དཔལ་ལྡན་སྨད་རྒྱུད་གྲྭ་ཚང་གི་བླ་མ་དབུ་མཛད་དམ་སྐུ་ཞབས་བླ་མ་རིམ་པར་བྱོན་པ་ལས་རྒྱུ་རྐྱེན་གཞན་གྱི་དབང་གིས་གསང་ཆེན་སྨད་རྒྱུད་པའི་མཁན་རིན་པོ་ཆེའི་ཁྲི་ལ་མ་ཕེབས་པ་རྣམས་ཀྱི་ངོ་སྤྲོད་མདོར་བསྡུས།
༈ དེའི་རྗེས་སུ་སོག་པོ་བླ་མ་དབུ་མཛད་ཅེས་ཞུ་བའི་སྐྱེས་མཆོག་འདི་སྨད་རྒྱུད་པའི་བླ་མ་དབུ་མཛད་དུ་ཕེབས་པ་ཡིན་ཏེ། འདིའི་མཚན་དངོས་ལ་སོག་པོ་ཡེ་ཤེས་ཞེས་ཞུ་ཞིང་འཁྲུངས་ས་སོག་ཡུལ། སོག་ཡུལ་ནས་བོད་གངས་ཅན་ལྗོངས་སུ་ཕེབས་ཏེ་འབྲས་སྒོ་མང་གྲྭ་ཚང་དུ་ཞུགས་ཏེ་གཞུང་ཆེན་རྣམས་བརྩོན་པ་དྲག་པོས་སྦྱངས་ཏེ་ཕྱག་དཔེ་ལེགས་གྲས་ཡིན་པ་དང་། གདན་སར་དགེ་བཤེས་ལྷ་རམས་བཏང་ཟིན་རྗེས། དཔལ་ལྡན་སྨད་རྒྱུད་གྲྭ་ཚང་དུ་རྒྱུད་ལ་ཞུགས་ཏེ་རྒྱུད་པའི་ཆོས་ཐོག་འགྲིམ་སྐབས་སེར་ར་བྱེས་གཙང་དགེ་བཤེས་མཚན་སྙན་ཅན་དགེ་ངག་དབང་དགེ་འདུན་དང་དུས་མཉམ་ཡིན་འདུག་ཅིང་། རྒྱུད་པར་སྔགས་ཀྱི་དམ་བཅའ་ཆེན་མོའི་སྐབས་རྩོད་ཟླར་སེར་བྱེས་གཙང་པ་དགེ་བཤེས་མཆོག་དང་རྩོད་ཟླར་འཁེལ་ཏེ་རྩོད་པའི་སྐབས་གསུང་ལན་ཐོགས་པ་མེད་པ་གནང་སྟེ་མཁས་པའི་གྲགས་པ་སྔ་བས་ཆེས་ཆེར་འབར།
དེ་ནས་རིང་པོར་མི་ཐོགས་པར་ལྷ་སར་དཔལ་ལྡན་སྨད་རྒྱུད་པའི་བླ་མ་དབུ་མཛད་དུ་བསྐོ་བཞག་གནང་སྟེ་བླ་མའི་མཚན་གནས་བཞེས་བཞིན་པའི་སྐབས་ཕྱི་ལོ་ ༡༩༥༩ ལོར་དུས་འགྱུར་སྐབས་ཡིན་སྐད། ལྷ་སར་རྒྱ་དམར་གྱིས་འཐབ་རྫིང་ཕོག་པའི་གྲས་ཡིན་པ་དང་། འཐབ་རྫིང་གཏོང་སྐབས་སྐྱབས་རྗེ་ཁྲི་བྱང་རིན་པོ་ཆེར་སྐྱོན་བརྗོད་བྱ་དགོས་པའི་བཙན་བཀའ་གཏོང་སྐབས་ཁོང་གིས་གསུངས་དོན་ལ། ངའི་ལུས་འདི་ཁྱེད་རང་ཚོར་དབང་བ་ཡིན་པས་གང་བྱེད་ཀྱང་འགྲིག །ངའི་སེམས་འདི་ང་རང་ལ་དབང་བ་ཡིན་པས། སྐྱབས་རྗེ་ཁྲི་བྱང་རིན་པོ་ཆེར་སྐྱོན་བརྗོད་ཚིག་ཀྱང་བརྗོད་རྒྱུ་མེད། ཁོང་གི་ཡོན་ཏན་བརྗོད་ན་ཉིན་མཚན་མང་པོར་སྦྲེལ་ཏེ་བརྗོད་ཀྱང་རྫོགས་རྒྱུ་མེད་ཅེས་གསུངས་པས་སྐབས་དེར་ཁོང་གི་མཚན་སྙན་ལྷག་པར་འབར། དེ་ནས་རིང་པོ་མི་ཐོགས་པར་ལྷ་སར་དགོངས་པ་ཞི་བར་གཤེགས་སོ། །
