གཟུངས་འཇུག་འཁྲུལ་སྤོང་སྙིང་པོ། བླ་མ་དང་མགོན་པོ་འཇམ་པའི་དབྱངས་ལ་ཕྱག་འཚལ་ལོ། །རྒྱལ་བའི་སྐུ་གསུང་ཐུགས་རྟེན་བཞེངས་པ་ལ། །ཐོག་མར་གནས་གཞི་འདིང་བ་དང༌། རྟེན་བཞེངས་ཚུལ་གཉིས་ལས། དང་པོ་ནི། གནས་ཀྱི་མཚན་ཉིད་སྤྱིར་དགེ་བཅུ་ཚང་བ། ཁྱད་པར་དཔལ་དཱི་བཾ་ཀཱ་རའི་ས་དཔྱད་འཕྲུལ་གྱི་ལྡེ་མིག །ཕུག་པ་ཡང་གསང་བླ་མེད། ཡང་དགོན་པའི་རི་ཆོས་སོགས་ལས་ཇི་ལྟར་འབྱུང་བ་བཞིན་ལེགས་པར་བརྟགས་ལ། གནས་ཀྱི་གཙོ་བོ་ནི་སངས་རྒྱས་ཀྱི་མཛད་པ་བཅུ་གཉིས་ཅི་རིགས་བསྟན་པའི་གནས་དང༌། ཡུལ་ཉི་ཤུ་རྩ་བཞིའམ་དེ་དང་འདྲ་བ་དཔའ་བོ་མཁའ་འགྲོའི་འདུ་གནས་དང༌། མཁས་གྲུབ་ཚད་ལྡན་གྱི་ཞབས་ཀྱིས་བཅགས་པའི་གནས་ལྟ་བུ་བྱུང་ན་ལྷག་པར་ལེགས་ཤིང༌། དོན་བསྡུ་ན། དུས་འཁོར་རྩ་རྒྱུད་ལས། གང་ན་ས་སྐྱོང་ཆོས་ལྡན་ཞིང༌། །སྐྱེ་དགུ་བདེར་གནས་རྩོད་པ་མེད། །ཅེས་དང༌། མདོ་སྡེ་རྒྱན་ལས། བློ་ལྡན་གང་དུ་སྒྲུབ་པའི་གནས། །ལེགས་པར་རྙེད་དང་གནས་བཟང་དང༌། །ས་བཟང་བ་དང་གྲོགས་བཟང་དང༌། །རྣལ་འབྱོར་བདེ་བའི་ཡོ་བྱད་ལྡན། །ཞེས་སྤྱིའི་གནས་དང༌། བྱེ་བྲག་ཏུ་རྣལ་འབྱོར་བའི་གནས་ནི། ཀྱཻ་རྡོར་ལས། དང་པོར་སྒོམ་པར་བྱེད་དུས་ཀྱི། །གནས་ནི་གང་དུ་སྔགས་པའི་སེམས། །གཅིག་ཏུ་མཉམ་བཞག་འགྲུབ་འགྱུར་བའི། །གནས་ནི་བཟང་པོ་ངེས་པར་བརྟགས། །ཞེས་དང༌། བདེ་མཆོག་རྩ་རྒྱུད་ལས། དཔའ་བོའི་གནས་དང་རི་བོར་ནི། །དམ་ཚིག་གནས་ལ་མཁའ་འགྲོ་མ། །རིང་པོར་གནས་ཀྱང་གཟིགས་པར་འགྱུར། །ཞེས་དང༌། གསང་འདུས་རྩ་རྒྱུད་ལས། དགོན་པ་ཆེན་པོའི་ས་ཕྱོགས་ནི། །མེ་ཏོག་འབྲས་བུ་སོགས་པས་བརྒྱན། །རི་བོ་དབེན་པའི་ས་ཕྱོགས་སུ། །དངོས་གྲུབ་ཐམས་ཅད་བསྡུས་པ་འགྲུབ། །ཅེས་གསུངས་པ་ལྟར་ཡིན་པས་གནད་ཆེ།
