༄༅། །གསང་ཆེན་རྡོ་རྗེ་ཐེག་པའི་བཤད་སྒྲུབ་ཀྱི་བསྟི་གནས་དཔལ་ལྡན་སྨད་རྒྱུད་གྲྭ་ཚང་དུ་གདན་གསུམ་བཀའ་རབ་འབྱམས་དགེ་བའི་བཤེས་གཉེན་རྣམ་པ་དང་གྲྭ་ཚང་འདི་ཉིད་ཀྱི་དགེ་སློང་གསར་པ་རྣམས་གདུལ་བྱ་འདུས་པའི་དཀྱིལ་འཁོར་དུ་བྱས་ཏེ། རིན་པོ་ཆེ་ལ་སོགས་པའི་གང་ཟག་ཁྱད་པར་ལྔ་ཚོགས་དབུས་སུ་མཁན་ཆེན་རྡོ་རྗེ་འཆང་ཆེན་པོ་མཆོག་ནས་བཅོམ་ལྡན་མི་སྐྱོད་རྡོ་རྗེའི་དཀྱིལ་འཁོར་གྱི་གཙོ་བོར་བཞེངས་ནས་
རྩ་བཤད་འགྲེལ་པ་བཞི་སྦྲགས་ཀྱིས་སྣེ་འཛིན་བདེ་གསང་འཇིགས་གསུམ་གྱི་བསྐྱེད་རྫོགས་རྣམ་གྲངས་གསུམ་ལ་སོགས་པའི་ལོ་གཅིག་གི་འཆད་ཉན་གནང་སྒོ་མཐའ་ཡས་པ་དེ་དག་དེ་རིང་ལེགས་པར་གྲུབ་པའི་བླ་མ་རྒྱུན་མཆོད་དང་འབྲེལ། བུ་སློབ་རྡོ་རྗེ་འཛིན་པ་དག་གིས་མཁན་ཆེན་རྡོ་རྗེ་འཆང་ཆེན་པོའི་དྲུང་ནས་འགྲེལ་དབང་ཞུ་བ་དང་། འཆད་ཉན་ལེགས་པར་གྲུབ་པའི་དགའ་སྟོན་འགྲེལ་སྐྱིད་དང་ཚོགས་ཀྱི་འཁོར་ལོའི་མཆོད་པས་སློབ་དཔོན་མཉེས་པར་བྱས་པའི་རྒྱུད་དོན་ཇི་བཞིན་ཕྱག་ལེན་དུ་བསྟར་བའི་རིམ་པའོ། །རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༥།༡༠།༡༨ལ།
༄༅། །གསང་ཆེན་སྨད་རྒྱུད་གྲྭ་ཚང་གི་སློབ་གཉེར་བ་རྣམས་ཀྱིས་ཟླ་རེ་ལ་སྐྱོར་སྦྱོང་ཆེན་མོ་རེ་དང་དམ་བཅའ་ཆེན་མོ་རེ་ཚོགས་བཞིན་ཡོད་པ་ལྟར། ཟླ་འདིའི་ཕྱི་ཚེས་ ༡༧ དང་ ༡༨ གཉིས་ལ་སྐྱོར་སྦྱོང་ཆེན་མོ་དང་དམ་བཅའ་ཆེན་མོ་གཉིས་ཚོགས་བཞིན་པ། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་༢༠༢༥།༡༠།༡༧-༡༨ལ།
༄༅། །དེ་རིང་ཁྲི་ཟུར་རྗེ་བཙུན་དམ་པའི་འདས་ཞག་སྐུ་ཚིགས་གསུམ་པ་འཁེལ་བ་དང་དཔལ་ལྡན་སྨད་རྒྱུད་པའི་མཁན་བླ་འདུས་མང་ཡོངས་ནས་འདས་མཆོད་འབུལ་དུ་པཎ་གྲུབ་བཅུ་བདུན་གྱི་བསྟོད་ཆེན་དང་གསང་འདུས་རྩ་རྒྱུད་དག་ཐོན་ཐོག་མྱུར་བྱོན་གསོལ་འདེབས་ལྷ་མཆོག་ཐུབ་དབང་མ་ཡང་ཚོགས་སུ་འུར་འདོན་ཞུས་སོ། །རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༥།༡༠།༡༦ལ།
