གདན་རབས་རིམ་བྱོན་གྱི་མཚན་ཐོ། རྗེ་བཙུན་ཤེས་རབ་སེང་གེས་དཔལ་ལྡན་སྨད་རྒྱུད་གྲྭ་ཚང་ཕྱག་བཏབ་པ་ནས་ད་ལྟའི་ [ ༢༠༢༣ ] བར་དུ། འཆད་ཉན་གྱི་བླ་རབས་སམ་གདན་རབས་རིམ་པར་བྱོན་ཏེ་སྔར་སྲོལ་རྒྱུད་འགྲེལ་ཆེན་མོ་སོགས་ཀྱི་འཆད་ཉན་གྱི་རྒྱུན་གང་ཡོད་མི་ཉམས་རྒྱུན་འཛིན་དང་གོང་སྤེལ་གནང་བ་སོགས་ཀྱིས་མཚོན་བསྟན་འགྲོའི་དོན་རླབས་ཆེན་མཛད་པའི་གྲྭ་ཚང་གི་གདན་རབས་རིམ་བྱོན་གྱི་སྐོར་རམ་ངོ་སྤྲོད་བཞུགས།
༡༣] རྒྱུད་ཆེན་བྱམས་པ་རྒྱ་མཚོ། [ བྱང་ཆོས་དང་། དགའ་ལྡན་ཁྲིར་ཕེབས། ]
བྱམས་པའི་ཐུགས་ཀྱིས་གདུལ་བྱ་རྗེས་སུ་འཛིན། །ལེགས་སྦྱངས་མཁྱེན་པའི་རྒྱ་མཚོའི་གཏིང་མཐའ་མེད། །
རྣམ་དག་བཟང་པོའི་རླབས་ཆེན་ཕྱོགས་བཅུར་གཡོ། །མཁས་མཆོག་དགེ་བའི་བཤེས་ལ་གསོལ་བ་འདེབས། །
ཞེས་གསུངས་པ་ལྟར། དེའི་རྗེས་སུ་རྒྱུད་ཆེན་བྱམས་པ་རྒྱ་མཚོ་སྨད་རྒྱུད་པའི་ཁྲིར་ཕེབས་པ་ཡིན་ཏེ། འདི་ནས་རྗེ་ཙོང་ཁ་ཆེན་པོ་གཤེགས་ནས་ལོ་གོ་བརྒྱད་སོང་བའི་རབ་བྱུང་དགུ་པ་མེ་ཕོ་བྱི་བའི་ལོ། ཕྱི་ལོ་ ༡༥༡༦ ལོར་ཞོག་གིི་གྲག་གུར་ཞེས་པར་སྐུ་འཁྲུངས། རྒྱལ་བ་བྱམས་པའི་སྤྲུལ་པར་མཁས་པ་སྟག་ལུང་པས་གསུངས། སྟག་རྩེ་རིན་ཆེན་སྒང་དུ་རབ་བྱུང་མཛད། དགེ་བའི་བཤེས་གཉེན་མང་པོའི་དྲུང་ནས་གཞུང་ལུགས་མང་པོ་གསན་པས་མཁས་བཙུན་གྱིས་གྲགས་པས་ཁྱབ།
དཔལ་ལྡན་སྨད་རྒྱུད་དུ་བྱོན་ནས་རྗེ་ཆོས་གྲགས་བཟང་པོ་དང་། ནམ་མཁའ་གྲགས་གཉིས་ཀའི་དྲུང་ནས་བདེ་གསང་གི་རྒྱུད་འགྲེལ་འགྲེལ་བཤད་བསྐྱེད་རྫོགས་ཀུན་དང་། ཁྲི་ཆེན་བརྒྱད། རྡོ་རྗེ་འཇིགས་བྱེད་ཀྱི་རྒྱུད་ཀྱི་འགྲེལ་པ་དང་འགྲེལ་བཤད་བསྐྱེད་རྫོགས་སོགས་མན་ངག་རྣམས་གསན་པས། མདོ་སྔགས་གཉིས་ཀ་ལ་མཁས་པའི་ངེས་པ་རྣམ་དག་ཐུགས་ལ་མངའ་བའི་རྡོ་རྗེ་འཛིན་པ་ཞིག་ཡིན། སྐབས་དེར་རྗེ་དགེ་འདུན་རྒྱ་མཚོའི་འཇིགས་བྱེད་སྨོན་ལམ་གྱི་ཊཱིཀྐ་རིམ་གཉིས་ལེགས་པར་ཚང་བ་གཅིག་བརྩམས་པ་ཁྲི་དཀོན་མཆོག་ཆོས་འཕེལ་དང་། ཀུན་མཁྱེན་འཇམ་དབྱངས་བཞད་པ་སོགས་ཀྱིས་ལེགས་བཤད་དུ་བཞེད། སྒོམ་སྡེ་ནམ་རྒྱན་གྱིས་ཀྱང་དེ་གཞིར་བཞག་ནས་འཇིགས་བྱེད་སྨོན་ལམ་གྱི་ཊཱིཀྐ་མཛད།
