གདན་རབས་རིམ་བྱོན་གྱི་མཚན་ཐོ། རྗེ་བཙུན་ཤེས་རབ་སེང་གེས་དཔལ་ལྡན་སྨད་རྒྱུད་གྲྭ་ཚང་ཕྱག་བཏབ་པ་ནས་ད་ལྟའི་ [ ༢༠༢༣ ] བར་དུ། འཆད་ཉན་གྱི་བླ་རབས་སམ་གདན་རབས་རིམ་པར་བྱོན་ཏེ་སྔར་སྲོལ་རྒྱུད་འགྲེལ་ཆེན་མོ་སོགས་ཀྱི་འཆད་ཉན་གྱི་རྒྱུན་གང་ཡོད་མི་ཉམས་རྒྱུན་འཛིན་དང་གོང་སྤེལ་གནང་བ་སོགས་ཀྱིས་མཚོན་བསྟན་འགྲོའི་དོན་རླབས་ཆེན་མཛད་པའི་གྲྭ་ཚང་གི་གདན་རབས་རིམ་བྱོན་གྱི་སྐོར་རམ་ངོ་སྤྲོད་བཞུགས།
༣༦] ཆོས་རྗེ་བློ་བཟང་དྲི་མེད། [ བྱང་ཆོས་དང་། དགའ་ལྡན་ཁྲིར་ཕེབས། ]
བློ་བཟང་རྒྱལ་བ་གཉིས་པ་ཙོང་ཁ་པའི། །མདོ་སྔགས་དྲི་བྲལ་བསམ་འཕེལ་དབང་གི་རྒྱལ། །
དཔག་མེད་བཤད་དང་སྒྲུབ་པའི་གྲུ་གཟིངས་སུ། །འདྲེན་མཁན་དེད་དཔོན་མཆོག་ལ་གསོལ་བ་འདེབས། །
ཞེས་འབྱུང་བ་ལྟར། དེའི་རྗེས་སུ་སྨད་རྒྱུད་པའི་ཁྲིར་ཆོས་རྗེ་བློ་བཟང་དྲི་མེད་ཕེབས་པ་ཡིན་ཏེ། དམ་པ་འདིའི་འཁྲུངས་ཡུལ་མདོ་ཁམས་ཤོག་དྲུག་ཡིན་ལ། གཞོན་ནུ་ཉིད་ནས་རབ་ཏུ་བྱུང་། དབུས་སུ་ཕེབས་ནས་འབྲས་བློ་གླིང་སྤོམ་ར་ཁང་ཚན་དུ་ཞུགས། གཞུང་ཆེན་རྣམས་ལ་སྦྱངས་པ་མཐར་ཕྱིན་པ་མཛད། དཔལ་ལྡན་སྨད་རྒྱུད་གྲྭ་ཚང་དུ་ཕེབས།
སྔགས་ལ་གསན་བསམ་ལེགས་པར་མཛད་སྟེང་ནས་རྒྱུད་པའི་བླ་མ་དབུ་མཛད་དང་དེའི་རྗེས་མཁན་ཁྲིར་ཕེབས་ནས། སྔར་སྲོལ་བཞིན་དམ་ཆོས་འགྲེལ་པ་བཞི་སྦྲགས་གིས་མཚོན་འཆད་ཉན་རྣམས་ཚུལ་བཞིན་མཛད་དེ། བྱང་རྩེ་བརྒྱུད་རིམ་བཞིན་རབ་བྱུང་ ༡༣ ལྕགས་ལུག་སྤྱི་ལོ་ ༡༧༥༡ ལོར་དགའ་ལྡན་གསེར་ཁྲིར་ཕེབས་ནས་མེ་གླང་བར་ལོ་ངོ་བདུན་གྱི་རིང་ཁྲི་ལོ་བསྐྱངས་པ་ཡིན་སྣང་། བོད་རྒྱ་ཚིག་མཛོད་ཆེན་མོ་ལས་འདི་ལྕགས་རྟ་ལ་ཁྲིར་ཕེབས་པར་བཤད།
ངག་དབང་འཇམ་དཔལ་སྙིང་པོ་བློ་བཟང་གྲགས། ། མདོ་སྔགས་བསྟན་པ་དར་བའི་ཀུནྡའི་ཚལ། །
ཆེས་ཆེར་རྒྱས་མཛད་ལུང་རིགས་འོད་དཀར་ཅན། །དཔལ་ལྡན་བླ་མའི་ཞབས་ལ་གསོལ་འདེབས། །
བློ་བཟང་རྒྱལ་བ་གཉིས་པའི་ཞལ་གྱི་ལུང་། །མདོ་སྔགས་ལེགས་པར་བཤད་པའི་གདམས་པ་ལ། །
ཐོས་བསམ་སྒོམ་པའི་ཤེས་རབ་མཆོག་གི་མཛོད། །མངའ་བརྙེས་བཤེས་གཉེན་དམ་པར་གསོལ་བ་འདེབས། །