༄༅། །སློབ་གཉེར་ཁང་འདིའི་སློབ་མ་རྣམས་ཀྱིས་༧རྒྱལ་བའི་གོ་སྟོན་སྲུང་བརྩི་དང་ཤེས་ཡོན་གོང་འཕེལ་སླད་སློབ་མ་ཕན་ཚུན་བར་སྐྱབས་འགྲོ་དང་སེམས་བསྐྱེད་བདེན་བཞི་རྟེན་འབྲེལ་བཅས་ཀྱི་ཐོག་དོགས་དཔྱོད་དང་དྲི་བ་དྲི་ལན་བཅས་གནང་སོང་། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༥།༡༠།༡༥ ལ།
༄༅། །དེ་རིང་ཁྲི་ཟུར་རྗེ་བཙུན་དམ་པའི་འདས་ཞག་སྐུ་ཚིགས་གཉིས་པ་འཁེལ་བ་དང་དཔལ་ལྡན་སྨད་རྒྱུད་པའི་མཁན་བླ་འདུས་མང་ཡོངས་ནས་འདས་མཆོད་འབུལ་དུ་དཔལ་རྡོ་རྗེ་འཇིགས་བྱེད་བཅུ་གསུམ་གྱི་བདག་བསྐྱེད་དང་གསང་འདུས་རྩ་རྒྱུད་དག་ཐོན་ཐོག་མྱུར་བྱོན་གསོལ་འདེབས་ལྷ་མཆོག་ཐུབ་དབང་མ་ཡང་ཚོགས་སུ་འུར་འདོན་ཞུས་ཞིང་ཁྲི་ཟུར་བླ་བྲང་ནས་འདུས་ཚོགས་སུ་བསྙེན་བཀུར་གཟབ་རྒྱས་ཡང་གནང་སོང་། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༥།༡༠།༩།ལ།
༄༅། །དཔལ་ལྡན་སྨད་རྒྱུད་པའི་ལོ་འཁོར་ཆོས་ཀྱི་བྱ་བའི་ཕྱག་ལེན་སྣེ་མང་ཡོད་པ་ནས་དབྱར་ཕྱི་མ་ཞལ་གྱིས་བཞེས་པའི་ནང་གཙོ་བོ་གནས་མཆོག་ཕྱི་མིག་ལུང་དུ་ཐུན་མོང་མ་ཡིན་པའི་ཕྱག་ལེན་གར་ཐིག་དབྱང་གསུམ་ལས་སྐབས་འདིར་དབྱངས་ར་ཆེན་མོ་ཞེས་སྔར་སྲོལ་ཕྱག་བཞེས་རྒྱུན་སྐྱོང་བ། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༥།༡༠།༠༨ ལ།
༄༅། །བོད་བསྟན་སྲིད་སྤྱི་དང་ལྷག་པར་དུ་ས་སྟེང་༧རྒྱལ་བསྟན་ཡོངས་ཀྱི་མངའ་བདག་༧གོང་ས་༧སྐྱབས་མགོན་༧རྒྱལ་དབང་ཡིད་བཞིན་ནོར་བུའི་སྐུ་ཚེ་མཛད་འཕྲིན་རྒྱས་ཆེད་ལྷ་བླའི་ལུང་བཞིན་ཞབས་རིམ་གནས་བརྟན་ཕྱག་མཆོད་དང་། རྟེན་ཁྲུས་ཡུལ་ཁྲུས་འཕྲལ་མྱུར་གནད་སྨིན་དགོས་གལ་གཞུང་སའི་བཀའ་ཡིག་ལྟར་དེ་རིང་དཔལ་ལྡན་སྨད་རྒྱུད་གྲྭ་ཚང་གི་འདུས་མང་ཡོངས་སུ་རྫོགས་པའི་འདུས་པ་ཆེན་པོའི་ཐོག་བསྟན་དོན་ཞབས་རིམ་ཁག་གནད་སྨིན་ཞུས་པ་ལགས། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༥།༡༠།༠༤ རེས་གཟའ་སྤེན་པ་ཉིན།