དེ་ནས་དམ་པ་འདི་རྒྱུད་སྨད་ཀྱི་ཁྲིར་ཕེབས། རྒྱུད་གསུམ་དང་འགྲེལ་པ་འགྲེལ་བཤད་བསྐྱེད་རྫོགས་བཞི་མན་ངག་དང་བཅས་པ་ལོ་བསྟར་ཆགས་སུ་གནང་བཞིན་པའི་ངང་བྱང་རྩེ་དང་སྟག་རྩེ་རིན་ཆེན་སྒང་གི་བླ་མ་མཛད། དགུང་ལོ་དྲུག་ཅུ་ཤིང་ཕག་ལོར་ལྷ་མི་ཀུན་གྱི་གཙུག་རྒྱན་འཇམ་མགོན་༸རྒྱལ་བ་གཉིས་པའི་མི་འཇིགས་གདོང་ལྔས་བཏེག་པའི་གསེར་གྱི་ཁྲིར་ཕེབས། རབ་བྱུང་བསྙེན་རྫོགས་གྲངས་ལས་བརྒལ་བའི་མཁན་པོ་མཛད་ཅིང་། གངས་ཅན་གྱི་མཐའ་འཁོབ་པའི་འདྲེན་པ་ཆེན་པོ་ཁམས་གསུམ་འགྲོ་བའི་བླ་མ་རྒྱལ་བ་བསོད་ནམས་རྒྱ་མཚོ་སོག་པོའི་རྒྱལ་པོ་ཆ་གན་ཨལ་ཐན་གྱིས་བྱང་པྱོགས་གྱི་སྐྱེ་འགྲོ་མང་པོའི་མགོན་དུ་སོག་ཡུལ་དུ་གདན་དྲངས་པའི་ཤུལ་དུ་ལྷ་སའི་སྨོན་ལམ་ཆེན་མོའི་གྲལ་དབུ་མཛད།
དགུང་ལོ་རེ་བདུན་པ་ཆུ་རྟ་ལ་མངོན་དགའ་རུ་ཟུར་བཞུགས་མཛས་པས་ཁྲི་ཆེན་མངོན་དགའ་བར་ཡང་གྲགས། སྟག་རྩེ་རིན་ཆེན་སྒང་ལ་ཕག་མོའི་དམག་ཕོག་པས། ཆོས་སྡེ་གུར་སྨོན་དུ་སྤོས་ནས་དར་རྒྱས་ཆེ་བར་མཛད། དགུང་ལོ་དོན་ལྔ་པ་ལྕགས་སྟག ཕྱི་ལོ་ ༡༥༩༠ ལ་ཞི་བར་གཤེགས། དངུལ་གདུང་མཆོད་ཁང་གསར་མའི་ནང་བཞུགས་སུ་གསོལ། དེའི་སྐུ་སྐྱེ་གཙང་པ་བཀྲིས་དང་ཁམས་མོ་སྒྲོལ་མ་གཉིས་ཀྱི་སྲས་སུ་འཁྲུངས་ནས་རྒྱུད་ཆེན་རྣམ་རྒྱལ་དཔལ་བཟང་གིས་རབ་ཏུ་བྱུང་སྟེ་མཚན་དགེ་འདུན་དཔལ་བཟང་རྒྱ་མཚོར་གསོལ་བ་སེར་སྨད་དུ་ཐུགས་གཉེར་མཛད། ལོ་བཅོ་ལྔའི་དུས་སུ་སོག་ཡུལ་དུ་ཕེབས་ནས་འགྲོ་དོན་བཟང་པོ་བྱུང་སྣང་།
རབ་འབྱམས་མདོ་སྔགས་ཆོས་ཀྱི་ཁང་བཟང་ལས། །བཀྲིས་མན་ངག་གཏེར་གྱི་སྒོ་ཕྱེ་ནས། །
སྐལ་བཟང་གདུལ་བྱའི་རེ་སྐོང་ཆོས་ཀྱི་རྗེ། །ཡོངས་འཛིན་བཟང་པོའི་ཞབས་ལ་གསོལ་བ་འདེབས། །
ཞེས་གསུངས་པ་ལྟར། དེའི་རྗེས་སུ་མངའ་རིས་པ་བཀྲིས་བཟང་པོ་སྨད་རྒྱུད་པའི་ཁྲིར་ཕེབས་་པ་ཡིན་ཏེ། དེ་ཡང་རྗེ་བྱམས་པ་རྒྱ་མཚོ་སོགས་བསྟེན་ནས་མདོ་སྔགས་ལ་མཁས་པའི་བཤེས་གཉེན་ཆེན་པོར་གྱུར། སྨད་རྒྱུད་ཀྱི་འཆད་ཉན་ཡང་མི་ཐུང་བ་ཞིག་མཛད་པ་ཡིན་སྣང་། རྒྱུད་ཆེན་དགེ་འདུན་རྒྱལ་མཚན་སོགས་ཀྱིས་དམ་པ་འདིའི་དྲུང་ནས་རྒྱུད་འགྲེལ་ཆ་ལག་དང་བཅས་པ་གསན་པའི་ཡོངས་འཛིན་དུ་གྱུར། འཁྲུངས་གཤེགས་ཀྱི་ལོ་ཚིགས་ནི་མ་བརྙེད། བྱང་རྩེ་དང་གདན་སར་ཕེབས་པ་མི་གསལ་བས་བར་དེར་སྐུ་གཤེགས་པ་སྣང་ངོ་།།