ཞེས་གོང་གི་མཁན་ཆེན་བློ་བཟང་དྲི་མེད་དང་། གཤམ་གྱི་ཆོས་རྗེ་ངག་དབང་ཆོས་གྲགས་གཉིས་ཀྱི་བར་དུ་མཁན་ཐོག་གཉིས་བྱུང་བ་བརྒྱུད་འདེབས་ལས་གསལ་མོད། མཚན་སྒྲ་མི་གསལ་བས་མཁན་ཐོག་འདི་གཉིས་ཀྱི་རྣམ་པར་ཐར་པ་མ་རྙེད་པས་བཞག་དགོས་བྱུང་། ཕྱིས་རྙེད་ན་འདིར་བསྣན་པར་བྱའོ། །
༣༩] ཆོས་རྗེ་ངག་དབང་ཆོས་གྲགས། [ བྱང་ཆོས་དང་། དགའ་ལྡན་ཁྲིར་ཕེབས། ]
དཔལ་ལྡན་གསང་བ་འདུས་པའི་རྒྱུད་རྒྱལ་གྱི། །མན་ངག་འཆད་ལ་དབང་སྒྱུར་ཙོང་ཁ་པའི། །
དེ་ཡི་དམ་ཆོས་སྟོན་མཁས་གྲགས་པ་ཡིས། །ས་གསུམ་སྙན་པར་གྲགས་ལ་གསོལ་བ་འདེབས། །
ཞེས་འབྱུང་བ་ལྟར། དེའི་རྗེས་སུ་སྨད་རྒྱུད་པའི་ཁྲིར་ཆོས་རྗེ་ངག་དབང་ཆོས་གྲགས་དམ་པ་ཁོང་ཕེབས་པ་ཡིན་ཏེ། འདི་ནི་འཁྲུངས་ཡུལ་ཨ་མདོ་བྱ་ཁྱུང་ཡིན་ལ། སྐུ་གཞོན་ནུའི་དུས་ནས་རབ་ཏུ་བྱུང་། སེར་བྱེས་གྲྭ་ཚང་དུ་ཆོས་ཞུགས་མཛད་དེ་གཞུང་ཆེན་རྣམས་ལ་ཐུགས་གཉེར་ཡང་དག་པར་མཛད། དེ་ནས་དཔལ་ལྡན་སྨད་རྒྱུད་གྲྭ་ཚང་དུ་ཞུགས་ནས་སྔགས་ཕྱོགས་ལ་གསན་བསམ་སློབ་གཉེར་ལེགས་པར་མཛད་ནས་སྨད་རྒྱུད་པའི་མཁན་ཁྲིར་ཕེབས།
བཤད་པ་རྡོ་ལག་བརྒྱུད་འགྲེལ་བ་བཞི་སྦྲགས་སོགས་སྔར་གྱི་སྲོལ་བཟང་པོ་མི་ཉམས་པར་འཆད་ཉན་མ་ལུས་པར་མཛད་ནས། བྱང་རྩེ་ཆོས་རྗེའི་བརྒྱུད་ནས་རབ་བྱུང་བཅུ་གསུམ་པའི་ཆུ་གླང་དང་ཕྱི་ལོ་ ༡༧༩༢ ལོར་དགའ་ལྡན་གསེར་གྱི་ཁྲི་ལ་ཕེབས་ནས་ལོ་བདུན་རིང་ཁྲི་ལོ་བསྐྱངས། ༸རྒྱལ་དབང་འཇམ་དཔལ་རྒྱ་མཚོའི་ཡོངས་འཛིན་མཛད་སྣང་།
༤༠] ཚ་བ་བློ་བཟང་བསྟན་པ། [ བྱང་ཆོས་དང་། དགའ་ལྡན་ཁྲིར་ཕེབས། ]
བློ་བཟང་རྒྱལ་བ་གཉིས་པའི་གསང་ཆེན་གྱི། །བསྟན་པ་སྤེལ་ལ་འགྲན་པའི་ཟླ་བྲལ་བ། །
རིགས་པའི་དབང་ཕྱུག་རྡོ་རྗེ་འཛིན་པ་ལ། །གསོལ་བ་འདེབས་སོ་བྱིན་གྱིས་བརླབ་ཏུ་གསོལ། །
ཞེས་གསུངས་པ་ལྟར། དེའི་རྗེས་སུ་སྨད་རྒྱུད་པའི་མཁན་ཁྲིར་ཚ་བ་བློ་བཟང་བསྟན་པ་མཆོག་བྱོན་པ་སྟེ། དམ་པ་འདི་ནི་ཁམས་ཚ་བ་རོང་ཡིན་ལ། རབ་ལོ་ཞེས་པ་རབ་བྱུང་བཅུ་གཉིས་པའི་ཆུ་སྟག་ཕྱི་ལོ་ ༡༧༢༢ ལོར་སྐུ་འཁྲུངས། ཆུང་ངུའི་དུས་ནས་དམ་པའི་སྐྱེས་བུའི་རྟགས་མཚན་ཡོད་བཞིན་པ་ཞིག་ཡིན་འདུག་ལ། ཕྱུགས་རྗིར་བསྐྱོད་པའི་སྐབས་ར་ལུག་སེམས་ཅན་མཐར་བསྐོར་ཏེ། རང་ཉིད་ཕ་བོང་གི་སྟེང་དུ་འཛེགས་ནས་དེ་དག་ལ་ཆོས་འཆད་པའི་སྟངས་ཀ་ཡང་ཡང་མཛད་ཀྱི་ཡོད་ཅེས་རྒན་རབས་ནས་ངག་རྒྱུན་ཡོད་སྐད།