༄༅། དེ་རིང་སྤྱི་ལོ་ ༢༠༢༥ ཕྱི་ཟླ་ ༡༠ པའི་ཚེས་ ༢ རེས་གཟའ་ཕུར་བུའི་ཉིན་ཞིང་ལ་ཐུགས་དགོངས་གཏད་པ་ཁྲི་ཟུར་རིན་པོ་ཆེ་རྗེ་བཙུན་བློ་བཟང་བསྟན་འཛིན་མཆོག་གི་སྐུ་ཚིགས་དང་པོ་འཁེལ་ཞིང་། གུས་སློབ་དཔལ་ལྡན་སྨད་རྒྱུད་གྲྭ་ཚང་འདུས་ཚོགས་གང་ཆེ་ནས་དཔལ་གསང་བ་འདུས་པའི་དཀྱིལ་ཆོག་དབང་བཞི་ཡོངས་སུ་རྫོགས་པའི་བདག་འཇུག་དང་འབྲེལ་སྐྱབས་མཆོག་ ༧ རྒྱལ་བའི་སྤྱན་སྔར་མཆོད་སྤྲིན་རྣམ་པར་སྤྲོས་ཤིང་། གཙོ་བོ་རྗེ་བཙུན་གང་ཉིད་ཀྱི་ཐུགས་དགོངས་ཟབ་མོ་ཡོངས་སུ་རྫོགས་ཏེ་སླར་ཡང་བདག་ཅག་གདུལ་བྱའི་དོན་དུ་ཡང་སྲིད་མཆོག་སྤྲུལ་ཟླ་ཞལ་གསར་པ་བསིལ་ལྡན་ཁ་བའི་སྤོ་ནས་མྱུར་དུ་འཆར་བའི་ཐུགས་སྨོན་གྱི་མཚམས་སྦྱུར་ཞུས་སོ། །རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་༢༠༢༥།༡༠།༠༢ལ།
༄༅། །དེ་རིང་ཁྲི་ཟུར་དམ་པའི་འདས་ཞག་གཉིས་པར་དཔལ་ལྡན་སྨད་རྒྱུད་པའི་འདུས་མང་ཡོངས་ནས་འདས་མཆོད་སྨོན་ལམ་དུ་རྟེན་འབྲེལ་བསྟོད་པ་དང་། ལམ་རིམ་བསྡུས་དོན། བདེ་གསང་འཇིགས་གསུམ་གྱི་སྨོན་ལམ་བཅས་གསུང་འདོན་ཞུས་ཞིང་མཁན་ཆེན་རྡོ་རྗེ་འཆང་ཆེན་པོ་མཆོག་ནས་འདུས་ཚོགས་སུ་གསོལ་ཇ་གཟབ་རྒྱས་ཀྱི་བསྙེན་བཀུར་ཡང་གནང་སོང་། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༥།༠༩།༢༧ ལ།
༄༅། །དཔལ་ལྡན་སྨད་རྒྱུད་པའི་མཐོང་བ་རྒྱུད་པའི་ཕྱག་ལེན་སྣེ་མང་ལས་གནས་མཆོག་ཕྱི་མིག་ལུང་གི་ཆོས་སྐོོར་རིམ་པའི་གཙོ་བོ་གར་ཐིག་དབྱངས་གསུམ་གྱི་ཕྱག་ལེན་ཕྱག་བཞེས་མི་ཉམས་རྒྱུན་འཛིན་གནང་མུས་བཞིན་དེ་རིང་གདན་གསུམ་དགེ་བཤེས་རྣམས་དང་གྲྭ་ཚང་རང་གི་རྒྱུན་བཞུགས་སློབ་གཉེར་བ་རྣམས་ནས་གསང་བདེ་འཇིགས་གསུམ་གྱི་དཀྱིལ་འཁོར་ཐིག་རིས་དང་ལས་བཞིའི་ཐབ་ཐིག་དང་བཅས་པའི་ཐིག་རྒྱུག་འབུལ་བཞེས་ཀྱི་ཕྱག་ལེན་ཕྱག་བསྟར་བའོ། །རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༥།༠༩།༢༧ ལ།
