རིགས་རང་བཞིན་བརྗོད་པ།
གསུམ་ལྡན་ངུར་མྲིག་རབ་བྱུང་སྐུ་མངའ་ཞིང་།།
ཕན་བདེའི་གསུང་བཟང་འཛམ་གླིང་ཡོངས་ལ་ཁྱབ།།
མཁྱེན་བརྩེ་ཟླ་མེད་ཟབ་ཡངས་ཐུགས་ཡངས་པ།།
༸རྒྱལ་དབང་སྐུ་ཕྲེང་ན་རིམ་གུས་པས་འདུད།།

བྱ་བ་རང་བཞིན་བརྗོད་པ།།
སྐྱེ་འགྲོའི་དོན་ཕྱིར་འཛམ་གླིང་ཀུན་ལ་བྱོན།།
འཛམ་གླིང་ཞི་བདེར་ཕན་ཕྱིར་ཆོས་འཁོར་སྐོར།།
མི་རིགས་ཆོས་ལུགས་གཅིག་ཏུ་མཐུན་པར་སྒྲིལ།།
ཞི་བདེའི་དེད་དཔོན་མཆིག་གི་མཛད་རྣམ་མཚར།།

ཡོན་ཏན་རང་བཞིན་བརྗོད་པ།
ཐུགས་རྗེའི་དབང་གིས་སྐྱེ་འགྲོའི་སྡུག་ཀུན་སེལ།།
གསུང་དབྱངས་ཐོས་པས་ཞི་བདེའི་ཚོར་ཤུགས་སྦྱིན།།
མཛེས་སྐུ་མཇམ་བས་ལུས་ཀྱི་བ་སྤུ་གཡོ།།
མཚན་ཙམ་ཐོས་པས་བདེ་སྦྱིན་གངས་ཅན་མགོན།།

རྫས་རང་བཞིན་བརྗོད་པ།
མི་འཇིགས་གསེར་ཁྲི་མངོན་པར་མཐོ་བའི་སྟེང་།།
ཞྭ་སེར་ངུར་སྨྲིག་གོས་བཟང་མཛེས་པར་ཀླུབས།།
ཕྱག་མཚན་གསེར་གྱི་འཁོར་ལོ་རྩིབས་སྟོང་ཅན།།
ལྷ་གཅིག་གངས་ཅན་མགོན་ཁྱེད་ཞབས་བརྟན་ཤོག །

ཀ་རྩོམ་སེམས་ཀྱི་འཆར་སྒོ།  
ཀ་མད་གསར་དུ་མཛད་པོ་ཐོན་མི་དང་། །
ཁ་བསླབ་སྒྲ་དག་སློབ་པའི་བཤེས་གཉེན་སྟེ།།
ག་ནས་བལྟས་ཀྱང་བཀའ་དྲིན་བསམ་བཞིན་དུ།།
ང་ཡི་ལུས་ངག་ཡིད་ཀྱིས་གུས་པས་འདུད།།

ཅ་ཅོ་འདུ་འཛིས་དབེན་པའི་སྨད་རྒྱུད་འདིར།།
ཆ་ལུགས་ངུར་སྨྲིག་སྡོམ་གཙང་དགེ་འདུན་སྡེ།།
ཇ་བཏུང་འདོན་ཡོན་སྲེད་ལ་མ་ཆགས་པར།།
ཉ་མོ་བྲེལ་བཞིན་གཞུང་ལུགས་བཤད་སྒྲུབ་བརྩོན།།

ཏྭ་ལའི་བླ་མའི་བཀའ་དགོངས་ཇི་བཞིན་དུ།།
ཐ་ཤལ་སྤྱོད་ངན་སྤངས་ཏེ་བཀའ་བཞིན་སྒྲུབ།།
ད་ཆ་ཐོས་བསམ་ལལ་ལ་གཞོལ་དུས་འདིར།།
ན་གཞོན་དད་དང་བརྩོན་འགྲུས་ཟུང་འབྲེལ་དགོས།།

པ་ཏྲའི་དབྱིབས་ལྟར་ཁོར་ཡུག་དབེན་གནས་སུ།།
ཕ་ཡུལ་ལས་འདས་་མི་རིགས་སྣ་ཚོགས་ཀྱི།།
བ་མོ་ལྟར་མིན་མཛའ་མཐུན་རབ་བརྟན་པས།།
མ་ལུས་བཟའ་བཏུང་ཚོར་བར་མཉམ་དུ་རོལ།།

ཙ་རི་བསྐོར་ནས་ཡོང་བའི་གྲྭ་གཞོན་རྣམས།།
ཚ་བས་གདུང་བའི་ངལ་དུབ་ཆེ་ན་ཡང་།།
ཛ་དྲག་གནས་ཏེ་སྙིང་སྟོབས་ཞུམ་མེད་ཀྱིས།།
ཝ་འུར་སྒྲོགས་པའི་སློབ་གཉེར་ཁོ་ནར་བརྩོན།།

ཞྭ་སེར་བསྟན་པའི་གསང་སྔགས་ཟབ་མོ་འདི།།
ཟ་ཟིང་འདུ་འཛིས་དབེན་པའི་གནས་མཆོག་འདིར།།
འ་ཅག་སྟོན་པའི་རྗེ་འཇུག་དོན་ཡོད་མཛོད།།
ཡ་རབས་ལྟ་སྤྱོད་གཙང་མའི་ཆོས་གླིང་འདིར།།

ར་བ་ལྕགས་རིས་བསྐོར་བའི་ཁོར་ཡུག་མཛེས།།
ལ་ནང་རྩི་ཤིང་མེ་ཏོག་སྣ་ཚོགས་བཅས།།
ཤ་བ་བཞིན་དུ་ཁེར་རྐྱང་ཞེན་ཆགས་བྲལ།།
ས་ཕྱོགས་གང་སར་དྲི་བཟང་ཆུ་སྐྱེས་བཞད།།

ཧ་ཅང་གཅེས་པའི་གསང་སྔགས་བསྟན་པ་ཡི།།
ཧ་ལས་བཤད་སྒྲུབ་དར་རྒྱས་སྨད་རྒྱུད་འདི།།
ཨ་ཧོ་བསྟན་འདི་ཕྱོགས་ཀུན་ཁྱབ་གྱུར་ཅིག།།
ཨ་ཙི་ནོར་འཁྲུལ་མཆིས་ན་དགོངས་གསོལ་ཞུ།།

བློ་བཟང་ཕན་བདེ། ཕར་ཕྱིན་ལོ་རིམ་གསུམ་པ།