སྤྱི་ལོ་༢༠༢༤ལོའི་ཟླ་༡༢ཚེས་༡ཉིན་དཔལ་ལྡན་སྨད་རྒྱུད་གྲྭ་ཚང་དུ་གདན་ས་ཆེན་པོ་གསུམ་ནས་སྔགས་ཀྱི་སློབ་གཉེར་ལ་ཆེད་དུ་ཕེབས་པའི་ལྷ་ཚོགས་དགེ་བཤེས་རྣམས་ནས། གསང་ཆེན་རྒྱུད་སྡེ་བཞི་ལ་ཐོས་བསམ་ཉམས་བཞེས་ཀྱི་ཐུགས་བརྩོན་ལྷོད་མེད་མཛད་དེ། རྒྱུད་སྡེ་བཞི་ཡི་གཞུང་ཆེན་ཁག་ནས་ལོ་འཁོར་རྒྱུགས་སྤྲོད་ལས་བྲིས་རྒྱུགས་དབུ་ཚུགས། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༤།༡༢།༠༡།ལ།
༄༅། །ས་སྟེང་༸རྒྱལ་བསྟན་ཡོངས་རྫོགས་ཀྱི་མངའ་བདག་༸སྤྱི་ནོར་༸གོང་ས་༸སྐྱབས་མགོན་ཆེན་པོའི་སྐུ་ཕྱྭ་དང་བོད་བསྟན་སྲིད་བདེ་ཐབས་སོགས་ཀྱི་ཞབས་རིམ་དུ་དམིགས་ནས། རྡོ་རྗེ་སློབ་དཔོན་བླ་མ་དབུ་མཛད་རྗེ་བཙུན་ཐུབ་བསྟན་རབ་རྒྱས་མཆོག་དབུ་བཞུགས་ཀྱིས་དཔལ་ལྡན་སྨད་རྒྱུད་གྲྭ་ཚང་ཚོགས་ཡོངས་རྒྱས་འཛོམས་ཀྱིས་བོད་ཟླ་ ༩ ཚེས་ ༡༧ ནས་ཉིན་གསུམ་རིང་ཆེས་བྱིན་མཐུའི་ཚན་ཁ་འབར་བའི་དྲག་པོ་མངོན་སྤྱོད་ཀྱི་ལས་ལྕགས་མཁར་ཆེན་མོ་འཚོགས་ཏེ། དེ་རིང་བོད་ཚེས་ ༡༩ ཉིན་ཤོག་ལིང་སྲེག་སྦྱོར་དང་གཏོར་རྒྱག་བཅས་སྔོན་གྱི་ཕྱག་བཞེས་ཇི་བཞིན་སྦྱོར་དངོས་རྗེས་གསུམ་བསྟན་པའི་མིག་རྒྱན་དུ་ཆེ་བར་མཛད་ཅིང། རབ་རྒྱས་གླིང་གཞིས་མི་དད་ལྡན་མང་ཚོགས་དུ་མ་ཚོགས་མཇལ་དུ་བཅར་ཡོད། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༤།༡༡།༢༠།ལ།
༄༅། །
གསང་ཆེན་དཔལ་ལྡན་སྨད་རྒྱུད་པའི་བཞེས་རྒྱུན་ཕྱག་ལེན་ཆོས་ཕྱོགས་ཀྱི་རིམ་པ་སྣེ་མང་ལས་དབྱར་ཆོས་བྱེད་སྒོ་གནས་མཆོག་ཕྱི་མིག་ལུང་གི་ཆོས་ཐོག་སྐབས་ལས་སྣེ་འབྲེལ་ཡོད་རྣམ་པས་དམ་ཅན་སྐུ་མཁར་གྱི་མཆོད་འགྲན་དང་། བསྐང་འཕྲིན་བསྟོད་སྐུལ་མཛད་རྗེས་སྔར་སྲོལ་དབྱངས་ར་ཆེན་མོ་ཉིན་ལྔ་དབུ་འཛུགས་ཞུས། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༤།༡༠།༠༩།ལ།
༄༅། །གསང་ཆེན་དཔལ་ལྡན་སྨད་རྒྱུད་པའི་སྔར་སྲོལ་གནས་མཆོག་ཕྱི་མིག་ལུང་དུ་ཐུན་མོང་མ་ཡིན་པ་གར་ཐིག་དབྱངས་གསུམ་གྱི་ཕྱག་ལེན་ཡིན་པས། སྐྱབས་རྗེ་སྐུ་ཞབས་བླ་མ་མཆོག་དང་བླ་མ་དགེ་བསྐོས་རྣམ་གཉིས་ནས་འདི་ལོའི་བཀའ་རམས་དགེ་བཤེས་ལྷ་ཚོགས་རྣམས་དང་བསྐྱེད་རིམ་པ་རྣམ་པས་བདེ་གསང་འཇིགས་གསུམ་གྱི་དཀྱིལ་འཁོར་དང་ལས་བཞིའི་ཐིག་སོགས་ཀྱི་རྒྱུགས་འབུལ་ལེན་གནང་མཛད། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༤།༡༠།༠༧།ལ།
༄༅། །དཔལ་ལྡན་སྨད་རྒྱུད་གྲྭ་ཚང་ནས་གཙོ་བོར་༸གོང་ས་༸སྐྱབས་མགོན་ཆེན་པོའི་སྐུ་ཕྱྭའི་ཞབས་རིམ་དང་བསྟན་སྲིད་བདེ་ཐབས། ཡུལ་ལུང་ཀུན་ཏུ་བཀྲ་ཤིས་ཤིང་ཆར་ཆུ་དུས་བབ་ལོ་ཕྱུགས་རྟག་ལེགས་སོགས་ལེགས་ཚོགས་སྒོ་བརྒྱར་དམིགས་ཏེ། བསྟན་པའི་སྣང་འབྱེད་བླ་མ་དབུ་མཛད་མཆོག་དབུ་བཞུགས་ཀྱིས་འདུས་མང་འདུ་འཛོམས་རྒྱ་ཆེར་གནང་སྟེ། དཔལ་འཁོར་ལོ་བདེ་མཆོག་དང་འབྲེལ་བའི་རབ་གནས་དགེ་ལེགས་ཆར་འབེབས་ཉིན་གསུམ་པའི་ཕྱག་ལེན་ཡོངས་སུ་ལེགས་པར་གྲུབ། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༤།༠༧།༡༠།ལ།
