རྒྱ་གར་སྐད་དུ། ཡེ་དྷརྨཱཥྚཱི་ཀ །བོད་སྐད་དུ། ཡེ་དྷརྨཱའི་འགྲེལ་པ། སངས་རྒྱས་ལ་ཕྱག་འཚལ་ལོ། །ད་ནི་ཡེ་དྷརྨཱ་ཧེ་ཏུ་པྲ་བཱ་ཝ་ཧེ་ཏུཾ། ཞེས་བྱ་ལ་ལ་སོགས་པས་རྒྱུད་རབ་ཏུ་གནས་པའི་དོན་དུ་གྲུབ་པའི་མཐའ་གསུངས་པ་ཡིན་ཏེ། འཆད་པ་པོ་རྣམས་ལ་ཡང་གསུངས་པ་ཡིན་ནོ། །མདོ་སྡེ་དང་ནི་རྣལ་འབྱོར་གྱི། །ཁང་པར་ཡང་ནི་འཇུག་པ་ནང་། །ཡེ་དྷརྨཱ་སོགས་ཚིགས་བཅད་ཀྱིས། །སངས་རྒྱས་གྲུབ་མཐའི་ཕྱག་རྒྱས་བཏབ། །ཅེས་སོ། །དེ་ཡང་ཡེ་དྷརྨཱ་སོགས་ནི་བོད་ཀྱི་སྐད་དུ། ཆོས་རྣམ་གང་དག་རྒྱུས་འབྱུང་དེ་དག་ནི། །རྒྱུ་དང་དེ་ལ་འགོག་པ་གང་ཡིན་པའང་། །དེ་བཞིན་གཤེགས་པ་ཉིད་ཀྱིས་བཀའ་སྩལ་ཏེ། །དེ་སྐད་གསུངས་པའི་ཚུལ་ཅན་དགེ་སྦྱོང་ཆེ། །ཞེས་བྱ་བའོ། །
ཆོས་རྣམས་གང་དག་རྒྱུས་བྱུང་ཞེས་པ་ལ་གང་དག་ནི་རབ་ཏུ་གྲགས་པ་བདུན་པོ་རྣམས་ཏེ། མ་རིག་པ་ལ་སོགས་པའི་ལྕགས་སྒྲོག་གིས་ཀུན་ཏུ་བསྐོར་བའི་འཁོར་ལོ་ནི་རྒྱུ་དང་འབྲས་བུའི་བདག་ཉིད་ཅན་ནོ། །
དེ་དག་ནི་ཞེས་པ་ཉོན་མོངས་པ་དང་། ལས་དང་སྡུག་བསྔལ་གྱི་ཡན་ལག་གསུམ་དང་། གཉིས་དང་བདུན་གྱིས་ཕྱེ་བས་གསུམ་དུ་ཡང་གྱུར་པ་ཡིན་ཏེ། མ་རིག་པ་ཐོག་མ་ཡིན་པར་སངས་རྒྱས་ཉིད་ཀྱིས་གསུངས་པ་ཡིན་ནོ། །༡མ་རིག་པ་དང་། ༢འདུ་བྱེད་དང་། ༣རྣམ་པར་ཤེས་པ་དང་། ༤མིང་དང་གཟུགས་དང་། ༥སྐྱེ་མཆེད་དྲུག་དང་། ༦རེག་པ་དང་། ༧ཚོར་བ་དང་། ༨སྲེད་པ་དང་། ༩ལེན་པ་དང་། ༡༠སྲིད་པ་དང་། ༡༡སྐྱེ་བ་དང་། ༡༢རྒ་ཤི་སྟེ་བཅུ་གཉིས་པོ་རྣམས་སོ། །
མ་རིག་པ་ནི་འདོད་ཆགས་དང་། ཞེ་སྡང་དང་། གཏི་མུག་གི་བདག་ཉིད་ཅན་ནོ། །འདུ་བྱེད་ནི་སྔོན་གྱི་ལས་སོ། །རྣམ་པར་ཤེས་པ་ནི་མངལ་དུ་འཇུག་པའོ། །མིང་དང་གཟུགས་ནི་ནུར་ནུར་པོ་ལ་སོགས་པ་ལྔའོ། །སྐྱེ་མཆེད་དྲུག་ནི་མིག་ལ་སོགས་པ་ལ་འདོད་དོ། །རེག་པ་ནི་ཡུལ་དང་། དབང་པོ་དང་། རྣམ་པར་ཤེས་པ་རྣམས་ཕྲད་པའོ། །ཚོར་བ་ནི་བདེ་བ་ལ་སོགས་པའི་བདག་ཉིད་ཅན་ནོ། །སྲེད་པ་ནི་འཁྲིག་པའིའདོད་ཆགས་སོ། །ལེན་པ་ནི་འདོད་པའི་ཡུལ་ལེན་པའོ། །སྲིད་པ་ནི་འབྱུང་བར་འགྱུར་བའི་སྲིད་པའི་འབྲས་བུ་ཅན་གྱིས་ལས་སོ། །སྐྱེ་བ་ནི་སླར་ཡང་ཕུང་པོ་ཉིང་མཚམས་སྦྱོར་བའོ། །རྒ་ཤི་ནི་གསལ་ལོ། །