༡༥] རྗེ་དགེ་འདུན་རྒྱལ་མཚན། [ བྱང་ཆོས་དང་། དགའ་ལྡན་ཁྲིར་ཕེབས། ]
རྣམ་དཀར་དགེ་ཚོགས་དུ་མས་བསྐྲུན་པའི་སྐུ། །འདུན་ལྡན་ཡིད་ཀྱི་རེ་བ་སྐོང་བའི་གསུང་། །
དཔག་ཡས་མདོ་རྒྱུད་མཐའ་དག་མཁྱེན་པའི་ཐུགས། །ཐུབ་བསྟན་རྒྱལ་མཚན་འཛིན་ལ་གསོལ་བ་འདེབས། །
ཞེས་གསུངས་པ་ལྟར། དེའི་རྗེས་སུ་སྨད་རྒྱུད་པའི་མཁན་ཁྲིར་རྗེ་དགེ་འདུན་རྒྱལ་མཚན་ཕེབས། དམ་པ་འདི་ནི་རྗེ་བདག་ཉིད་ཆེན་པོ་གཤེགས་ནས་ལོ་བརྒྱ་དང་བཅུ་བཞི་སོང་བ་རབ་བྱུང་དགུ་པའི་ཆུ་ཕོ་འབྲུག ཕྱི་ལོ་ ༡༥༣༢ ལ་ལྷ་སའི་ལུམ་པ་ཤག་ཏུ་སྐུ་འཁྲུངས། དགུང་གྲངས་བཅུ་གཅིག་པ་ལ་སྐུ་མཆེད་གསུམ་ག་སེ་རའི་ཁྲི་པ་རྗེ་བཙུན་ཆོས་ཀྱི་རྒྱལ་མཚན་དང་བྱེས་པ་མཁན་པོ་ཤེས་རབ་སེངྒེ་ལས་རབ་ཏུ་ བྱུང་། རྗེ་འདི་པས་བྱེས་པ་གྲྭ་ཚང་དུ་བཀའ་ཆེན་རྣམས་ལ་གསན་བསམ་མཛད་པས་མཁས་པར་གྱུར།
རྒྱལ་བའི་དབང་པོ་ཐམས་ཅད་མཁྱེན་པ་བསོད་ནམས་རྒྱ་མཚོས་མཁན་པོ་དང་། མངའ་རིས་པ་ལྷ་བཙུན་བསོད་ནམས་དཔལ་བཟང་གིས་ལས་སློབ་མཛད་ནས་དགེ་འདུན་གྲངས་ཚང་བའི་དབུས་སུ་བསྙེན་པར་རྫོགས། སྨད་རྒྱུད་གྲྭ་ཚང་དུ་བྱོན་ནས་རྒྱུད་ཆེན་བཀྲིས་བཟང་པོ་དང་། ཆོས་རྗེ་བྱམས་པ་རྒྱ་མཚོ་སོགས་བསྟེན་ནས་སྔགས་ཕྱོགས་ཀྱི་གཞུང་ཆེན་རྣམས་ལ་སྦྱངས་པས་ཆུ་བོ་གངྒ་ཚུན་ཆད་ལ་མཁས་སྙན་གྱིས་ཁྱབ། དགུང་གྲངས་ཞེ་གསུམ་པ་ཤིང་ཕག་ཕྱི་ལོ་ ༡༥༧༥ ལ་སྨད་རྒྱུད་ཀྱི་བླ་མར་ཕེབས་ཏེ། རིམ་པས་མཁན་པོར་ཕེབས་ནས་དགུང་ལོ་ང་བདུན་གྱི་བར་དུ་འཆད་ཉན་ཤིན་ཏུ་དར་རྒྱས་མཛད། གྲྭ་ཚང་འཆད་ཉན་རིམ་ལྔ་དམར་ཁྲིད་ཁྲི་ཁང་བརྩི་བཞག་འདི་ཡང་རྗེ་འདིས་ཡི་གེར་བཀོད་། དེ་ནས་ས་གླང་ལོར་བྱང་རྩེ་ཆོས་རྗེའི་གོ་སར་ཕེབས།
དོན་གཉིས་པ་ལྕགས་གླང་ལོར་ལྷ་དང་བཅས་པའི་འཇིག་རྟེན་གྱི་གཙུག་རྒྱན་དགའ་ལྡན་གསེར་ཁྲིར་ཕེབས། འཕགས་མཆོག་འཇིག་རྟེན་དབང་ཕྱུག་གི་རྣམ་སྤྲུལ་ཐམས་ཅད་མཁྱེན་པ་རྗེ་ཡོན་ཏན་རྒྱ་མཚོ་སོག་ཡུལ་ནས་དབུས་སུ་ཕེབས་པ་དང་རབ་བྱུང་གི་མཁན་པོ་མཛད། སྟོང་སྐོར་སྤྲུལ་སྐུ་ཡོན་ཏན་རྒྱ་ཚོས་དམ་པ་འདིར་བཀའ་ཆོས་མང་དུ་གསན་སའི་བླ་མར་གྱུར། ལ་མོའི་ས་ཁོང་ནས་དགའ་ལྡན་དུ་དབྱར་ཞལ་བཞེས་པ་རྣམས་ལ་ལོ་རེ་བཞིན་མང་ཇ་ཆག་མེད་དུ་གཏོང་རྒྱུའི་ཐེབས་རྩ་འཇོག་གནང་མཛད། དགུང་ལོ་དོན་དྲུག་ལ་ཟུར་བཞུགས་མཛད་སྐབས་མྱ་ངན་ལས་འདས། སྐུ་གདུང་རིང་བསྲེལ་གྱི་ཕུང་པོར་གྱུར་པ་ལ་དངུལ་གདུང་བཞེངས་པ་དགའ་ལྡན་དུ་བཞུགས་སུ་གསོལ།
གསུང་གི་བདུད་རྩི་ལ་འཁོར་བའི་བུ་སློབ་ཀྱང་བདེ་ཆེན་ཆོས་ཀྱི་རྒྱལ་པོ་མཐུ་སྟོབས་ཡོན་ཏན་རྒྱ་མཚོ་དང་། པཎ་ཆེན་ཐམས་ཅད་མཁྱེན་པ་བློ་བཟང་ཆོས་ཀྱི་རྒྱལ་མཚན། ཟི་ལིང་སྟོང་སྐོར་སྤྲུལ་སྐུ་དང་། དགེ་བའི་བཤེས་གཉེན་མདོ་སྔགས་ཀྱི་བསྟན་པའི་བདག་པོ་མང་དུ་བྱུང་སྟེ། རྒྱུད་ཆེན་རྣམ་རྒྱལ་དཔལ་བཟང་། གཞུ་ཁང་པ་དགེ་ལེགས་ལྷུན་གྲུབ། རྗེ་ཕ་བོང་ཁ་པ་དཔལ་འབྱོར་ལྷུན་གྲུབ་དང་། མཁས་པ་ཀུན་གྱི་ཡང་རྩེ་སྟང་ལུང་བྲག་པ་བློ་གྲོས་རྒྱ་མཚོ་སོགས་མང་དུ་བྱུང་། པཎ་ཆེན་བློ་བཟང་ཆོས་རྒྱན་ཁོང་རྒྱལ་དབང་ཡོན་ཏན་རྒྱ་མཚོ་ལ་བཀའ་ཆོས་འབུལ་མཁན་གནང་ན་ཞེས། རྗེ་འདིས་དགོངས་འཆར་ཕུལ་བ་ཡིན་ཞེས་བཻ་སེར་དུ་གསལ།
རྣམ་མང་མདོ་རྒྱུད་རལ་པའི་ཁུར་འཆང་ཞིང་། །ཕྱོགས་ལས་རྣམ་རྒྱལ་རིགས་པའི་གད་རྒྱངས་ཅན། །
བསླབ་གསུམ་གངས་རི་འཛིན་པ་ཀུན་གྱི་དཔལ།། མཁས་བཙུན་བཟང་པོའི་ཞབས་ལ་གསོལ་བ་འདེབས། །
ཞེས་པ་ལྟར། དེའི་རྗེས་སུ་སྨད་རྒྱུད་པའི་ཁྲིར་མཁས་ཤིང་གྲུབ་པའི་དབང་ཕྱུག་ཆེན་པོ་རྗེ་རྣམ་རྒྱལ་དཔལ་བཟང་བྱོན་པ་ཡིན་ཏེ། དམ་པ་འདི་རབ་བྱུང་དགུ་པ་ལྕགས་གླང་། ཕྱི་ལོ་ ༡༥༤༡ ལོར་གཙང་རྟ་ནག་ཏུ་སྐུ་འཁྲུངས། རྗེ་བདག་ཉིད་ཆེན་པོ་གཤེགས་ནས་ལོ་བརྒྱ་དང་ཉེར་གསུམ། རྗེ་ཤེས་རབ་སངྒེ་གཤེགས་ནས་ལོ་གོ་བརྒྱད་སོང་བ་དེ་ཡིན། ཐོག་མར་དཔལ་འཁོར་ཆོས་སྡེར་རབ་ཏུ་བྱུང་། དེ་ནས་བཀྲས་ལྷུན་ཤར་རྩེ་གྲྭ་ཚང་དུ་ཞུགས། པཎྚི་ཏ་བློ་གྲོས་ལེགས་བཟང་ལ་བཀའ་ཆེན་རྣམས་གསན་ཏེ་བཀའ་བཅུའི་གྲྭ་སྐོར་མཛད། རྒྱལ་བ་དབེན་ས་པའི་ཞབས་ལ་གཏུགས་ནས་མདོ་སྔགས་ཀྱི་ལམ་རིམ་གསུམ་དང་གསང་བདེ་འཇིགས་གསུམ་གྱི་ཟབ་ཁྲིད་མང་པོ་གསན་ཏེ་བསྒོམས་པས་ཉམས་རྟོགས་ཁྱད་པར་ཅན་འཁྲུངས།