༡༠༠-༢] སྐུ་ཞབས་བླ་མ་དགེ་བཤེས་མཐུ་སྟོབས་དར་རྒྱས།
བླ་མ་སྐུ་ཞབས་དམ་པ་བློ་གླིང་དགེ་བཤེས་མཐུ་སྟོབས་དར་རྒྱས་དཔལ་བཟང་པོ་མཆོག་ནི། དམ་པ་འདི་བོད་ཏྲེ་ཧོར་དཀར་མཛེས་ཁུལ་གྱི་རྗེས་གཟུང་ཞེས་པའི་ལུང་པར་འ་འོག་ཏི་ཞེས་པའི་གྲོང་མིང་གི་ཡབ་ངག་དབང་རྣམ་རྒྱལ་དང་ཡུམ་པདྨ་ཆོས་སྒྲོན་གཉིས་ཀྱི་སྲས་སུ་ཕྱི་ལོ་ ༡༩༣༣ ལོར་སྐུ་འཁྲུངས། ཁོང་བྱིས་པའི་སྐབསས་ནས་གཞིས་དགོན་ཁང་དམར་དགོན་དུ་ཆོས་ཞུགས་མཛད།
ཁང་དམར་དགོན་དུ་ཞུགས་ནས་བྱིས་པའི་སྐབས་ནས་ཀློག་བསླབས། དགོན་པར་བླ་བྲང་སྟག་འོག་གཉིས་ཡོད་པ་ལས་བླ་བྲང་སྟག་མ་ཡིན་འདུག དགུང་ན་དྲུག་ཙམ་ཟིན་པ་ན་དགེ་ཚུལ་གྱི་བསླབ་སྡོན་ཞུས། རིམ་བཞིན་བསྐྱེད་བསྲིངས་ཏེ་འདོན་ཆོག་མང་དུ་ཐུགས་འཛིན་མཛད་བཞིན་པར་སྐུ་ནར་སོན་ཅིང་ཁང་དམར་དགོན་གྱི་མགོན་ཁང་པ་ཡང་གནང་། དགོན་པའི་ཕྱག་སྲོལ་ནང་འཇིགས་བྱེད་སྒྲུབ་མཆོད་སྐབས་ཀྱི་དབུ་མཛད་གནང་ཡོད་ལ། མཚན་ཉིད་ཀྱི་རྩ་བ་འགའ་ཞིག་ཀྱང་ཐུགས་འཛིན་གནང་། སྐབས་དེ་དག་ཏུ་དགོན་པར་བོད་ཡིག་སློབ་གྲྭ་ཞིག་ཟུར་དུ་བཙུགས་ཡོད་པར་དེར་བོད་ཡིག་སློབ་སྦྱོང་ཡང་གནང་།
དེའི་ཚེ་ན་དམ་པ་འདི་དབུས་གྱུར་ཆོས་ཀྱི་ཞིང་དུ་སློབ་གཉེར་ལ་ཕེབས་རྒྱུའི་ཐུགས་འདུན་ཟློག་མེད་དུ་བརྟས་ཏེ་འབྲེལ་ཡོད་ཡབ་ཡུམ་དང་དགེ་རྒན་སོགས་ལ་ཞུས་ཏེ་མཐར། འཁྲུངས་གསར་སྐུ་གོང་མའི་མོ་ལུང་གནང་བའི་འབྲས་བུར་དབུས་ཀྱི་གདན་ས་འབྲས་སྤུངས་བློ་གསལ་གླིང་དུ་ཆོས་ཞུགས་དགོས་པའི་བཀའ་ལུང་ཕེབས་དོན་ལྟར་དབུས་ཀྱི་གདན་སར་ཕེབས་རྒྱུ་ཐུགས་གཏན་འཁེལ་ཏེ། ཕེབས་རོགས་སུ་དམ་པ་འདི་ཉིད་ཀྱི་ཡབ་ཡུམ་གཅིག་པའི་སྐུ་མཆེད་སྨད་རྒྱུད་སྔགས་རམས་པ་དགེ་དོན་གྲུབ་ལགས་དང་། སྐུ་ཞོག་ནག་ཚང་རིན་པོ་ཆེ་དང་། ཁང་དམར་སྤྲུལ་སྐུ་སོགས་མི་དྲུག་བདུན་ཙམ་ཡོད་པ་རྒྱ་མིའི་སྣུམ་འཁོར་ཞིག་གླས་ཏེ་ལྷ་ས་བར་ཕེབས།