དང་པོ་དང་། བརྒྱད་པ་དང་། དགུ་པ་རྣམས་ནི་ཉོན་མོངས་པའོ། །ལས་ནི་གཉིས་པ་དང་། བཅུ་པའོ། །ལྷག་མ་བདུན་ནི་སྡུག་བསྔལ་ལོ། །དེ་གསུམ་གྱིས་བསྡུས་པའི་ཕྱིར་བཅུ་གཉིས་ནི་ཆོས་རྣམས་སོ། །གསུམ་ལས་གསུམ་དང་གཉིས་ལས་གཉིས་འབྱུང་ལ། བདུན་ལས་བདུན་ཡིན་པའི་ཕྱིར། དེ་ཁོ་ན་འཁོར་བའི་འཁོར་ལོ་རྒྱུ་དང་འབྲས་བུ་ཡང་སྟེ། འགྲོ་བ་ཐམས་ཅད་དེ། འདིར་སེམས་ཅན་གཞན་ནི་འགའ་ཡང་ཡོད་པ་མ་ཡིན་ཏེ། སྟོང་པ་འོད་ཟེར་ལྟར་ཆོས་རྣམས་ལས་སྟོང་པའི་ཆོས་རྣམས་འབྱུང་བར་འགྱུར་ཏེ། ཁ་ཏོན་དང་། མར་མེ་ལྟ་བུ་དག་ནི་རྒྱུ་ལས་བྱུང་བའི་དོན་དུའོ། །
རྒྱུ་དང་དེ་རྣམས་ཀྱི་ཡང་དེ་བཞིན་གཤེགས་པ་ཉིད་ཀྱིས་བཀའ་སྩལ་ཏེ་ཞེས་པ་ནི། དེ་ཇི་ལྟར་ཐུགས་སུ་ཆུད་པ་དེ་བཞིན་དུ་གསུངས་པའི་ཕྱིར་ཏེ། གཞན་མ་ཡིན་པར་གསུང་བ་ཉིད་ཀྱི་ཕྱིར་འཁོར་བའི་རྒྱུ་དང་རྐྱེན་གསུངས་པ་ཡིན་ནོ། །དེ་ལ་འགོག་གང་ཡིན་པའང་། །ཞེས་བྱ་བ་ལ། འང་གི་སྒྲ་ལས་དེ་ཁོ་ན་རྒྱུ་དང་བསམས་པར་གསུངས་པ་ཡིན་གྱི། སངས་རྒྱས་རྣམས་ཀྱི་མྱ་ངན་ལས་འདས་པ་ཡན་ལག་བཅུ་གཉིས་འགོག་པའི་མཚན་ཉིད་ཀྱང་གསུངས་པ་ཡིན་ཏེ། ཟུང་འཇུག་པའི་བདེ་བ་བརྟགས་པ་ནམ་མཁའི་མེ་ཏོག་མ་ཡིན་ཞིང་སེམས་མེད་པ་བེམས་པོ་མ་ཡིན་པའི་རང་བཞིན་ནོ། །
དེ་སྐད་གསུངས་པའི་ཚུལ་ཅན་དགེ་སྦྱོང་ཆེ། །ཞེས་བྱ་བ་ནི་ཟུང་དུ་འཇུག་པ་གསུང་བའི་ཚུལ་ཅན་ཡང་དག་པར་རྫོགས་པའི་སངས་རྒྱས་ཏེ། ཕྱིན་ཅི་མ་ལོག་པར་གསུང་བའི་ཚུལ་ཅན་གྱི་ཚངས་པའི་ཆོ་གའོ། །འདི་ན་སློབ་དཔོན་རྟག་པའི་རྡོ་རྗེས་གསུངས་པ་གཞོན་ནུས་བསྒྱུར་བའོ། ། ། །
ཡེ་ནི་གང༌། དྷརྨཱ་ཆོས་རྣམས། ཧེ་ཏུ་རྒྱུ། པྲ་བྷ་ཝཱ་རབ་ཏུ་བྱུང་བ་སྟེ། རྐང་པར་བསྡེབས་པས། གང་གི་ཆོས་རྣམས་རྒྱུ་ལས་རབ་ཏུ་བྱུང༌། །ཧེ་ཏུན་རྒྱུ། ཏེ་ཥཱན་དེ་རྣམས། ཏ་ཐཱ་ག་ཏོ་དེ་བཞིན་གཤེགས་པ། ཧི་ངེས་གཟུང༌། ཨ་བ་དཏ་གསུངས་ཞེས་པ་སྟེ། གོང་གི་ཧི་དང་མཚམས་སྦྱར་བས་ཧྱ་ཞེས་པ་སྟེ། དེ་རྒྱུ་རྣམས་ནི་དེ་བཞིན་གཤེགས་པས་གསུངས། ཏེ་ཥཱཉ་དེ་རྣམས། ཙ་ཀྱང༌། ཡོ་གང༌། ནི་རོ་དྷ་འགོག་པ། ཨེ་ཝཾ་བསྒྱུར་ན་འདི་སྐད་དེ། དེ་རྣམས་ཀྱང་གང་འགོག་པ་ཨེ་ཝཾ་དུ། ཝཱ་དཱི་སྨྲ་བ་པོ། མ་ཧཱ་ཤྲ་མ་ཎཿ དགེ་སྦྱོང་ཆེན་པོ་སྟེ། སྨྲ་བ་པོ་ནི་དགེ་སྦྱོང་ཆེན་པོ་ཡིན། །ཞེས་འབྱུང་ངོ༌། །