ལན་ཅིག་བླ་མའི་ཞལ་ནས་བཀའ་བཅུ་པས་བཀྲིས་ལྷུན་པོར་བྱོན་ནས་པུ་ཏི་ལྷག་མ་རྣམས་བསླབས་ཏེ་རབ་འབྱམས་པའི་གྲྭ་སྐོར་མཛོད་དང་རྗེ་རིན་པོ་ཆེའི་བསྟན་པ་ལ་ཕན་ཐོགས་པ་ཞིག་འབྱུང་བ་འདུག་གསུངས་པ་ལྟར། སླར་བཀྲིས་ལྷུན་པོར་བྱོན་ནས་བཀའ་ཆེན་རྣམས་ལ་བསྐྱར་སྦྱོང་མཛད་ནས་ངམ་རིང་དང་དཔལ་འཁོར་ཆོས་སྡེ་གཉིས་སུ་རབ་འབྱམས་པའི་གྲྭ་སྐོར་གནང་སྟེ། དཔལ་འཁོར་ཆོས་སྡེའི་ལྷ་ཁང་གྲྭ་ཚང་གི་བླ་མ་ཡང་མཛད། གྲྭ་ཁང་ལ་ཞིག་གསོ་མཛད་སྐབས་ས་མེན་སྐོ་བའི་ཕུག་པ་གས་ནས་འགྲོ་མི་ནུས་ཚེ། རྗེ་འདིས་ཁྱེད་རང་ཚོས་ས་སྐོས་ཤིག་ངས་བཟུང་གི་གསུངས་ཏེ། ཕུག་པའི་གས་མཚམས་སུ་ཞབས་ཀྱིས་མནན་ཏེ་ཏིང་ངེ་འཛིན་བརྟན་པོས་མནན་པས་ཕུག་པ་མ་བརྡིབས། དེ་ནས་གྲྭ་པ་ཕྱིར་ཐོན་པ་དང་ཞབས་བསྡུས་ནས་བྱོན་པས་དེ་མ་ཐག་ཕུག་པ་དེ་ཞིག་པས་ཀུན་གྱིས་གྲུབ་རྟགས་ཡིན་པར་ཤེས་ནས་ངོ་མཚར་ཆེ་བར་མཛད།
པཎ་ཆེན་རིག་པའི་སེངྒེ་བསྟེན་ནས་མཁས་གྲུབ་ཐམས་ཅད་མཁྱེན་པ་དང་། རྗེ་བློ་གྲོས་ཆོས་སྐྱོང་ཡབ་སྲས་ཀྱིས་མཛད་པའི་རྡོ་རྗེ་འཇིགས་བྱེད་ཀྱི་སྐོར་མ་ལུས་པ་གསན་ཅིང་། བསྐྱེད་རྫོགས་ཀྱི་རྣམ་བཤད་ཆེན་མོའི་ལུང་གདམས་པ་དང་བཅས་པ་གསན། འགྲེལ་པ་བཞི་སྦྲགས་ཀྱི་ལུང་ཡང་གསན་ ཅིང་། འདི་དག་སྲད་རྒྱུད་ཀྱི་བསྐྱེད་རྫོགས་དང་འགྲེལ་བའི་བཤད་རྒྱུན་ཡིན་པས་འདི་ནས་བཟུང་རྒྱུད་པ་ཟུང་འབྲེལ་གྱི་བཤད་རྒྱུན་ཡིན་ནོ།། དེ་ནས་སྔགས་ཕྱོགས་ལ་ཤེས་འདོད་ཆེན་པོ་འཁྲུངས་ཏེ། དགའ་ལྡན་ཁྲི་ཆེན་བྱམས་པ་རྒྱ་མཆོའི་དྲུང་དུ་བྱོན་ནས་གསང་འདུས་བསྐྱེད་རྫོགས་ཀྱི་ཟིན་བྲིས་མཛད་པ་དང་། རྒྱུད་ཊཱིཀ་ལེའུ་བཅུ་བཞི་པའི་བར་དང་། གསང་འདུས་བསྐྱེད་རྫོགས་ཆེན་མོ་གཉིས་ཀྱི་བཤད་ལུང་དང་། དམར་ཁྲིད་ལག་རྗེས་དང་བཅས་པ་གསན་ནས་ཐུགས་འཕྲོག་ཏེ། རྒྱུད་འགྲེལ་བཤད་པ་ཞུས་པས་སྨད་རྒྱུད་དུ་སོང་གསུངས་ནས་སྨད་རྒྱུད་པའི་ཆོས་གྲྭར་ལོ་གསུམ་བྱོན་ཏེ། མཁན་རིན་པོ་ཆེ་རྗེ་དགེ་འདུན་རྒྱལ་མཚན་པའི་དྲུང་ནས་འགྲེལ་པ་བཞི་སྦྲགས་ཀྱི་ཞིབ་བཤད་མཁས་པའི་ཡིད་འཕྲོག་པའི་ཁྲིད་དང་བཅས་པ་ཞུས།