༄༅། །༧རྗེ་རྒྱལ་བ་གཉིས་པ་བློ་བཟང་གྲགས་པའི་རིང་ལུགས་ཞྭ་སེར་དགེ་ལྡན་བསྟན་པའི་རྒྱལ་མཚན་ཡོངས་ཀྱི་དགེ་བའི་བཤེས་གཉེན་ཆེན་པོ་རྗེ་བཙུན་བླ་མ་དགའ་ལྡན་ཁྲི་ཟུར་རིན་པོ་ཆེ་མཆོག་འདུལ་བྱ་རྟག་འཛིན་ཇི་སྙེད་པའི་བློ་སྣ་ཆོས་ལ་སྐུལ་ཕྱིར་གློ་བུར་དུ་དགོངས་པ་གཞན་དོན་དུ་གཤེགས་པའི་ཡིད་སྐྱོའི་གནས་ཚུལ་ལ་འཛམ་གླིང་ས་ཕྱོགས་གང་སར་བཞུགས་པའི་སློབ་འབངས་ཡོངས་ཀྱི་བློ་ཡིད་མུན་ལྷུང་གི་མྱ་ངན་དང་འབྲེལ་བླ་མ་རིན་པོ་ཆེའི་ཐུགས་དགོངས་ཡོངས་སུ་རྫོགས་ཕྱིར་ཡིད་སེམས་མྱ་ངན་གྱིས་གདུང་སྟེ་དཔལ་ལྡན་སྨད་རྒྱུད་གྲྭ་ཚང་གི་འདུས་མང་ཡོངས་ནས་སྨོན་ལམ་འདུ་ཚོགས་ཀྱི་མཆོད་འབུལ་བསྔོ་སྨོན་ཞུ་བཞིན་པ་དང། སླར་ཡང་བསྟན་པ་དང་འགྲོ་བའི་དོན་ལ་མཛད་པ་རླབས་ཆེན་བསྐྱོང་བའི་ཡང་སྲིད་ཟླ་གཞོན་གསར་པའི་མཚན་དཔེ་མྱུར་དུ་འཆར་བར་གསོོལ་བ་འདེབས་བཞིན་མཆིས། རྗེ་བཙུན་བླ་མ་རིན་པོ་ཆེ་མཆོག་སྤྱིར་ ༧ རྒྱལ་བསྟན་སྤྱི་དང། ལྷག་པར་རྗེ་ ༧ རྒྱལ་བ་གཉིས་པའི་བསྟན་པ་འཛིན་སྐྱོང་སྤེལ་གསུམ། ཡང་དགོས་གསང་ཆེན་དཔལ་ལྡན་སྨད་རྒྱུད་གྲྭ་ཚང་འདིར་སྔ་བར་ཕྱི་གསུམ་དུ་ཕྱི་ནང་བསྟན་དོན་གང་ཅིར་བླ་ན་མེད་པའིི་བཀའ་དྲིན་གྱིས་བསྐྱངས་གནང་བའི་མཛད་པ་བསམ་གྱིས་མི་ཁྱབ་ལ་བཀའ་དྲིན་གཞལ་དཀའ་ཞིང་བརྗེད་པར་དཀའ་བས་གུས་ཚོགས་ཡོངས་ཀྱིས་རྗེས་སུ་དྲན་ཞིང་ཚེ་རབས་སུ་ཡང་རྗེས་སུ་འཛིན་པར་ཞུ་གསོལ་དང་འབྲེལ་བའི་འདས་མཆོད་སྨོན་ལམ་ཡང་རིམ་པ་བཞིན་གོ་སྒྲིག་ཞུ། དཔལ་ལྡན་སྨད་རྒྱུད་གྲྭ་ཚང་མཁན་བླ་འདུས་མང་ནས། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༥།༠༩།༢༦ལ།
༄༅། །སྤྱི་ལོ་ ༢༠༢༥ ལོ་ངོ་ཧྲིལ་པོ་བྱམས་བརྩེའི་ལོ་ཞེས་ ༧ གོང་ས་ ༧ སྐྱབས་མགོན་ཆེན་པོ་མཆོག་དགུང་གྲངས་ ༩༠ ལ་ཕེབས་པའི་གོ་སྟོན་གྱི་སྲུང་བརྩི་ལོ་འཁོར་མོར་ཞུ་ཞིང་། འཛམ་གླིང་ཡུལ་གྲུ་ཀུན་ནས་རང་རང་གི་བརྩམས་ཆོས་རྣམ་གྲངས་དུ་མས་གོ་སྟོན་སྲུང་བརྩི་ཞུ་བཞིན་ཡོད། ད་རེས་དཔལ་ལྡན་སྨད་རྒྱུད་གྲྭ་ཚང་གི་མཁན་བླ་དགེ་སློབ་འདུས་མང་དང་བཅས་ནས་༧རྒྱལ་བའི་གོ་སྟོན་སྲུང་བརྩིའི་ལས་རིམ་ཐེངས་མ་གསུམ་པར་༧རྒྱལ་བའི་ཐུགས་བསྐྱེད་ཀྱི་དམ་བཅའ་ཆེན་པོ་བཞི་ཡི་ཟབ་བརླིང་གོ་དོན་གསལ་བྱེད་ཀྱི་བགྲོ་གླེང་ཆེན་པོ་ཞིག་གནང་བར་མང་ཐོས་དགེ་བའི་བཤེས་གཉེན་རྣམས་དང་བློ་གསར་རིག་པའི་རྩལ་ཅན་དུ་མས་གོ་སྐབས་དགའ་སྤྲོས་བཞེས་པའོ། །རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༥།༠༩།༢༤ ལ།
༄༅། །གསང་ཆེན་རྡོ་རྗེ་ཐེག་པའི་བཤད་སྒྲུབ་ཀྱི་བསྟི་གནས་ཆེན་པོ་འདིར་རིག་པ་འཛིན་པའི་དགེ་འདུན་འདུ་བ་དང་གནས་ཤིང་བསླབ་གསུམ་ཐུགས་ལ་གཞོལ་བའི་ཆ་རྐྱེན་དགོས་མཁོར་དམིགས། སྐབས་འདིའི་གྲྭ་ཚང་གི་སྤྱི་འགན་ལས་ཐོག་པ་རྣམས་ནས་འདུས་མང་གི་བཞུགས་གནས་ཀུན་དགའ་ར་བ་ཐོག་བརྩེགས་ཅན་ཞིག་གསར་དུ་བསྐྲུན་པའི་ལས་འཆར་འདི་ཡང་གྲྭ་ཚང་འདི་ཉིད་ལ་དད་འདུན་ཅན་ཕྱི་ནང་འབྲེལ་ཡོད་རྣམ་པའི་མཐུན་སྦྱོར་དང། སྤྱི་འགན་ཁང་ནས་ཀྱང་སྐུ་ངལ་འབད་ཐབས་གནང་བའི་འོག་ཨར་ལས་འཛུགས་བསྐྲུན་གྱི་ལས་འགོ་འཛུགས་ཐུབ་པ་དང། དང་པོའི་ས་བཅག་རྡོ་འདུལ་གྱི་ཆོ་གའི་རིམ་པ་བརྒྱུད་ལས་དོན་ལམ་ལྷོང་ཡོང་པའི་སྨོན་ཆོག་བཅས་ཀྱི་ལས་ཡུལ་དངོས་སུ་གནང་བའོ། །རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༥།༠༩།༢༣ལ།
༄༅། །སྤྱི་ལོ་ ༢༠༢༥ ཟླ་བ་ ༠༩ པའི་ ཚེས་ ༡༢ ཉིན་དཔལ་ལྡན་རྒྱུད་སྨད་གྲྭ་ཚང་གི་མདོ་སྔགས་བཤད་སྒྲུབ་ཀྱི་སློབ་མ་དང་། རྒྱུད་སྨད་གངས་ཅན་རིག་གནས་གཉིས་ཀྱི་སློབ་མའི་བར་གནའ་དེང་གི་ཤེས་ཡོན་བརྗེ་ལེན་དང་། དྲི་བ་དྲི་ལན་བཅས་ཀྱིས་༧ རྒྱལ་བའི་གོ་སྟོན་སྲུང་བརྩི་ཞུས་པའི་སྐལ་བཟང་གི་ཉིན་མོ། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་༢༠༢༥།༠༩།༡༢ལ།