གཉིས་པ་དེར་བཞུགས་པའི་རྟེན་ལ། ངོས་འཛིན་ཚུལ། ཚད། ཕན་ཡོན། གཟུངས་འབུལ་ཚུལ་བཞི། དང་པོ་ལ། སྐུ་གསུང་ཐུགས་རྟེན་གསུམ་ལས། སྐུའི་རྟེན་ནི། སངས་རྒྱས་ལོངས་སྤྲུལ། བྱང་སེམས། ཉན་རང༌། དངོས་བརྒྱུད་བླ་མའི་སྐུ་སོགས་མང༌། གསུང་གི་རྟེན་ནི། མདོ་སྡེ་ལྟར་ན་ཆོས་ཕུང་བརྒྱད་ཁྲི་བཞི་སྟོང༌། གསང་སྔགས་ལ་དབྱངས་གསལ་གྱི་མཐའ་ཅན་གྱི་རྒྱུད་སྡེ་བཞི་སྟོང་ཕྲག་སུམ་ཅུ་རྩ་གསུམ་ལས་ཅི་རིགས་གླེགས་བམ་དུ་བཀོད་པའོ། །ཐུགས་རྟེན་ནི། རང་བཞིན་ལྷུན་གྲུབ་ཀྱི་མཆོད་རྟེན་དག་པའི་སྣོད་བཅུད་དང༌། བླ་ན་མེད་པའི་མཆོད་རྟེན་གླིང་བཞི་ཚད་མེད་བཞི་ལ་སྦྱར་བ། བྱིན་གྱིས་བརླབས་པའི་མཆོད་རྟེན་སྐུ་གདུང་ཆ་བརྒྱད་གླིང་བཞི་སོ་སོར་བཞུགས་པ། དངོས་གྲུབ་འབྱུང་བའི་མཆོད་རྟེན་ཡུལ་བརྒྱད་ཀྱི་ཧེ་རུ་ཀས་དྲག་པོ་བཏུལ་ཏེ་ཡུལ་བརྒྱད་ཀྱི་དུར་ཁྲོད་དུ་མཆོད་རྟེན་བརྒྱད་ཅེས་གསང་སྔགས་ཀྱི་ཐེག་པ་གཞན་ནས་འབྱུང་ལ། ཡོངས་གྲགས་ལ་སངས་རྒྱས་ཀྱིས་མཛད་པ་ཁྱད་པར་ཅན་རེ་མཛད་པའི་ཚེ་མཆོད་རྟེན་རེ་བཞེངས་པའི་མཆོད་རྟེན་བརྒྱད་དང༌། ཉན་ཐོས་རང་རྒྱལ་བྱང་སེམས་སོ་སོའི་མཆོད་རྟེན་སོགས་ནི་སྐུ་གསུམ་ནང་ནས་ཆོས་སྐུའི་རྟེན་ནོ། །ལོངས་སྤྲུལ་གྱི་རྟེན་ནི་རང་རང་གི་སྐུ། དཀོན་མཆོག་གསུམ་གྱི་རྟེན་གྱི་དབང་དུ་བྱས་ན་རིམ་པ་བཞིན་སངས་རྒྱས་ཀྱི་སྐུ། དེ་དག་གི་གསུང་གླེགས་བམ། ཉན་རང་བྱང་སེམས་སོགས་ཀྱི་སྐུ་བརྙན་རྣམས་སོ། །