དེ་ནས་ཞབས་བསྙུང་ནས་མཐར་རྒྱས་སུ་ལོ་གཅིག་བཞུགས་པའི་རིང་ལ། དེའི་མཆོད་གནས་གནས་བརྟན་པ་ལ་རྒྱུད་འབུམ་གྱི་ལུང་རྒྱུན་འདུག་པས་དེ་ལ་གསར་མ་རྒྱུད་འབུམ་ཡོངས་རྫོགས་ཚར་གཅིག་ལེགས་པར་གསན། དེ་ནས་གཙང་དུ་བྱོན་ཏེ་གསེར་སྡིངས་པའི་བླ་མ་མཛད་དེ་རྒྱུད་ཀྱི་འཆད་ཉན་མཛད། དེར་སྔར་རྒྱུད་ཊཱིཀ་དང་འགྲེལ་བ་བཤད་སྲོལ་མེད་ཀྱང་སྨད་རྒྱུད་པའི་ལམ་སྲོལ་བཞིན་འགྲེལ་པ་བཞི་སྦྲགས་ཀྱི་བཤད་པ་བཙུགས་པས་གཙང་ཕྱོགས་ཀྱི་དགེ་བཤེས་ཐམས་ཅད་བསྡུས་ཏེ། འཆད་ཉན་འཕེལ་ཞིང་སྔགས་ལ་བློ་བསྐྱེད་ཆེར་རྒྱས་པའི་མདོ་སྔགས་ཀྱི་མཁས་གྲྭ་མང་པོ་ཐོན། དེ་ནས་དབུས་སུ་དགའ་ལྡན་དུ་ཕེབས་ཏེ། མཆོད་ཆུང་ལ་རྒྱུད་སྨད་སྟོད་དང་གསེར་ལྡིངས་པ་གསུམ་འཛོམས་པས་དགེ་བཤེས་གསེར་ལྡིངས་པ་བཟང་བ་འདུག་ཅེས་སྙན་གྲགས་འུར་བྱུང་བས། ཁྲི་ཆེན་བྱམས་པ་རྒྱ་མཚོ་དང་། སྡེ་པ་བཀྲིས་པ་མཆོད་ཡོན་གཉིས་ཀྱིས་སྨད་རྒྱུད་པའི་འཆད་ཉན་དུ་ཕེབས་དགོས་ཞུས་པས་ཞལ་བཞེས་གནང་། འཕྲལ་དུ་གཙང་ལ་བྱོན་ཏེ། མཁས་དབང་བཀྲིས་རིན་ཆེན་པ་ལ་གསེར་སྡིངས་ཀྱི་བླ་མ་གཏད་ཏེ་དབུས་སུ་བྱོན།
རབ་བྱུང་བཅུ་པའི་ས་གླང་། ཕྱི་ལོ་ ༡༥༨༩ ལོར་སྨད་རྒྱུད་ཀྱི་ཁྲིར་ཕེབས་ནས་འཆད་ཉན་ལོ་བཅུ་བཞིའི་བར་དུ་མཛད་པ་ལས་ཕེབས་མ་ཐག་ནས་གྲྭ་མང་འོ་བརྒྱལ་བར་དགོངས་ནས་སྔ་ཇའི་ཇ་ཚུལ་མ་ཆག་པར་བཙུགས། ལོ་བཅུ་བཞིའི་རིང་འགྲེལ་པ་བཞི་སྦྲགས་ཐོག་མར་ཞོག་གུར་སྨོན་ནས་དབུ་བཙུགས། ཕྱི་མིག་ལུང་དུ་རྒྱུད་འགྲེལ་མ་རྫོགས་བར་ཚང་བར་མཛད་ཅིང་། བླ་མ་རྒྱུད་མཆོད་དང་རྒྱུད་གཏད་པ་དང་། བཤད་རྒྱུད་རྡོ་རྗེ་འཕྲེང་བ་ལྟར་གྱི་ཁྲོ་བཅུའི་གཏོར་མ་དང་རྒྱུད་སྐྱོང་བའི་བཀའ་བསྒོ་བ་སོགས་རྗེ་བདག་ཉིད་ཆེན་པོའི་ཕྱག་བཞེས་རྣམས་ད་ལྟ་འགྲེལ་པའི་སྐབས་ལྟར་མཛད་པ་ཡིན། ཊཱིཀྐ་ཆེ་བའི་བསྐྱར་ཆོས་ལེའུ་བཅུ་བདུན་པའི་མཚམས་སྦྱར་བར་དང་། ཊཱིཀྐ་ཆུང་བའི་ལེའུ་བཅུ་གསུམ་པའི་མཚམས་སྦྱར་ལ་འཇོག་པར་མཛད་ཅིང་། འདུས་པའི་བསྐྱེད་རྫོགས་ཀྱི་ཟིན་བྲིས་དང་། འཇིགས་བྱེད་བསྐྱེད་རྫོགས་རྗེ་རྒྱ་ར་པ་དང་། བྱམས་པ་རྒྱ་མཚོ། དགེ་འདུན་རྒྱལ་མཚན་གྱི་བསྐྱེད་རྫོགས་ལེགས་པ་དེ་དག་གཏོང་གི་ཡོད་པ་སྣང་། དེ་ལྟར་ཚར་རེ་རེ་དང་། རྒྱུད་སྡེ་སྤྱི་རྣམ་སོགས་དང་། རྒྱུད་འབུམ་གྱི་ལུང