༄༅།། དེ་རིང་སྤྱི་ཟླ་ ༩ པའི་ཚེས་བཅུ་ལྷག་དཀར་གཟའ་ཚེས་དགེ་བའི་ཉིན་མང་ཐོས་འདུལ་བ་འཛིན་པ་གྲྭ་ཚང་འདི་ཉིད་ཀྱི་མཁན་རིན་པོ་ཆེ་རྗེ་བཙུན་ངག་དབང་སངས་རྒྱས་མཆོག་ནས་གྲྭ་ཚང་གི་གསར་ཞུགས་གྲྭ་རྒྱུན་གྲངས་སུམ་ཅུ་ཙམ་ལ་དགེ་ཚུལ་གྱི་བསླབ་སྡོམ་སྩལ་གནང་ཞིང་། འདུས་མང་ཚོགས་ཡོངས་ནས་སྔོན་བྱོན་སྟོན་པའི་རྣམ་ཐར་རྗེས་འཛིན་དུ་དགྲ་བཅོམ་གསོལ་སྙོམ་ལ་ཕེབས་པའི་ཚུལ་གྱིས་ལྷུང་བཟེད་མཆོད་པའི་ཉམས་བཞེས་ལྷུར་ལེན་མཛད་དོ། །རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་༢༠༢༥།༠༩།༡༠ ལ།
༄༅། །རྒྱུད་སྨད་དཔེ་ཁྲིད་དགེ་རྒན་ཆེན་མོ་མང་ཐོས་འདུལ་བ་འཛིན་པ་ཡོངས་ཀྱི་དགེ་བའི་བཤེས་གཉེན་རྒན་འབྲུག་གྲགས་མཆོག་ནས་དུས་རྒྱུན་དུ་གཞུང་ཆེན་ཁག་དཔེ་ཁྲིད་དང་ཁྲིད་ལུང་སོགས་ཉིན་ལྟར་གནང་དང་གནང་མུས་ལ་དེ་རིང་ཡང་འདི་གར་གཞན་ཕན་སྣང་འབྱེད་ཚོམས་ཁང་དུ་རྡོ་རྗེ་གཅོད་པ། མདོ་སྡེ་དགོངས་འགྲེལ། ཆོས་ཀྱི་འཁོར་ལོའི་མདོ། དེ་བཞིན་གཤེགས་པའི་སྙིང་པོའི་མདོ། སཱ་ལུ་ལྗང་པའི་མདོ། ཚད་མ་ཀུན་བཏུས་ཀྱི་ཁྲིད་ལུང་། པཎ་ཆེན་བློ་བཟང་ཆོས་རྒྱན་གྱི་གསུང་འཕོ་ཁྲིད་སོགས་ཀྱི་གསུང་ཆོས་གནང་བ་དགེའོ། །རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༥/༠༩/༠༤ལ།
༄༅། །དཔལ་ལྡན་སྨད་རྒྱུད་གྲ་ཚང་མདོ་སྔགས་བཤད་སྒྲུབ་སློབ་གཉེར་ཁང་གི་ཟླ་རེའི་སྐྱོར་སྦྱང་ཆེན་མོ་དང་དམ་བཅའ་ཆེན་མོ། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་༢༠༢༥།༠༨།༢༢ ལ།
༄༅། །གསང་ཆེན་དཔལ་ལྡན་སྨད་རྒྱུད་གྲྭ་ཚང་ནས་༧རྒྱལ་བའི་གོ་སྟོན་བྱམས་བརྩེའི་ལོ་ཡིས་བསུ་བའི་མཆོད་སྤྲིན་སྤྲོ་ཞིང། འཛམ་གླིང་ཞི་བདེ་དང། འགྲོ་ཀུན་བདེ་སྐྱིད་ཀྱི་ལེགས་ཚོགས་སུ་དམིགས། རིག་པ་འཛིན་པ་འདུས་པའི་ཚོགས་ཆེན་པོས་དཔལ་རྡོ་རྗེ་འཇིགས་བྱེད་བཅུ་གསུམ་པའི་དཀྱིལ་ཆོག་དབང་བཞི་དང་འབྲེལ་བའི་རབ་གནས་དགེ་ལེགས་འཆར་འབེབས་ཉིན་གསུམ་ལས་དེ་རིང་དངོས་གཞི་ཆོས་འཁོར་དུས་ཆེན་ཉིན་འཁེལ་བའི་གསུང་ཆོག་ཚར་དུ་དངར་ཞིང་། དེ་འབྲེལ་སེར་བྱེས་ཏྲེ་ཧོར་དགེ་བཤེས་ལྷ་རམས་པ་བསོད་ནམས་