གཉིས་པ་ཚད་ནི། སྦྱིན་བདག་གི་འབྱོར་བསྟུན་གྱིས་ཆེ་ཆུང་མ་ངེས་ཤིང༌། ཆག་ཚད་ཀྱི་རིམ་པ་དུས་འཁོར་སྡོམ་འབྱུང་རྩ་འགྲེལ་སོགས་ནས་འབྱུང་བ་ལྟར་དང༌། གླེགས་བམ་ཡང་སྤྱིར་ཡིག་རིགས་དྲུག་ཅུ་ལྟ་བུ་དང༌། བོད་འདིར་སུམ་རྟགས་རྩ་འགྲེལ་སོགས་གཞིར་བཞག་གིས་བརྡ་དག་སོགས་རུང་བར་དགོས། གསུམ་པ་ཕན་ཡོན་ནི། མཆོད་རྟེན་སྐུ་འདྲ་གསུང་རབ་རེ་རེ་ལའང་ཕན་ཡོན་མཐའ་ཡས་ཏེ། མཆོད་རྟེན་དང་རྒྱལ་བའི་སྐུ་གཟུགས་བཞེངས་པ་ལ་རྡུལ་ཕྲན་ཇི་སྙེད་ཡོད་པ་དེ་སྙེད་ཀྱི་རྒྱལ་སྲིད་དང༌། ལྷ་དང་མིའི་ལུས་ཐོབ་ཅིང་མཐར་སངས་རྒྱ་ལ། དེའི་བར་དུ་མི་ཁོམ་པར་མི་སྐྱེ་བར་བཤད་ཅིང༌། གསུང་རབ་ཤེར་ཕྱིན་ལྟ་བུ་ལ་གངྒཱའི་ཀླུང་གི་བྱེ་མ་སྙེད་ཀྱི་སེམས་ཅན་དགྲ་བཅོམ་ལ་བཀོད་པ་བས་ཤེར་ཕྱིན་གྱི་གླེགས་བམ་བཞེངས་པ་བསོད་ནམས་ཆེ་བར་བཤད་པ་སོགས་མང༌། བཞི་པ་གཟུངས་འབུལ་ཚུལ་ལ། སྦྱོར་དངོས་མཇུག་གསུམ་དགོས་པར་བསྟན། ལོག་རྟོག་བསལ། འབུལ་ཚུལ་དངོས་གསུམ། དང་པོ་ལ་རྟེན་གསུམ་བཞེངས་པའི་གནས་སུ། རྡོ་རྗེ་ཕྲེང་བ་དང་སྔགས་རིམ་སོགས་ནས་བཤད་པ་ལྟ་བུའི་ས་བརྟགས་བསླང་སྦྱངས་གཟུང་བགེགས་བཟློག་རྣམས་གྲུབ་ན་ལེགས་ལ། མ་གྲུབ་ན་སྦྱངས་གཟུང་རྒྱས་བསྡུས་ཅི་རིགས་བྱ། གནས་གཞི་འདིང་བ་ལྟ་བུ་ལ་ལྟོ་འཕྱེ་བརྟག་པའང་དགོས། དེ་བཞིན་དུ་བཟོ་བོ་དང༌། སྐུ་རྒྱུ། ལག་ཆའི་རིམ་པ་སོགས་ཀྱི་བྱིན་རླབས་དང༌། གཙུག་ལག་ཁང་དང༌། མཆོད་རྟེན་དང༌། སྐུ་གཟུགས་ཆེ་བ་སོགས་ལ་བུམ་གཏེར་ཡང་ལག་ལེན་ལྟར་བྱས་ལ་གཟའ་སྐར་སྦྱོར་བྱེད་སོགས་དང་བསྟུན་པ་གཅེས། གཉིས་པ་ལོག་རྟོག་བསལ་བ་ནི། ལི་མ་དང་སྐུ་གར་བླུགས་འགའ་ཞིག་ལ་གཟུངས་མི་སྣང་བས་གཟུངས་གཞུག་ལ་ཁུངས་མེད་དོ་སྙམ་ན། དཀྱིལ་ཆོག་རྡོ་རྗེ་ཕྲེང་བར་གཟུངས་གཞུག་འབུལ་བར་དངོས་སུ་བཤད་ཅིང༌། མདོ་ལས་སྐུ་གཟུགས་རིང་བསྲེལ་གྱི་སྙིང་པོ་ཅན་གསུངས་པས། ཆོས་སྐུའི་རིང་བསྲེལ་ལ་གཟུངས་སུ་གྲགས་པས་ཤིན་ཏུ་དགོས་པའི་ལུང་རིགས་མང༌།