་དང་། མཁས་གྲུབ་ཐམས་ཅད་མཁྱེན་པ་ཡབ་སྲས་ཀྱི་འཇིགས་བྱེད་བསྐྱེད་རྫོགས་ཆེན་མོའི་ཟབ་བཤད། ལས་སྦྱོར་འཕྲུལ་འཁོར་ཕྱག་ལེན་དང་བཅས་པ་དང་། མགོན་པོ་ཆོས་རྒྱལ་གཉིས་ཀྱི་བེའུ་བུམ་མན་ངག་དང་བཅས་པའི་ལུང་དང་ཞལ་ཤེས་མང་པོས་མཁས་པ་རྣམས་མགུ་བར་མཛད་པས་སྙན་པའི་གྲགས་པ་ཕྱོགས་ཀུན་ཏུ་ཁྱབ་པ་དང་། གདུལ་བྱ་འདུལ་བའི་ཐུགས་རྗེ་ཆེ་བས་དབུས་གཙང་ཁམས་གསུམ་གྱི་དགེ་བའི་བཤེས་གཉེན་བཟང་པོར་གྲགས་པ་ཐམས་ཅད་དཔལ་ལྡན་སྨད་རྒྱུད་དུ་འདུས་པས་མདོ་སྔགས་ཀྱི་དགེ་བའི་བཤེས་གཉེན་དང་འཕྲིན་ལས་ཀྱིས་ཀྱང་ཆུ་བོ་གངྒཱ་ཚུན་ཁྱབ་པར་མཛད།
བྱ་བ་ལས་ཀྱི་འཁོར་ལོ་ཚལ་གྱི་རྒྱུད་ཁང་ལྷའི་ཕོ་བྲང་འདྲ་བ་དེ་ཉིད་དེ་དུས་ཀྱི་ལྷ་འབྲི་བ་མཁས་རྒུ་འདུས་པས་ཕྱིས་སུ་ལོགས་བྲིས་འདི་འདྲ་ལེགས་པོ་གང་ན་ཡང་མ་མཐོང་ཞེས་ཀུན་མཁྱེན་བླ་མས་གསུངས། ཉི་འོད་ཕོག་དུས་ལྷ་ཁྲོ་བོ་རྣམས་ཀྱི་ཞལ་ལ་ལྟ་མི་བཟོད་པར་ཡོད་གསུངས། གངས་ཅན་གྱི་བི་ཤཱ་ཀརྨ་ཆོས་དབྱིངས་རྒྱ་མཚོས་ཀྱང་བསྟོད་པར་མཛད་ཅེས་གསུངས། ལོགས་བྲིས་སྐབས་མཐིང་དཀོན་པ་བྱུང་བས། གྲུབ་རྟགས་ནམ་མཁའ་མཛོད་ལ་མངའ་བརྙེས་པ་སྟོན་ཆེད་དུ་གྲིབ་ཀྱི་རི་འདིའི་རིགས་ལ་མཐིང་སྤང་གང་འདོད་ཡོད་ཅེས་གསུངས་ནས་ཕེབས་ཏེ་གང་འདོད་བརྙེད་པར་གྱུར། དེ་དུས་འཚོལ་མཁན་ཚོས་ས་ཁྲུ་གང་བརྐོས་པས་ས་དང་རི་ཐམས་ཅད་མཐིང་གི་རང་བཞིན་དུ་མཐོང་བས། ཕྱིས་སུ་ལེན་པར་ཕྱིན་དུས་སུས་ཀྱང་མ་རྙེད་པས་གྲུབ་རྟགས་སུ་ཤེས་ནས་ཀུན་ངོ་མཚར་བར་གྱུར། དེ་ནི་རླུང་ཙམ་དང་མན་ངག་རེས་འབྱུང་བཞི་བརྟེན་པའི་རྫུ་འཕྲུལ་ཆུང་ཆུང་དང་གཏན་མི་གཅིག་པས་སེམས་ལ་དབང་ཐོབ་པའི་གྲུབ་རྟགས་ཡིན་སྣང་། དེ་བཞིན་དུ་ས་མེན་མ་རྙེད་པས་ཙ་རི་རི་འདིའི་རིགས་ལ་ས་མེན་གང་འདོད་ཡོད་གསུངས་རྗེས་རང་གི་བཙལ་བས་མ་རྙེད་ཕྱིན་རི་ཐམས་ཅད་ས་མེན་དུ་འདུག་པ་མངོན་སུམ་དུ་མཐོང་ཡང་ད་ལྟ་ཅི་ཡང་མི་འདུག་གསུངས་སྣང་། དེ་དུས་རྡོ་རྣམས་ལ་ཕྱག་རྗེས་དང་ཞབས་རྗེས་བྱུང་བ་རྡོ་རྗེ་འཇིགས་བྱེད་བྲིས་སྐུའི་ལོགས་བྲིས་ཀྱི་རྩིག་པ་ལ་ཡོད་པར་ཀུན་གྱིས་མཐོང་རྒྱུ་ཡོད་འདུག ཞོགས་གུར་སྨོན་དུ་ཡང་རྒྱུད་ཁང་གསར་དུ་བཞེངས་པའི་སྦྱིན་བདག་སྡེ་པ་ཡུལ་རྒྱལ་ནས་གནང་བས་དེ་དུས་མཆོད་ཡོན་ལེགས་ལམ་དུ་ཡོད་སྣང་། ལོགས་རིས་རབ་གནས་བཅས་པ་གྲུབ་པར་མཛད།