ལྷ་སར་འབྱོར་ནས་སྐུ་མཆེད་དགེ་དོན་གྲུབ་ལགས་རྒྱུད་པར་ཞུགས་ཤིང་། དམ་པ་འདི་ལོ་ལུང་ལྟར་འབྲས་བློ་གླིང་གྲྭ་ཚང་དུ་ཆོས་ཞུགས་གནང་སྟེ་བློ་གླིང་ཏྲེ་ཧོར་ཁང་ཚན་དུ་བཞུགས། བསྡུས་གྲྭ་ནས་བཟུང་གྲྭ་ཚང་གི་ཕྱག་སྲོལ་ལྟར་འཛིན་གྲྭ་རིམ་གྱིས་འགྲིམས་ནས་སློབ་གཉེར་ལ་བརྩོན་པ་ལྷུར་བཞེས་ཏེ་ཕྱག་དཔེ་ལེགས་གྲུས་སུ་ཕེབས། ཕྱི་ལོ་ ༡༩༥༩ ལོར་བོད་དུས་འགྱུར་སྐབས་བོད་མི་སྤྱི་མཚུངས་ལྟར་བཙན་བྱོལ་དུ་ཕེབས། སེ་འབྲས་དགེ་འདུན་སྤྱི་མཚུངས་ལྟར་སྦག་ས་ཆོས་སྒར་དུ་ཕེབས་འབྱོར་གནང་སྟེ་དེར་སློབ་གཉེར་མུ་མཐུད་དེ་མཛད།
ཕྱི་ལོ་ ༡༩༧༠ ལོར་སྦག་ས་ནས་མོན་གྷོ་འདོད་དགུ་གླིང་དུ་འདུས་མང་ལྷན་དུ་འབྱོར། གཞུང་ཆེན་སློབ་གཉེར་འཕྲོ་སྐྱོང་གནང་སྟེ་མཐར་དགེ་བཤེས་ལྷ་རམས་པའི་མཚན་རྟགས་བཞེས། གསང་སྔགས་ཀྱི་སློབ་གཉེར་གནང་ཆེད་དཔལ་ལྡན་སྨད་རྒྱུད་གྲྭ་ཚང་དུ་རྒྱུད་ལ་ཞུགས་ཏེ་གསང་ཆེན་རྒྱུད་སྡེ་བཞིར་གསན་བསམ་སློབ་གཉེར་སོགས་ཆོས་འགྲིམས་ལོ་གཅིག་མཛད། དམ་པ་འདི་ཕྱག་དཔེ་ལེགས་གྲས་ལ་སོང་གྲྭ་ཚང་སློབ་གཉེར་ཁང་གི་དཔེ་ཁྲིད་དགེ་རྒན་དུ་བསྐོ་བཞག་ཞུས་ཏེ་འཛིན་རིམ་དུ་མར་མདོ་སྔགས་གཉིས་ཀའི་དཔེ་ཁྲིད་ཀྱི་ཐུགས་འགན་འགྲན་ཟླ་བྲལ་བ་བཞེས་ཏེ་བསྟན་པའི་བྱ་བ་མཛད།
མཛད་སྤྱོད་གང་ཅིའི་ཐོག་ཀུན་གྱི་དམིགས་དཔེར་འོས་པ་ཡོད་སྟབས་གྲྭ་ཚང་རིན་པོ་ཆེའི་བླ་མ་དབུ་མཛད་ཀྱི་ཕྱག་རྟགས་རིན་པོ་ཆེ་ཕེབས་རྗེས། རིང་པོར་མི་ཐོགས་པར་བླ་མའི་ཁྲི་སྟོན་མཛད་དེ་གྲྭ་ཚང་གི་རྡོ་རྗེ་སློབ་དཔོན་གྱི་ཐུགས་འགན་བཞེས། འོན་ཀྱང་བླ་མའི་སྐབས་སྐུ་ཁམས་དེ་ཙམ་བདེ་ཐང་མེད་སྟབས་སྨན་ཁང་ཁག་ལ་བསྟེན་གཏུགས་རིམ་པར་ཞུས་ཀྱང་ཕན་འབྲས་མ་བྱུང་བར་བླ་མའི་མཛད་ཁུར་བཞེས་བཞིན་དུ་ཕྱི་ལོ་ ༢༠༠༢ ཀྱི་ལོ་འགོར་དམ་རང་ཉིད་ཀྱི་དགུང་གྲངས་ ༦༨ ལ་དགོངས་པ་གཞན་དུ་གཤེགས། གྲྭ་ཚང་སློབ་གཉེར་ཁང་ནས་དགོངས་རྫོགས་ཀྱི་རྗེས་འཇུག་འཐུས་གཙང་དང་ཞུགས་འབུལ་གདུང་ཐལ་བཞུགས་སུ་གསོལ་བའི་གསེར་ཟངས་ཀྱི་མཆོད་རྟེན་གསར་བཞེངས་ཞུས་ཏེ་སློབ་གཉེར་ཁང་དུ་དད་པའི་རྟེན་དུ་བཞུགས་བཞིན་པའོ། །
༩༦-༢] སྐུ་ཞབས་བླ་མ་དགེ་བཤེས་བློ་བཟང་ཚུལ་ཁྲིམས།
དམ་པ་འདི་ཕྱི་ལོ་ ༡༩༥༣ ལོར་ལ་དྭགས་ཟངས་དཀར་དུ་ཡབ་ཕུན་ཚོགས་དཔལ་བཟང་དང་ཡུམ་སྒྲོལ་མ་ལྷ་མོ་གཉིས་ཀྱི་སྲས་སུ་སྐུ་འཁྲུངས། ཕྱི་ལོ་ ༡༩༧༣ ལོར་གདས་ས་ཆེན་པོ་འབྲས་སྒོ་མང་གྲྭ་ཚང་དུ་ཆོས་ཞུགས་གནང་སྟེ་མངའ་རིས་ཁམས་ཚན་དུ་བཞུགས། འཚོ་བ་ངན་ངོན་ཙམ་བསྟེན་ནས་མཁན་ཟུར་རིན་པོ་ཆེ་བློ་བཟང་བསམ་གཏན་མཆོག་དང་། མཁན་ཟུར་རིན་པོ་ཆེ་ངག་དབང་ཉི་མ་སོགས་བཤེས་གཉེན་དུ་བསྟེན་ནས་གཞུང་ཆེན་བཀའ་པོད་ལྔ་ལ་སློབ་གཉེར་རྡོ་རུས་གཏུག་པར་གནང་སྟེ་སྒོ་མང་གྲྭ་ཚང་ཉག་ཕྲག་བའི་དུས་སུ་བཤད་སྒྲུབ་ཀྱི་རྒྱལ་མཚན་དགུང་དུ་བཏེག་ཅིང་ངུར་སྨྲིག་འཛིན་པའི་ཁྱུ་མཆོག་དམ་པར་བཞེངས།
སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་འདུས་ཚོགས་ཀྱི་དམ་གཟིགས་དང་རྩོད་རྒྱུགས་དབུ་བཞུགས་སྐབས་དམ་བཅའ་ཐེངས་མང་བཞུགས་མྱོང་བ་མ་ཟད་གཞུང་དོན་དང་མཐུན་པའི་རྩོད་ལན་འགྲན་ཟླ་བྲལ་བ་གནང་བས་༧རྒྱལ་དབང་དགྱེས་ཤིང་སྒྲུབ་པའི་མཆོད་པ་ཕུལ་བའི་གོ་སྐབས་མང་པོ་བྱུང་ཡོད། དམ་པ་ཁོང་མདོ་སྔགས་གཞུང་ལུགས་ལ་མཁས་པའི་རྩེ་མོར་སོན་སྟབས་རྗེས་འབྲང་སློབ་བུ་ཧ་ཅང་མང་ཡང་ཆེ་ཉམས་སོགས་གཏན་ནས་མི་མཛད་པར་དུས་རྟག་ཏུ་དམའ་སའི་བརྟུལ་ཞུགས་བཟུང་། ཕྱི་ལོ་ ༡༩༩༤ ལོར་༧གོང་ས་༧སྐྱབས་མགོན་ཆེན་པོའི་ཞལ་སྔ་ནས་བསྟན་པའི་གསལ་བྱེད་ཀུན་བདེ་གླིང་རྟ་ཚག་རིན་པོ་ཆེ་མཆོག་གི་ཡོངས་འཛིན་དུ་ཕྱག་རྟགས་རིན་པོ་ཆེ་སྤྱི་ཕེབས་དགོངས་དོན་ལྟར་རིན་པོ་ཆེར་སྐུ་ཡོན་འབུལ་རྒྱུ་སོགས་ཐུགས་འགན་བདག་གིར་བཞེས།
ཕྱི་ལོ་ ༢༠༡༤ སྨད་རྒྱུད་གྲྭ་ཚང་འདིའི་བླ་མའི་ཕྱག་རྟགས་ཕེབས་ཏེ་ཕྱི་ལོ་ ༢༠༡༤ ལོ་དེ་ཉིད་དུ་བླ་མའི་ཁྲི་སྟོན་གནང་སྟེ་སྨད་རྒྱུད་པའི་རྡོ་རྗེ་སློབ་དཔོན་གྱི་ཐུགས་འགན་བཞེས་ཀྱང་སྐུ་ཁམས་དེ་ཙམ་བདེ་པོ་མེད་སྟབས་ལོ་ལྟར་སྐུ་གཟུགས་བརྟག་དཔྱད་གནང་ལམ་ཡོད་པ་ལྟར་ལྡིལླིར་ཨ་པོ་ལོ་སྨན་ཁང་དུ་བརྟག་དཔྱད་གནང་དོན་ལྟར་མཆིན་པའི་བསྙུང་གཞི་ཡོད་པར་ཐོན། སྨན་བཅོས་རིམ་གྲོ་གང་གིས་ཀྱང་བསྙུང་གཞི་དྭངས་བསྐྱེད་མ་བཞེས་པར་བླ་མ་དབུ་མཛད་ཀྱི་མཛད་ཁུར་བཞེས་བཞིན་དུ་ཕྱི་ལོོ་ ༢༠༡༦ ལོར་རེ་ཞིག་དགོངས་པ་གཞན་དོན་དུ་གཤེགས། གཞི་རྩའི་ཆ་ནས་༧གོང་ས་༧སྐྱབས་མགོན་ཆེན་པོ་མཆོག་ནས་བླ་མ་དབུ་མཛད་དུ་བསྐོ་བཞག་མཛད་དེ་དམ་པ་དེ་་ཉིད་དགའ་ལྡན་ཁྲིར་ཕེབས་པའི་ཐུགས་རེ་གནང་ཡོད།