གསུམ་པ་ལ། དངོས་དང༌། འཕྲོས་དོན་བྱེ་བྲག་ཏུ་བཤད་པ་གཉིས། དང་པོ་ནི་སྲོག་ཤིང་རབ་ཙན་དན། མ་འབྱོར་ན་ཤུག་པའམ་འབྲས་བུ་ཅན་གྱི་ཤིང་མ་བཅད་གོང་ནས་ཤར་ངོས་མ་ནོར་བ་དགོས་ལ། སྐུ་གཟུགས་ལ་མེད་ནའང་རུང་ཀྱང་མཆོད་རྟེན་ལ་ངེས་པར་དགོས། ཆོས་སྐྱོང་གི་རིགས་ལའང་མན་ངག་ལྟར་དགོས། མཆོད་རྟེན་གྱི་ཆོས་འཁོར་ཡན་ཆད་ཟླུམ་པོ། གཞན་རྣམས་གྲུ་བཞི་རྩ་རྩེའི་རྣམ་པའི་ཕྲ་སྦོམ་ཡོད་པ། དེའི་རྩེ་མོར་རྣམ་རྒྱལ་མཆོད་རྟེན་དང་རྩ་བར་རྡོ་རྗེ་ཕྱེད་པ་གྲུབ་ན་བརྐོ་བའམ། མ་གྲུབ་ན་འབྲི། རྩ་དབུ་མའི་མཚོན་དོན་ཡིན་པས་སྐུ་གཟུགས་ལ་རྡོ་རྗེའི་སྐྱིལ་ཀྲུང་ཡན་ཆད་དམ། ཡང་ན་ལྟེ་བ་ཡན་ཆད་ཙམ་དང༌། མཆོད་རྟེན་ལ་གདུང་ཆེན་ཡན་ཆད་ཀྱི་ཚད་དུ་བྱ། སྲོག་ཤིང་རུས་ཤིང་གཅིག་ཚེ་མཚམས་དེར་བཅད་ཀྱི་རི་མོ། གཡས་གཡོན་དུ་རོ་རྐྱང་མཚོན་པའི་དུར་བ་དང་ཀུ་ཤ།།སྲོག་ཤིང་གི་ཁ་དོག་ཡི་གེ་གང་གིས་འབྲི་བའི་མདོག་དང་མི་ཟློས་པའི་ཚོན་གྱིས་བྱུགས། སྐུའི་དབུའི་བྱིངས་དང༌། མཆོད་རྟེན་གྱི་བྲེ་ཐད་ལ། ཨོཾ་སརྦ་བིདྱ་སྭཱཧཱ། ཞེས་དང༌། མཆོད་རྟེན་གྱི་བྲེ་མགྲིན་སྐུའི་མགྲིན་པའི་ཐད་ཀར་དབྱངས་གསལ་དང༌། ཐུགས་ཀའི་ཐད་དུ་བཛྲཨཱཿཡུ་ཥེ་དང༌། སུ་པྲཏིཥྛ། མདུན་གྱི་གནས་ལྔར་ཨོཾ་ཨཱཿ ཧཱུཾ་ཏྲཱཾ་ཧྲཱིཿ ཡི་དམ་ལྷའི་ཐུགས་ཀའི་ཐད་དུ་རང་གི་སྙིང་པོ་འདོད་གསོལ་བཅས་ལྷའི་སྔགས་གཞན་ལའང་དགོས། གཞན་ཡང་ཤར་ངོས་ལ་གཙུག་ཏོར་རྣམ་རྒྱལ། ལྷོར་གཙུག་ཏོར་དྲི་མེད། ནུབ་ཏུ་གསང་བ་རིང་བསྲེལ། བྱང་དུ་བྱང་ཆུབ་རྒྱན་འབུམ་གྱི་གཟུངས་རིང་དམ་གཟུངས་ཐུང་འབྲི། བཞི་ཀའི་གཤམ་དུ་རྟེན་འབྲེལ་སྙིང་པོ། བཟོད་པ་དཀའ་ཐུབ་མ་སོགས་བྲི། ནང་རྟེན་ལྟ་བུ་ལ་རང་གི་རྩ་བའི་བླ་མའི་སྐུ་གཙུག་