས་ཅི་ཙམ་ཉམས་སུ་ལེན་པ་ལྟར་བྱས་ཀྱང་། ཕྱི་མའི་བདེ་འགྲོའི་རྒྱུར་འགྲོ་བ་ཡང་དཀའ་ཞིང་། སྡོམ་གསུམ་གང་གི་ཡང་བཅས་མཚམས་དག་པ་ཡོད་མི་ཐུབ་པའི་རྩ་བ་ཡང་འདི་ལ་ཐུག་པས། ལམ་གོང་མ་ཐམས་ཅད་ཀྱི་ཕྱི་སྒོ་བཀག་ཡོད་ཚུལ་ཤེས་པར་བྱས་ཏེ། སྐྱུ་ཟབ་པ་ལས་སྐྱུ་རྩ་ལ་གཟབ་དགོས་གསུངས་པའི་དཔེ་ལྟར། ལམ་གྱི་རྩ་བ་ལ་འབད་དགོས་སོ། །ཐུན་མོང་བའི་ལམ་འདི་དག་གི་ཕྱོགས་ཙམ་དུ་བློ་མ་སོང་བ་ལ་རིམ་གཉིས་ཀྱི་རྟོགས་པ་ཀློང་བརྡོལ་བ་སྐད་ཀྱི་གྲུབ་རྫུས་རྒྱལ་བསྟན་སྣུམ་ཟད་ཀྱི་མར་མེ་ལྟ་བུ་འདི་གཏན་མེད་དུ་གཏོང་བ་ལ་རིངས་བའི་བདུད་ཀྱི་ཕོ་ཉས་ས་ཁྱབ་པའི་དུས་འདིར་རང་གིས་རང་རྒྱུད་ཆོས་དང་བསྟུན་པའི་ཞུས་དག་ཤིན་ཏུ་གལ་ཆེའོ། ། |
| ཞང་སྟོན་བསྟན་པ་རྒྱ་མཚོའི་ཞལ་ནས། སྤྱིར་ཡང་གཞི་བདེན་པ་གཉིས་ཀྱི་གནས་ཚུལ་ཕྱིན་ཅི་མ་ལོག་པ་ཤེས་ནས། དེ་ལ་བརྟེན་ནས་ལམ་ཐབས་ཤེས་ཟུང་འབྲེལ་གྱིས་འབྲས་བུ་སྐུ་གཉིས་སྒྲུབ་པ་ནི། ཐེག་ཆེན་གྱི་ལམ་གྱི་སྡོམ་མཐར་ཐུག་ཡིན་ལ། དེ་ཉིད་ཆ་ཚང་ཞིང་རྒྱས་པར་སྟོན་པས་ན་ཤེར་མདོ་ནི་མདོ་སྡེ་ཀུན་གྱི་མཆོག་ཏུ་བསྔགས་སོ། །དེའི་སྙིང་བོའི་ཡང་སྙིང་གི་ཚུལ་དུ་གཞིའི་གནས་ཚུལ་ཕྲ་རགས་ལེགས་པར་ཤེས་ནས་ལམ་ཐབས་ཤེས་ཐུན་མོང་མིན་པ་སྒྱུ་འོད་ཟུང་དུ་འབྲེལ་བས། འབྲས་བུ་སྐུ་གསུམ་མྱུར་ཏུ་འགྲུབ་ཚུལ་འདི་ནི། དུས་གསུམ་རྒྱལ་བ་ཀུན་གྱི་ཐུགས་ཀྱི་བཅུད་དང་བསྟན་པའི་ཡང་སྙིང་ཡིན་ནོ། ཚུལ་འདི་ལ་དགོངས་ནས་རྒྱལ་སྲས་སྙིང་སྟོབས་ཆེན་པོས་བྱང་ཆུབ་སེམས་དཔའི་སྤྱོད་པ་རྒྱ་མཚོ་ལྟ་བུའི་ནང་ནས་འདི་ཉིད་དམིགས་ཀྱིས་བཀར་སྟེ་ཐུགས་བསྐྱེད་དང་དམ་བཅའ་མཛད་པས། རྒྱལ་བ་སྲས་བཅས་ཀྱིས་བསྔགས་བརྗོད་ཆེས་ཆེར་མཛད་པ་དང་། དེའི་འབྲས་བུ་དུས་སུ་སྨིན་པའི་འཇམ་མགོན་ཙོང་ཁ་བ་ཆེན་པོ་ནི། བྱིས་པའི་གཟུགས་བཟུང་ཙམ་ལས་མཛད་པ་སངས་རྒྱས་དང་མཉམ་པར་བསྟན་པའི་བདག་པོས་རྒྱུད་སྡེ་ཚད་མ་ལས་ལུང་བསྟན་པ་འདི་འདྲ་བ་གཞན་སུ་ལ་ཡང་མེད་ཀྱང་། རྗེ་དེའི་བསྟན་པ་ནི། རྒྱལ་བའི་བསྟན་པའི་ཡང་སྙིང་ཡིན་པར་ལུང་རིགས་རྣམ་དག་གིས་གྲུབ་པ་འདི་ཡིན་པས། བསྐལ་བ་མཐའ་ཡས་པར་མཚན་ཙམ་ཡང་ཐོས་དཀའ་བ་འདི་ལྟ་བུ་དང་མཇལ་བའི་དུས་འདིར། རྗེ་ཉིད་ཀྱི་མདོ་སྔགས་ཀྱི་ལེགས་བཤད་ཆ་ཚང་བ་ལ་བག་ཆགས་ཅི་ཐེབས་ཀྱིས་རང་སྐལ་མ་ཆད་པ་ཅིས་ཀྱང་འབད་པར་བྱའོ། །ཞེས་རང་ཉིད་ལ་གྲོས་བཏབ་པ་ལགས་སོ། ། |