༧གོང་ས་༧སྐྱབས་མགོན་ཆེན་པོ་མཆོག་ནས་དམ་པ་འདི་དགོངས་པ་མ་གཤེགས་པའི་སྔོན་ཙམ་ལ་སྐུ་ཚེ་མ་བརྟན་པ་བྱུང་ན་སྐུ་དམར་གདུང་བཞུགས་སུ་གསོལ་དགོས་པའི་བཀའ་སློབ་ལམ་སྟོན་གནང་བ་སོགས་ཐུགས་དགྱེས་ཚུལ་བསྟན་པ་ཤིན་ཏུ་མང་ཞིང་། ༧གོང་ས་༧སྐྱབས་མགོན་༧རྒྱལ་དབང་མཆོག་གི་བཀའ་དགོངས་ལྟར་སྐྱེས་མཆོག་འདིའི་སྐུ་དམར་གདུང་ལ་དྭགས་ཟངས་དཀར་དུ་སྐྱེ་འགྲོའི་བསོད་ནམས་ཀྱི་ཞིང་དུ་བཞུགས་སུ་གསོལ་ཡོད།
༡༠༤] དཔེ་ཐུབ་དགེ་བའི་བཤེས་གཉེན་ཆེན་པོ་ཐུབ་བསྟན་རབ་རྒྱས།
འབྲས་བློ་གླིང་ལ་དྭགས་དཔེ་ཐུབ་དགེ་བའི་བཤེས་གཉེན་ཆེན་པོ་ཐུབ་བསྟན་རབ་རྒྱས་མཆོག་དཔལ་ལྡན་སྨད་རྒྱུད་པའི་བླ་མ་དབུ་མཛད་ཀྱི་ཁྲིར་ཕེབས་པ་སྟེ། སྐྱེས་མཆོག་འདི་འཁྲུངས་ཡུལ་ལ་དྭགས་རྙེ་མོ་ཡུལ་དུ་ཡབ་བཀྲིས་རབ་བརྟན་དང་། ཡུམ་རིག་འཛིན་སྒྲོལ་མ་གཉིས་ཀྱི་སྲས་སུ་ཕྱི་ལོ་ ༡༩༦༠ ཟླ་བ་ ༠༤ པའི་ནང་སྐུ་འཁྲུངས། ཆུང་གཞོན་ནུའི་དུས་ནས་དཔེ་ཐུབ་དགོན་དུ་ཆོས་སྒོར་ཞུགས་ནས། གཞིས་དགོན་དེར་དགེ་བའི་བཤེས་གཉེན་དགེ་ཐུབ་བསྟན་དབང་འདུས་ཀྱི་དྲུང་ནས་ཡོན་ཏན་ཀུན་གྱི་གཞི་མ་ཀ་ཁ་ནས་བཟུང་ཡི་གེ་འབྲི་ཀློག་དང་། ཆོས་སྤྱོད་རབ་གསལ་གང་འཚམས་ཐུགས་འཛིན་གནང་། བཤེས་གཉེན་དམ་པ་གང་དེའི་བཀའ་སློབ་ལམ་སྟོན་དང་ཐུགས་རྗེ་བཀྲིན་འོག་སློབ་གཉེར་དང་སྒྲི་ལམ་ཀུན་སྤྱོད་འཁྱེར་ཕྱོགས་གང་ཅིར་སྐྱེ་བོ་མང་པོས་བསྔགས་པའི་ཡུལ་དུ་གྱུར། ཕྱི་ལོ་ ༡༩༧༡ ལོར་དགེ་ལྡན་ཁྲི་ཆེན་རྡོ་རྗེ་འཆང་སྐྱབས་རྗེ་ཡོངས་འཛིན་གླིང་རིན་པོ་ཆེའི་ཞལ་སྔ་ནས་ཚིགས་སྔ་མ་དགེ་ཚུལ་གྱི་སྡོམ་པ་ཞུས་ཏེ་༧རྒྱལ་བའི་བསྟན་པ་ལ་རབ་ཏུ་བྱུང་།