ཏོར་གྱི་ནང༌། ཐུགས་ཀའི་ཐད་དུ་ལྷག་པའི་ལྷའམ་ཡི་དམ་ལྟ་བུ་བྲིས་འབུར་ལ། རིན་པོ་ཆེའི་ཕྲེང་བའི་རིགས་དང༌། རིན་པོ་ཆེའི་ཕྱེ་མ་དང༌། དྲི་བཟང་པོའི་སྨན་གྱི་ཚོགས་རྣམས་སྐུ་མདོག་དང་མཐུན་པའི་དར་གྱིས་དྲིལ་ལ། སྐུ་གཟུགས་དེ་གཉིས་དང་ལྷན་ཅིག་འདོད་གསོལ་དང་བཅས་འཇོག །འདི་ལ་ཤི་གསོན་སོ་སོ་དང༌། ཆོས་རྒྱུད་སོགས་ལ་ལྟོས་པའི་སྤེལ་ཚིག་ཤེས་དགོས། ལྟེ་བའི་འོག་ཙམ་དུ་གང་ཟག་དེ་ཀའི་ཆོས་སྐྱོང་ངམ་སྦྱིན་བདག་གི་ཆོས་སྐྱོང༌། རབ་གནས་ཀྱི་ཚེ་བསྒོ་རྒྱུའི་སྐུ་སྔགས་མཐུན་རྫས་རྣམས་དང་ལྷན་ཅིག་ཏུ་བཞག་ལ་སྐབས་བབས་ཀྱི་གཉེར་གཏད་སྤེལ་ཚིག་རྒྱས་པར་བྱའོ། །རིང་བསྲེལ་ལ་སྐུ་གདུང་གི་རིང་བསྲེལ། ཡུངས་འབྲུ་ལྟ་བུའི་རིང་བསྲེལ། སྐུ་བལ་གྱི་རིང་བསྲེལ། ཆོས་སྐུའི་རིང་བསྲེལ་རྣམས་ལས། དང་པོ་ནི་སངས་རྒྱས་བྱང་སེམས་ཉན་རང་བླ་བརྒྱུད་ཀྱི་གདུང་རུས་ལྟ་བུ། གཉིས་པ་ནི་ཡོངས་གྲགས་ཀྱི་རིང་བསྲེལ། གསུམ་པ་ནི་དབུ་སྐྲ་ཕྱག་སེན་སོགས། བཞི་པ་ནི་གཟུངས་ལ་ངོས་འཛིན་པས། འཇོག་ལུགས་དེ་བཞིན་གཤེགས་པའི་རིང་བསྲེལ་གཙོ་བོར་གྱུར་པའི་རིང་བསྲེལ་རྣམས་མཐོ་དམན་གྱི་བབས་བསྟུན་ནས་བཞག །གང་ཟག་དམན་པའི་རུས་པ་རུས་ཆོག་བྱས་ན་མ་གཏོགས་འཇོག་མི་རུང༌། ཆོས་སྐུའི་རིང་བསྲེལ་འབུལ་ཚུལ་ལ། བླ་གཟུངས་ནས་བཟུང་པད་གཟུངས་ཀྱི་བར་སྣག་ཚའི་རྒྱུ་གྷི་ཧང༌། རིན་པོ་ཆེ་སོགས་སམ། དེ་སྣག་ཚར་བསྲེས་པའི་ཡི་གེ་ལཉྫ་སོགས་སྔར་ལྟར་དུ་རུང་བར་བྲིས་ལ། དེ་ཡང་གཟུངས་རིང་འཕྲེང་གཅིག་མ་གཏོགས་གོང་འོག་མི་ཉན། འཇོག་ལུགས་གོ་རིམ། མ་དྲིལ་གོང་ལ་དྲི་བཟང་པོ་བྱུགས། བགེགས་བསྐྲད་རབ་གནས་བསྡུས་པ་ལག་ལེན་ལྟར་བྱས། དྲིལ་ཚུལ་མཇུག་ནས་ཡི་གེ་ནང་བསྟན་དྲིལ་བ་དང༌། དབུ་ནས་དྲིལ་ལུགས་གཉིས་ལས། གཉིས་ཀ་འཐད་ཀྱང་ཕྱི་མ་ལེགས། དར་རས་སོགས་ཀྱི་ན་བཟའ་སེར་པོས་དྲིལ། སྐུད་པས་དམ་དུ་དཀྲིས། དབུ་དང་སྟོད་སྨད་ཀྱི་གཟུངས་སོགས་མི་ནོར་བའི་ཁ་བྱང་དང་མཚན་མ་བྱ། གཟུངས་འབུལ་བའི་གནས་ཁང་དེར་གསེར་ཟངས་སོགས་ཀྱི་སྐུ་དང༌། རྒྱུ་དེ་ལས་གྲུབ་པའི་མཆོད་རྟེན་རྣམས་ལ་ནི་ཐོག་མར་བྱིན་རྟེན་སྲོག་ཤིང་སྐུ་གཟུགས་དང་གཟུངས། དྲིལ་གྲུབ་པ་རྣམས་ལ་ནི་ཙན་དན་དང་ཤུག་པ་སོགས་སྤོས་ཀྱི་ཕྱེ་དང་སྨན་སྣ་འབྲུ་སྣ་ཐུམ་རྫས་ཀྱི་གོས་དར་གསེར་གཡུ་སོགས་མདོར་ན་དེར་དགོས་པའི་ཡོ་བྱད་ཐམས་ཅད་ཚོགས་པ་ལ། རྡོ་རྗེ་སློབ་དཔོན་ལྷའི་ང་རྒྱལ་ལ་གནས་པས་བགེགས་བསྐྲད་དྲག་ཏུ་བྱ། བསྲུང་འཁོར་བསྒོམ། སླར་ཡང་གཟུངས་རྣམས་ལ་རབ་གནས་བསྡུས་པ་ཞིག་བྱ། རྟེན་གྱི་ནང་དུ་གད་རོ་མ་ལུས་པར་བཏོན། ཕྱིའི་གསེར་མདངས་སོགས་ལ་མི་གནོད་པའི་ཆུས་བཤལ་ནས། སྡོམ་གཟེར་གྱི་བུག་པ་དང༌། སྒྲིགས་མཚམས་སུ་ཆུ་འགྲོ་བ་ཡོད་ན། མ་འོངས་པ་ན་སྐུ་རྗེན་པ་ལ་ཁྲུས་ཆབ་ལྟ་བུ་གསོལ་བའི་ཚེ་བརླན་གྱིས་གཟུངས་རུལ་འགྲོ་བས། སྒྲིགས་མཚམས་དམ་ཞིང་འབྱོར་ན་འབེར་དང༌། མ་མཐའང་བཀྲག་ཆུས་སྲུབ་མེད་པར་བྱ། དེ་ནས་ཙན་དན་དཀར་དམར་ཨ་ཀ་རུ་ཤུག་ཕྱེ་སོགས་ཀྱིས་གཞི་བྱས། དྲི་བཟང་པོའི་སྨན་ཚོགས་ཚད་སྤོས་རེང་སོགས་ཞིབ་ཏུ་བཏག་ལ་ཆུ་གཙང་གིས་བྲན་པའི་སྐ་སླ་ཞོ་ཙམ་གསེར་ཟངས་ཀྱི་ནང་མཆོད་རྟེན་གྱི་ཤིང་སོགས་ཐམས་ཅད་ལ་ལན་མང་དུ་བྱུགས་ཏེ། སྲབ་འཐུག་བའི་ཀོ་བ་ཙམ། སྨན་སྐུ་ཡིན་ན་ཆུ་ཉུང་ལ་སྐ་བ་བྱེད་དགོས། སྨན་སྐུ་ཆེན་པོ་འགའ་ཞིག་ལ་གཟུངས་ཐོག་མ་ནས་གྲུབ་པ་དགོས་པ་ཡོད། དེ་ནས་རྟེན་རྣམས་ལ་ཞི་བ། ཞི་དྲག་ཕྱེད་མ། དྲག་པོའི་སྦྱངས་པ་སྟེ་སྦྱངས་གསུམ་སྔོན་དུ་འགྲོ་བའི་བགེགས་བསྐྲད་བྱས། གུ་གུལ་གྱིས་བདུག །གཟུངས་འཇུག་འབུལ་པའི་ལས་བྱེད་མཁན་ལ་རབ་དགེ་སློང༌། འབྲིང་དགེ་ཚུལ། ཐ་མ་དགེ་བསྙེན་ནམ་ཁྱིམ་པ་གསོ་སྦྱོང་ལ་གནས་པ་དག་གིས་ཁྲུས་བྱས། གོས་གསར་བ་གྱོན། ཤ་ཆང་སྒོག་ཙོང་ཁ་ཟས་མ་རུང་བ་སྤངས་ཤིང་ཨོཾ་མཱནྟྲ་ངྷ་ཏུ་གར་བྷ་ཡ་སྭཱཧཱ། ཞེས་དང༌། བཀྲ་ཤིས་པའི་ཚིགས་བཅད་འདོན་བཞིན་པས་ལས་བྱེད། དེ་རྣམས་ལ་ཇ་བུ་རམ་སོགས་ཀྱིས་ཚིམ་པར་བྱས་ན་སྦྱིན་བདག་ལ་ལོངས་སྤྱོད་ཀྱི་རྟེན་འབྲེལ་དུ་ཆེ། སྐྱེ་མཆེད་བྱིན་རླབས་སོགས་གསེར་སྐུ་ལ་ཐད་སོར་ནང་ནས་སྦྱར། སྨན་སྐུ་ལ་ཚོན་འོག་ཏུ་འབྲི། འཕེལ་གདུང་སོགས་བྱིན་རྟེན་ཐོར་ཚུགས་ཅན་གྱི་དབུ་སྐྲའི་ནང༌། བླ་སྐུའི་དབུ་གཙུག །མཆོད་རྟེན་གྱི་ཏོག་དང་གདུགས་ནང་དུ་བཅུག །མཛོད་སྤུར་ནོར་བུ་རྒྱས་པའི་གཞལ་མེད་ཁང༌། དེའི་འོག་ཏུ་བླ་མ་བརྒྱུད་པའི་མཚན་གཟུངས། གཙུག་ཏོར་འཁོར་བསྒྱུར་གྱི་གཟུངས་ལ་བར་ཆད་སེལ་བའི་སྤེལ་ཚིག་དང༌། གདུགས་དཀར་གྱི་གཟུངས་འཇུག །མཆོད་རྟེན་ཡིན་ན་བྲེ་ཡན་ཆད་དུ་གཞུག །སྐུའི་མགུལ་དང་མཆོད་རྟེན་གྱི་བྲེ་ཕྲེང་གི་ཐད་དུ་དབྱངས་གསལ། སྐུའི་སྟོད་དང་མཆོད་རྟེན་གྱི་བུམ་སྟོད་ལ་བླ་མེད་ཀྱི་གཟུངས། གཡས་སུ་ཕ་རྒྱུད། གཡོན་དུ་མ་རྒྱུད། དབུས་སུ་རང་གི་ལྷག་པའི་ལྷ་བླ་མེད་གང་ཡིན་གྱི་གཟུངས་དང༌། སྐུ་གསུང་ཐུགས་རྟེན་བྱིན་རླབས་ཅན་ཡོད་ན་གཞུག །དེའི་འོག་སྐུ་རྐེད་དང༌། བུམ་རྐེད་ལ་རྣལ་འབྱོར་རྒྱུད། སྤྱོད་རྒྱུད། བྱ་རྒྱུད་ཀྱི་གཟུངས་རིམ་པས་གཞུག །ལྟེ་འོག་དང་བུམ་སྨད་ལ་གཟུངས་ཆེན་སྡེ་ལྔ། ཡངས་པའི་གྲོང་ཁྱེར་དུ་འཇུག་པ། གཞན་ཡང་མདོ་ལས་འབྱུང་བའི་གཟུངས་རྣམས་དང༌། ཕྱག་ལ་གཟུངས་འཇུག་པར་ཤར་ན་བླ་མེད་ཀྱི་གཟུངས་ཀྱི་རིགས་དཔུང་མགོ་ནས་མཐེ་བོང་གི་བར་ལ་ཡས་བཅོལ་ནས་འཇུག །སྟོད་གཟུངས་སྨད་གཟུངས་རྣམས་ལ་གོས་དར་སེར་པོ་སོགས་ཀྱི་མཚམས་དར་ལེགས་པར་བཏང༌། སྐུའི་སྐྱིལ་ཀྲུང་དང་མཆོད་རྟེན་གྱི་བང་རིམ་རྣམས་ལ་རྒྱུད་སྡེ་བཞི་དང་ཐེག་པ་གོང་འོག་སོགས་གོ་རིམ་མ་འཛོལ་བར་བྱས་ཏེ། སངས་རྒྱས་ཀྱི་བཀའ་དང་དེའི་བསྟན་བཅོས་མངོན་རྟོགས་སྒྲུབ་སྐོར་ལས་ཚོགས་ཀྱི་གླེགས་བམ་ཤོག་བུའི་བར་བར་ལ་དྲི་བཟང་དང་བཅས་ནང་དྲིལ་གོས་དར་སྣ་ཚོགས་གང་འབྱོར། ཕྱི་དྲིལ་དར་སེར་པོས་བྱས། དབུ་ཤོག་ཡར་ལོག །མདུན་ངོས་ཀྱི་དབུ་རྟེན་གྱི་རྒྱབ་ཕྱོགས་སུ་ཡོད་པར་བྱས་སུག་པ་མདུན་ངོས་ལ་བསྟན་ནས་འཇོག།།གཟུངས་དང་གླེགས་བམ་གྱི་སྲུབ་སྟོང་བར་ལུས་པ་རྣམས་ཤུག་ཕྱེ་དང་སྤང་སྤོས། གཙོ་བོ་བུམ་རྫས་ཉེར་ལྔ། གཞན་ཡང་དྲི་བཟང་ཅི་འབྱོར་གྱི་ཕྱེ་མ་དར་དང་རས་སེར་པོས་ཐུམ་བུ་བྱས་ནས་འགེངས། སྐུའི་རྟེན་གྱི་པདྨའི་སྟོང་ངམ། མཆོད་རྟེན་གྱི་སེང་ཁྲིའི་སྟོད་ཀྱི་ཐད་དུ་དབུས་སུ་བཀྲ་ཤིས་པའི་ཚིགས་བཅད་ལྷུག། བཀྲ་ཤིས་པའི་གཟུངས་རྣམས་ཀྱི་ཤོག་དྲིལ། གཡས་སུ་ཆོས་སྐྱོང་བསྲུང་མ། གཡོན་དུ་དཔལ་མགོན་བདུན་ཅུ་རྩ་ལྔ། རྒྱབ་ཏུ་གནོད་སྦྱིན་ནོར་ལྷའི་གཟུངས་དང༌། ཕྱོགས་སྐྱོང་རྒྱལ་ཆེན་བཞི་གཟའ་རྒྱུ་སྐར་ལྷ་ཀླུ་ས་བདག་མཐུ་བོ་ཆེ་རྣམས་ཀྱི་སྔགས། དེ་དག་རྣམས་ཀྱི་བར་བར་དུའང་བྲ་བོ་དང་པད་ཁམ་ཡིན་པའི་འབྲུ་སྣའི་རིགས་རས་དར་སེར་པོས་བཏུམས་ཏེ་བཅུག །དར་སེར་པོས་མཚམས་བཅད་མ་ལུག་པར་བྱའོ། །ཞེས་པ་འདི་ངག་དབང་གྲགས་པས་གསོལ་བ་བཏབ་པ་བཞིན་རྗེ་བླ་མ་འཇམ་དབྱངས་བཞད་པའི་རྡོ་རྗེས་མཛད་པ་ལགས།
ཀུན་མཁྱེན་བླ་མ་འཇམ་དབྱངས་བཞད་པའི་གསུང་ལས་དྲངས།