རྒྱུད་ཀྱི་འཆད་ཉན་ཡང་དེ་དུས་གོང་འཕེལ་དུ་སོང་། ཕྱི་མིག་ལུང་དུ་གར་ཐིག་དབྱངས་གསུམ་དང་། གཞི་གསུམ་གྱི་ཕྱག་ལེན་གཙོ་བོར་མཛད་ཅིང་། རིམ་ལྔའི་དམར་ཁྲིད་ཟླ་བའི་བར་དུ་བསྒོམ་པར་མཛད་པས་གྲུབ་པ་ཐོབ་པ་ཡང་འགའ་ཞིག་བྱུང་སྣང་། སྐབས་དེར་སྡེ་པ་སྐྱིད་ཤོད་པའི་ཕྱག་གཡོག་ཞིག་རྒྱུད་པར་མགོ་བཏགས་ཞུས་པ་སྡེ་པ་གཡུལ་རྒྱལ་པས་ཕར་གཏོང་དགོས་ཟེར་བར་འདིས་སྲོག་སྐྱོབ་ཏུ་ཕེབས་པས་ཤོད་ཀྱི་སྒོ་ཡན་ལ་མ་བཏང་བར་ཞག་གསུམ་སྒུག་ཀྱང་མ་བཏང་བས་རྗེ་འདི་ཁྲོས་ནས་མི་གཅིག་གི་སྲོག་མི་སྟེར་ན་མཆོད་ཡོན་དང་བླ་མ་དེ་གས་ཆོག དེ་རིང་ནས་ཁྱོད་རྣམས་དམ་ཉམས་ཡིན་ཞེས་དབུ་ཞྭ་གཡབ་སྡེབས་དང་དམོད་པ་མཛད། རྗེས་སུ་སྡེ་སྲིད་ཀྱང་ཡུལ་ས་ཤོར་ཏེ་མཐར་འཁྱམས་དགོས་པ་དང་འོ་བརྒྱལ་ནས་གཤེགས། བུ་ཚ་ཡང་རྒྱུད་ཐམས་ཅད་ལ་མི་ཤིས་པ་མང་པོ་བྱུང་ནས་རྒྱུད་པ་གཉིས་དང་ཆེན་པོ་དུ་མས་ཀྱང་རིམ་གྲོ་བྱས་ཀྱང་བཟློག་མ་ཐུབ། སྐབས་དེ་ཙམ་ན་བླ་མ་མཁས་སྙན་ཆེ་བ་མང་ཡང་རྗེས་སུ་རྗེ་ཡབ་སྲས་ཀྱི་གསུང་རབ་དང་བསྟུན་ན་རྗེ་འདིའི་གསུང་བཤད་རྣམས་ཟླ་མེད་པ་ཡིན་ཞེས་འཁོན་སྟོན་པ་སོགས་ཀྱིས་བསྔགས་པར་མཛད་སྣང་།
པཎ་ཆེན་བློ་བཟང་ཆོས་ཀྱི་རྒྱལ་མཚན་གྱིས་བླ་མ་འདི་ཡིི་དུས་རྒྱུད་གྲྭ་དང་ལྷན་དུ་དགའ་ལྡན་དུ་གསང་འདུས་བསྐྱེད་རྫོགས་གསན་པ་དང་། ཚལ་ཆོས་གྲྭར་འགྲེལ་པ་གསན་པ་དང་། དེའི་སྐབས་གསུང་ཆོས་གསན་པའི་ཁྲི་ཆོས་གྲྭ་ན་ཡོད་ཅིང་། དེ་དུས་པཎ་ཆེན་རིན་པོ་ཆེས་འཛུགས་པར་མཛད་པའི་ཁམ་སྡོང་དང་ཤུག་པའི་སྡོང་པོ་དེ་དག་ཕྱིས་སུ་ཡང་གྲྭ་རྒན་རྣམས་ཀྱིས་སྟོན་གྱིན་ཡོད་ཅེས་ཀུན་མཁྱེན་བླ་མས་གསུངས། དེ་ལྟར་གཙང་དང་དབུས་ཀྱི་རྒྱུད་པ་གཉིས་དང་། དཔལ་འཁོར་ཆོས་སྡེ་ལ་སོགས་པས་གྲྭ་ཚང་རྣམས་སུ་བསྟན་པའི་བྱ་བ་དང་ལེགས་བཤད་མང་པོ་མཛད་པའི་མཐར། དགུང་གྲངས་རེ་གཉིས་པ་ཆུ་ཕོ་སྟག་གི་ལོ། ཕྱི་ལོ་ ༡༦༠༢ ཟླ་བ་ ༡༢ ཚེས་ ༢༤ ཉིན་དགའ་ལྡན་དུ་རྗེ་བདག་ཉིད་ཆེན་པོ་ཡབ་སྲས་ཀྱི་དྲུང་དུ་གཤེགས་སོ།།