རྡོ་རྗེ་མཆོག་གྲྭ་ཚང་གི་དགུན་ཆོས་དགེ་བསྐོས་ཟླ་བ་དྲུག་རིང་བཞེངས་ཏེ་བསྟན་དོན་ལེགས་ཚོགས་ཞུ་སྒོ་ཁག་རྣམ་དག་ལེགས་གྲུབ་བྱུང་བའི་མཇུག་གི་རྣམ་དཀར་མཆོད་པའི་རྫས་སུ་སྤྲོ་བར་གྲུབ་རིག་འབུམ་སྡེའི་རོལ་མཚོ་རིག་འཛིན་འདུས་པའི་ཚོགས་ཆེན་པོར་བསྙེན་བཀུར་གཟབ་རྒྱས་ལེགས་འབུལ་གྱི་དགེ་རྩ་ཡངས་པར་བྱས་པའོ། །བྱམས་བརྩེ་ལོ། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་༢༠༢༥།༠༧།༢༨ལ།
༄༅། །གསང་ཆེན་དཔལ་ལྡན་སྨད་རྒྱུད་གྲྭ་ཚང་ཞེས་ཡོངས་སུ་གྲགས་པ་འདི་ཡི་ཕྱག་འདེབས་པ་པོ་གསང་བདག་མི་ཡི་རྣམ་རོལ་རྗེ་བཙུན་ཤེས་རབ་སེངྒེ་མཆོག་དགོངས་པ་དགའ་ལྡན་ཞིང་དུ་གཏད་དེ་མི་ལོ་ཧྲིལ་པོ་ ༥༨༠ འཁོར་བའི་འདས་མཆོད་མཆོད་འབུལ་དུ་དཔལ་ལྡན་སྨད་རྒྱུད་པའི་མཁན་ཆེན་རྡོ་རྗེ་འཆང་གིས་དབུས་དགེ་འདུན་འདུས་པ་རྒྱ་མཚོ་མཆོག་ནས་ཚོགས་འཁོར་མཆོད་སྤྲིན་རྒྱ་མཚོའི་ཞིང་ཁམས་མངོན་པར་སྤྲོས། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་བོད་ཟླ་ལྔ་པའི་ཚེས་ ༢༨ ལ།
༄༅། །དཔལ་ལྡན་སྨད་རྒྱུད་གྲྭ་ཚང་མདོ་སྔགས་བཤད་སྒྲུབ་སློབ་གཉེར་ཁང་གི་ཟླ་རེའི་དམ་བཅའ་ཆེན་མོ་ཚོགས་བཞིན་པ། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༥།ཟླ་༧།ཚེས་༢༡ལ།
༄༅། །དཔལ་ལྡན་སྨད་རྒྱུད་གྲྭ་ཚང་གི་གཞུང་དོན་ཕྱོགས་བསྐྱོད་པ་དགེ་འདུན་ཆོག་གྲྭ་རྣམས་ནས་ཨུ་རུ་སུའི་གྲོང་ཁྱེར་མོ་སོ་ཀོ་ནང་དཔལ་གསང་བ་འདུས་པའི་རྡུལ་ཚོན་དཀྱིལ་འཁོར་ཞལ་ཕྱེ་ཆོས་འབྲེལ་དང་། དད་ལྡན་པའི་རྐྱེན་སེལ་རིམ་འགྲོ། མི་དམངས་ལ་ནང་ཆོས་ངོ་སྤྲོད་དང་བགྲོ་གླེང་བཅས་ཀྱི་ལས་རིམ་ཁག་ལེགས་པར་གྲུབ་སྟེ་གནས་དེ་གའི་དད་ལྡན་ཁག་ལ་དཀྱིལ་འཁོར་མཇལ་ཁ་བཅས་མཛད་འཆར་ཁག་སྐལ་ལྡན་མིག་རྒྱན་དུ་སོང་བ་དང་། ཆོག་གྲྭ་རྣམས་ཀྱི་མཛད་རིམ་ཡང་འདི་ནས་མཇུག་བསྒྲིལ་གནང་བ་ཡིན། བྱམས་བརྩེ་ལོ། རྒྱུད་སྨད་དཔེ་མཛོད་ཁང་དྲ་ངོས་རྩོམ་སྒྲིག་པས་ ༢༠༢༥།༠༧།༡༠ལ།
