དཔལ་ལྡན་སྨད་རྒྱུད་གྲྭ་ཚང་གི་མཁན་རབས་རིམ་པར་བྱོན་པ་ལས་གདན་ས་ཁག་དང་གྲྭ་ཚང་གཞན་གྱི་མཁན་པོར་ཕེབས་པ་རྣམས་ཀྱི་མཚན་ཐོ་དང་། དཔལ་ལྡན་སྨད་རྒྱུད་གྲྭ་ཚང་གི་དགེ་འདུན་པའི་ཁྲོད་ནས་དགོན་པ་གང་རུང་གི་མཁན་པོར་རིམ་པར་ཕེབས་པ་རྣམས་ཀྱི་མཚན་ཐོ། དཔལ་ལྡན་སྨན་རྒྱུད་གྲྭ་ཚང་ནས་ཕེབས་པའི་གྲྭ་ཚང་གཞན་གྱི་མཁན་པོའི་ངོ་སྤྲོད།
རབ་བྱུང་བརྒྱད་པའི་ཆུ་བྱ་༡༤༥༣ལོར།དབུས་ཀྱི་སྟོད་ལུང་མདའི་ཞིང་བཟང་དུ་འཁྲུངས།སྐུུ་ན་ཆུང་དུས་ནས།གདན་ས་འབྲས་སྤུངས་བཀྲ་ཤིས་སྒོ་མང་གྲྭ་ཚང་དུ་ཆོས་ཞུགས་གནང༌།རབ་འབྱམས་སྨྲ་བ་གུང་རུ་རིན་ཆེན་བྱང་ཆུབ་ལས་རབ་ཏུ་བྱུང་བའི་མཚན་ལ་རིན་ཆེན་འོད་ཟེར་ཞེས་བཏགས།རྗེ་རིན་ཆེན་བྱང་ཆུབ་དེ་ཉིད་ལས་དབུ་ཕར་དང༌།
དགའ་ལྡན་ཁྲི་ཐོག་བཅུ་པ་བློ་གླིང་པ་འདན་མ་ཆོས་རྗེ་ཡེ་ཤེས་བཟང་པོ་ལས་རྣམ་འགྲེལ་དང་འདུལ་མཛོད་བཅས་བཀའ་ཆེན་ལྷག་མ་རྣམས་གསན་པས་མཁས་པའི་ཕུལ་དུ་ཕྱིན་པར་གྱུར།གསང་ཆེན་སྨད་རྒྱུད་གྲྭ་ཚང་དུ་ཞུགས་ཏེ།རྒྱུད་རྒྱུད་ཆེན་ཚུལ་ཁྲིམས་བཟང་པོ་ལས་འདུས་པའི་རྩ་བཤད་ཀྱི་རྒྱུད་རྣམས་དང་།ཁྲིད་ཆེན་བརྒྱད།བསྐྱེད་རྫོགས།ཊཱིཀྐ་ལ་སོགས་པ་རྣམས་དང་།གཤེད་སྐོར་གྱི་རྒྱུད་འགྲེལ་སོགས་ལ་སྦྱངས་པས་མདོ་སྔགས་ཡོངས་སུ་རྫོགས་པའི་མཁས་པར་གྱུར།དབུས་སྟོད་ཉེ་སྡིངས་སུ་དྲུང་པ་གཟིགས་ཆེན་པས་མཁན་པོ་དང༌།འོད་སྲུང་བས་ལས་སློབ།བློ་གྲོས་ཆོས་དབང་པས་གསང་སྟོན་མཛད་དེ་དགེ་འདུན་གྲངས་ཚང་པའི་དབུས་སུ་བསྙེན་པར་རྫོགས།དགུང་ལོ་ཞེ་དྲུག་པ་རབ་བྱུང་བརྒྱད་པའི་ས་རྟ་༡༤༩༨ལོར་སྨད་རྒྱུད་མཁན་ཁྲིར་ཕེབས་ཏེ་སྔར་སྲོལ་བཞིན་རྒྱུད་ཀྱི་འགྲེལ་བཤད་དང་བསྐྱེད་རྫོགས་སོགས་འཆད་ཉན་རྣམས་མ་ཉམས་པར་མཛད་མུར།དགུང་ལོ་ང་དགུ་པ་རབ་བྱུང་དགུ་པའི་ལྕགས་ལུག་༡༥༡༡ལོར་བྱང་རྩེ་ཆོས་རྗེའི་ཁྲིར་ཕེབས།
དགུང་གྲངས་རེ་བཞི་པ་རབ་བྱུང་དགུ་པའི་མེ་བྱི་༡༥༡༦ལོར་བསྟན་རྩིས་གསལ་བའི་སྒྲོན་མེ་ཞེས་པ་མཛད།
དགུང་ལོ་བདུན་ཅུ་པ་ཆུ་རྟ་༡༥༢༢ལོར་འཇམ་མགོན་རྒྱལ་བ་གཉིས་པའི་གསེར་ཁྲིར་ཕེབས་ཏེ།ལོ་བརྒྱད་ཀྱི་བར་དུ་དབྱར་དགུན་མཛད་རིམ་རྣམས་ཆག་མེད་དུ་མཛད་པ་དང་།མཁས་བཙུན་བཟང་གསུམ་ཡ་མ་བྲལ་བའི་ངང་ནས་གདན་ས་ཆེན་པོ་ཚུལ་བཞིན་དུ་བསྐྱངས་ཤིང་རྒྱལ་བ་འོད་དཔག་མེད་ཀྱི་གསེར་སྐུུ་སྐུུ་རྒྱབ་མཐོ་བཅུ་དྲུག་གི་ཚོད་ཅན་གསར་བཞེངས་མཛད།དགུང་ལོ་དོན་བདུན་པ་ས་གླང་༡༥༢༩ལོར་པཎ་ཆེན་བསོད་ནམས་གྲགས་པ་ཁྲི་ཚབ་ཏུ་མངའ་གསོལ་ནས་རང་ཉིད་གསེར་ཁྲི་ལས་ཟུར་ཏེ་སྲས་ཁང་དགོན་དུ་ཟུར་བཞུགས་གནང༌།དགུང་ལོ་གྱ་བརྒྱད་པ་ལྕགས་བྱི་༡༥༤༠ལོར་སྲས་ཁང་དགོན་དུ་སྐུ་ཞི་བར་གཤེགས།བཀའ་རྩོམ་ལ།ཆོས་འབྱུང་གསལ་བའི་སྒྲོན་མེ་སོགས་སྣང་ཞིང༌།གསུང་ལས་སྐྱེས་པའི་སློབ་མ་ནི།ཁྲི་ཆེན་ཆོས་སྐྱོང་རྒྱ་མཚོ།ཁྲི་ཆེན་རྒྱལ་མཚན་བཟང་པོ།ཁྲི་ཆེན་ཆོས་གྲགས་བཟང་པོ་སོགས་མང་དུ་བྱོན།