དེ་ནས་ཕྱི་ལོ་ ༡༩༧༤ ལོར་རྒྱ་གར་ལྷོ་ཕྱོགས་གདན་ས་ཆེན་པོ་འབྲས་སྤུངས་བློ་གསལ་གླིང་གྲྭ་ཚང་དུ་གཞུང་ཆེན་སློབ་གཉེར་གནང་ཆེད་འཛུལ་ཞུགས་གནང་སྟེ་དཔེ་ཐུབ་ཁང་ཚན་དུ་བཞུགས། བློ་གླིང་མཁན་རིན་པོ་ཆེ་ཡེ་ཤེས་ཐུབ་བསྟན་དཔལ་བཟང་པོ་མཆོག་དང་། མཚན་སྙན་ཆེ་བའི་དགེ་བའི་བཤེས་གཉེན་ཆེན་པོ་དགེ་པདྨ་རྒྱལ་མཚན་དང་། དགེ་ཉི་མ་རྒྱལ་མཚན་རྣམ་གཉིས་ཀྱིས་དབུས། གཞན་ཡང་དགེ་བཤེས་བློ་བཟང་ཉི་མ་དཔལ་བཟང་པོ་ལ་སོགས་པའི་ཚད་ལྡན་གྱི་བཤེས་གཉེན་དུ་མའི་ཞབས་ལ་གཏུགས་ནས་བསམ་སྦྱོར་གཉིས་ཀྱིས་ཚུལ་བཞིན་བསྟེན་ཏེ་རིགས་པའི་སྒོ་བརྒྱ་འབྱེད་པའི་ལྡེ་མིག་བསྡུས་གྲྭ་གསུམ་དང་གྲུབ་དོན་ས་གསུམ་ནས་རིམ་བཞིན་མཚན་ཉིད་ཀྱི་གཞུང་ལ་ཉིན་མཚན་ལྟོས་མེད་དུ་སློབ་གཉེར་ལ་བརྩོན་པ་ཆུ་བོའི་རྒྱུན་བཞིན་བསླབས། ཁོང་ཉིད་དགུང་ལོ་ཉེར་གཉིས་ཙམ་ཕེབས་སྐབས་དགའ་ལྡན་ཁྲི་ཆེན་རྡོ་རྗེ་འཆང་སྐྱབས་རྗེ་ཡོངས་འཛིན་གླིང་རིན་པོ་ཆེའི་ཞལ་སྔ་ནས་ཚིགས་ཕྱི་མ་དགེ་སློང་བསླབ་སྡོམ་ཞུས་ཏེ་འདུལ་ཁྲིམས་རྣམས་མིག་འབྲས་ལྟར་བསྲུངས་པ་མ་ཟད་ཕྱི་ལྟར་དུ་ཡང་ཞི་དུལ་བག་ཡོད་ཀྱི་ཀུན་སྤྱོད་དུ་གནས། དེ་ལྟར་དགེ་ཚུལ་སློང་གཉིས་ཀ་སྐྱབས་རྗེ་གླིང་རིན་པོ་ཆེ་སྐུ་གོང་མའི་དྲུང་ནས་ཞུས་གནང་འདུག །
དེ་ནས་མུ་མཐུད་སློབ་གཉེར་མཛད་དེ་དབུ་ཕར་དང་། ཚད་མ། འདུལ་བ། མངོན་པ་སྟེ་གཞུང་ཆེན་བཀའ་པོད་ལྔ་ལ་ཐོས་བསམ་སློབ་གཉེར་ཕུ་ཐག་ཆོད་པར་སྦྱངས་པ་མ་ཟད། དགེ་ལུགས་རྒྱུགས་སྤྲོད་དུ་ཞུགས་ནས་བཀའ་རམས་དང་སློབ་དཔོན་གྱི་རྒྱུགས་སྤྲོད་ཕུལ་ཏེ་རྩེ་ཕུད་གཉིས་པའི་ཕྱག་ཁྱེར་སོན། མཐར་ཕྱི་ལོ་ ༡༩༩༤ ལོར་ལྷ་རམས་རྒྱུགས་སྤྲོད་འབུལ་སྐབས་ཤར་བྱང་གི་ཆོས་རྗེ་རྣམ་གཉིས་དང་གདན་གསུམ་གྲྭ་ཚང་དྲུག་གི་མཁན་རིན་པོ་ཆེ་རྣམ་པ་དབུ་བཞུགས་ཐོག་གཞུང་ཆེན་བཀའ་པོད་ལྔ་ནས་རྟགས་གསལ་གསུམ་རེ་བརྩིས་བསྡོམས་རྟགས་གསལ་བཅོ་ལྔའི་ཐོག་རྩོད་རྒྱུགས་ལེགས་འབུལ་གྱིས་ལྷ་རམས་ཨང་པོའི་མཚན་གནས་བཞེས་ཤིང་ཕྱག་ཁྱེར་སོན།
དེའི་རྗེས་ཕྱི་ལོ་ ༡༩༩༥ ལོར་དཔལ་ལྡན་སྨད་རྒྱུད་གྲྭ་ཚང་དུ་རྒྱུད་ལ་ཞུགས། ཁག་ཐེག་རྒན་དགེ་བློ་དབྱངས་མཆོག་གིས་གནང་བ་དང་། ཁོང་གི་ལམ་སྟོན་བཀའ་སློབ་འོག་རྒྱུད་པའི་སྒྲིག་ཁྲིམས་ཚུལ་བཞིན་འཁྱེར་བའི་ཐོག རྒྱུད་པའི་ཕྱག་བཞེས་ལྟར་ཚོགས་དང་ཆོས་ར་ཆོ་ག་ཕྱག་ལེན། ལྷག་པར་མཁན་ཆེན་རྡོ་རྗེ་འཆང་གི་དྲུང་ནས་དམ་ཆོས་འགྲེལ་བ་བཞི་སྦྲགས་ཀྱིས་དབུས་གསང་སྔགས་ཀྱི་གཞུང་ཆེན་ཁག་འཆད་ཉན་ཆད་ལུས་མེད་པར་གནང་སྟེ་རྒྱུད་པའི་འཆད་ཉན་རྣམས་བུམ་པ་གང་བྱོའི་ཚུལ་དུ་གསན་སྦྱོང་ཚུལ་བཞིན་མཛད་དེ་གསང་ཆེན་རྒྱུད་སྡེ་བཞི་ལ་མཁས་པར་སྦྱངས།
ལྷག་པར་རྒྱུད་པར་བཞུགས་སྐབས་སྤྱི་ནོར་༧གོང་ས་༧སྐྱབས་མགོན་ཆེན་པོའི་ཞལ་སྔ་ནས་གསང་བདེ་འཇིགས་གསུམ་གྱི་བཀའ་དབང་དང་ཁྲིད་སོགས་ཞུ་བའི་སྐལ་བཟང་གི་གོོ་སྐབས་ཀྱང་ཐོབ། ཟུར་འཁྲིད་དུ་དགེ་བའི་བཤེས་གཉེན་ཆེན་པོ་དགེ་བྱམས་པ་ཆོས་གྲགས་ཞིང་གཤེགས་དམ་པ་དེ་ཉིད་ཀྱི་དྲུང་ནས་རྒྱུད་ཀྱི་ཊཱིཀྐ་གཙོ་བོར་གྱུར་པའི་སྔགས་གཞུང་ཁག་ལ་དཔེ་ཁྲིད་ཧུར་བསྐྱེད་ཞུས། དེ་ནས་ཕྱི་ལོ་ ༢༠༠༢ ལོར་དཔལ་ལྡན་སྨད་རྒྱུད་པའི་དགེ་སྐོས་བཞེངས་ཏེ་གཙོ་བོར་སྒྲིག་ལམ་གནོན་སྡོམ་སོགས་འཐུས་ཤོར་མེད་པར་བསྟན་པའི་མིག་རྒྱན་དུ་ཆེ་བར་མཛད་དེ། ༢༠༠༢ ལོ་དེ་ཉིད་དུ་ཊཱིཀྐ་སྐྱོར་དཔོན་གནང་ཞིང་། ཕྱི་ལོ་ ༡༩༩༩ ལོར་སྔགས་ཀྱི་རྒྱུགས་སྤྲོད་ཕུལ་ཏེ་རྒྱུགས་སྤྲོད་ཨང་རིམ་དང་པོར་སོན་པའི་སྔགས་ཀྱི་ཕྱག་ཁྱེར་ཡང་བཞེས་པ་སོགས་ལོ་གཅིག་རྒྱུད་པའི་ཆོས་ཐོག་འགྲིམས་པ་མཐར་ཕྱིན།
ཕྱི་ལོ་ ༡༩༩༦ སྤྱི་ནོར་༧གོང་ས་༧སྐྱབས་མགོན་ཆེན་པོའི་ཞལ་སྔ་ནས་བཀའ་གསུང་སྤྱི་ཕེབས་དགོངས་དོན་ལྟར། སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེའི་མཚན་ཞབས་ཞུ་དགོས་ཕེབས་པ་ལྟར་དད་གུས་ཆེན་པོའི་ངང་དང་ལེན་ཞུས་ཏེ་མཆོག་སྤྲུལ་རིན་པོ་ཆེའི་མཚན་ཞབས་ཀྱི་སྲི་ཞུ་ཅི་ནུས་ཞུས། དེ་ནས་ལོ་ཤས་རྗེས་༧རྒྱལ་བའི་བཀའ་དགོངས་ལྟར་གླིང་མཆོག་སྤྲུལ་རིན་པོ་ཆེའི་ཡོངས་འཛིན་གྱི་འགན་ཁུར་བླང་དགོས་པའི་བཀའ་ཡི་མེ་ཏོག་མགུལ་བའི་རྒྱན་དུ་བཀོད་པ་ལྟར་འདི་ལྟ་བུའི་སྐལ་བ་བཟང་སྙམ་དུ་རྒྱན་དུ་བླངས་ཏེ་ཉིན་མཚན་ལྟོས་མེད་ཀྱིས་ཞབས་ཞུ་བསྒྲུབ་ཁུལ་གྱི་དམིགས་ཡུལ་གཙོ་བོ་ནི། ༧རྒྱལ་བའི་བཀའ་དགོངས་སྤྱི་དང་ལྷག་པར་མཆོག་སྤྲུལ་རིན་པོ་འདི་ཉིད། སྐྱབས་རྗེ་དམ་པ་གོང་མའི་རྣམ་ཐར་ཇི་བཞིན་སྐྱོང་བཞེས་ཐུབ་ཏེ་བསྟན་འགྲོའི་དཔལ་མགོན་མཚུངས་མེད་དུ་འགྱུར་སླད་ཞབས་ཞུ་ནུས་པ་ཅི་ཡོད་བསྒྲུབས་པ་ལྟར་གླིང་མཆོག་སྤྲུལ་རིན་ཆེ་གསན་བསམ་མཛད་ལུགས་དང་། ཉིན་ཞག་ཕྲུགས་གཅིག་གི་མཛད་བཟང་མཇལ་བས་ཡིད་རབ་ཏུ་དད་ཅིང་ལུས་ཀྱི་བ་སྤུ་ལྡང་པའི་དད་གུས་དབང་མེད་དུ་འཁྲུངས་ཤིང་ད་ལྟ་མཆོག་སྤྲུལ་འདི་ཉིད་བསྟན་འགྲོའི་དཔལ་མགོན་དུ་བཞེངས་ཤིང་མཛད་འཕྲིན་ཕྱོགས་མཐར་རྒྱས་བཞིན་པ་འདི་ལགས་སོ། །
གཞན་ཡང་བསྟན་པའི་སྣང་བྱེད་མཚུངས་མེད་སྐྱབས་མཆོག་བ་ཀུ་ལ་རིན་པོ་ཆེའི་ཆུང་སྲིད་རིན་པོ་ཆེས་དབུས་དཔེ་ཐུབ་དགོན་གྱི་མཚན་ཉིད་སློབ་གཉེར་བ་རྣམས་དང་། ཁང་ཚན་གཞན་གྱི་སློབ་གཉེར་བ་གང་འཚམས་ཤིག་ལའང་སྔ་ཕྱི་ཁྱོན་བསྡོམས་ལོ་ངོ་ ༢༧ ལྷག་གཞུང་ཆེན་དཔེ་ཁྲིད་འགན་ཁུར་ཆེན་པོ་བཞེས་ཏེ་སློབ་གཉེར་བ་མང་པོ་ཞིག་ཕྱག་དཔེ་ལེགས་གྲས་སུ་ཐོན་པའི་གྲུབ་འབྲས་སོན། དེ་དང་ཆབས་ཅིག་ཁང་ཚན་གྱི་སློབ་གཉེར་བ་རྣམས་ཀྱི་སློབ་གཉེར་གོང་འཕེལ་ཆེད་ཀྱི་ལས་དོན་ཐོག་ཐུགས་ཁུར་ཡང་འགྲན་ཟླ་བྲལ་བ་བཞེས་ཡོད།
དེ་ནས་བོད་རབ་བྱུང་བཅུ་བདུན་པའི་ཆུ་ཡོས་བོད་ཟླ་བ་ ༡༠ ཚེས་ ༡༦། ཕྱི་ལོ་ ༢༠༢༣ ཟླ་བ་ ༡༡ ཚེས ༢༨ འཁོད་པའི་༧གོང་ས་༧སྐྱབས་མགོན་ཆེན་པོའི་ཞལ་སྔ་ནས་བཀའ་ཡིག་རིན་པོ་ཆེ་ཕྱག་རྟགས་སྦྲགས་མ་སྤྱི་བོའི་རྒྱན་དུ་ཕེབས་པའི་དགོངས་དོན་ལྟར། དཔལ་ལྡན་སྨད་རྒྱུད་གྲྭ་ཚང་འདིའི་བླ་མ་དབུ་མཛད་དུ་བསྐོ་བཞག་བསྩལ་ཏོ། །
དེ་ནས་མི་རིང་བར་བླ་མའི་ཁྲི་སྟོན་གནང་བ་སྟེ་དེ་ཡང་བོད་རྒྱལ་ལོ་ ༢༡༥༠ རབ་གནས་མེ་ཡོས་ཟླ་བ་ ༡༢ ཚེས་ ༠༤། ཕྱི་ལོ་ ༢༠༢༤ ཕྱི་ཟླ་ ༠༡ ཚེས་ ༡༥ སྟེ་གཟའ་སྐར་འཕྲོད་སྦྱོར་རབ་ཏུ་དགེ་བའི་ཉིན་དཔལ་ལྡན་སྨད་རྒྱུད་པའི་བླ་མ་དབུ་མཛད་ཀྱི་བཞུགས་ཁྲིར་མངའ་གསོལ་བའི་རྟེན་འབྲེལ་མཛད་སྒོ་གྲ་རྟེན་ཕུན་སུམ་ཚོགས་པར་བསྐྱངས། དེ་ནས་བཟུང་གྲྭ་ཚང་རིན་པོ་ཆེའི་རྡོ་རྗེ་སློབ་དཔོན་མཛད་ཅིང་ཆོས་སྲིད་གཉིས་ཀྱི་ཐུགས་འགན་བདག་གིར་བཞེས་ཏེ་བསྟན་པའི་བྱ་བ་མཛད་པ་འདི་ལགས་སོ། །