དབུས་སུ་བྱོན་ནས་གཞུང་ཆེན་བཀའ་པོད་ལྔ་ལ་གསན་སྦྱོང་རྡོ་རུས་ཐུག་པ་མཛད། དེ་ནས་སྨད་རྒྱུད་དུ་ཞུགས་ཏེ་གསང་སྔགས་རྒྱུད་སྡེ་བཞི་ལ་ཚིག་སྤྱི་ཙམ་མ་ལུས་པར་ཕུལ་དུ་ཕྱིན་པར་སྦྱངས་པས་མཁས་པའི་གྲགས་པ་ཆེ། དེ་ནས་སྨད་རྒྱུད་པའི་མཁན་ཁྲིར་བྱོན། འཆད་ཉན་གོང་འཕེལ་དུ་མཛད་སྟེང་ནས་བྱང་རྩེ་བརྒྱུད་དེ་རབ་བྱུང་བཅུ་གསུམ་པའི་ལྕགས་སྟག་ཕྱི་ལོ་ ༡༧༧༠ དང་རྗེ་རང་ཉིད་དགུང་གྲངས་ཞེ་བརྒྱད་ཐོག་དགའ་ལྡན་གསེར་གྱི་ཁྲི་ལ་ཕེབས་ནས་ཆོས་འཁོར་རྒྱ་ཆེར་བསྐོར་བཞིན་ལོ་དྲུག་གི་རིང་ཁྲི་པ་མཛད།
དམ་པ་འདི་ཡང་༸རྒྱལ་དབང་འཇལ་དཔལ་རྒྱ་མཚོའི་ཡོངས་འཛིན་མཛད་པས་ཁྲི་ཆེན་ཡོངས་འཛིན་བློ་བཟང་བསྟན་པ་ཞེས་མཚན་སྙན་ཆེ། འདིའི་ཡང་སྲིད་ད་ལྟ་ཚ་བ་བལ་ཐོག་སྤྲུལ་སྐུའི་སྐུ་རབས་རྣམས་ཡིན། དེང་དུས་བོད་རྒྱ་ཚིག་མཛོད་ལས་ལྕགས་ཡོས་ལོར་ཁྲིར་ཕེབས་པར་བཤད། དེ་ལྟར་ན་ཁྲི་ལོ་བདུན་ཆ་ཚང་བསྐྱངས་པར་ངེས་སོ། །
ངག་དབང་འཇམ་དཔལ་དབྱངས་དངོས་ཙོང་ཁ་པའི། །མདོ་སྔགས་ལེགས་བཤད་སྤེལ་བའི་དཔལ་ཡོན་ཅན། །
མཁྱེན་བརྩེ་འོད་སྟོང་ལྡན་པའི་བསིལ་སྦྱིན་མཁན། །ཕན་བདེའི་ས་མོས་ཞབས་ལ་གསོལ་བ་འདེབས། །
ཞེས་འབྱུང་བ་ལྟར། དེའི་རྗེས་སུ་སྨད་རྒྱུད་པའི་མཁན་ཁྲིར་ངག་དབང་དཔལ་ལྡན་ཕེབས་ནས་འཆད་ཉན་ལོ་དུས་ཚང་བར་མཛད་སྣང་ཡང་བྱུང་བ་རྣམས་ཇི་བཞིན་མ་རྙེད་པས་སླར་ཡང་རྙེད་ན་འདིར་བསྣན་པར་བྱའོ། །
༤༢] ཆོས་རྗེ་བློ་བཟང་སྨོན་ལམ། [ བྱང་ཆོས་དང་། དགའ་ལྡན་ཁྲིར་ཕེབས། ]
བློ་བཟང་རྒྱལ་བའི་མདོ་སྔགས་བསྟན་པ་མཆོག །འཛིན་ལ་སྨོན་ལམ་བཟང་པོས་མཐུ་གྲུབ་པས། །
བཤད་དང་སྒྲུབ་པས་ཐུབ་བསྟན་གསལ་མཛད་པ། །བཤེས་གཉེན་དམ་པའི་ཞབས་ལ་གསོལ་བ་འདེབས། །
ཞེས་གསུངས་པ་ལྟར། དེའི་རྗེས་སུ་སྨད་རྒྱུད་པའི་ཁྲིར་ཆོས་རྗེ་བློ་བཟང་སྨོན་ལམ་ཕེབས་པ་ཡིན་ཏེ། དམ་པ་འདི་རབ་བྱུང་བཅུ་གཉིས་པའི་ཤིང་འབྲུག་ཕྱི་ལོ་ ༡༧༢༤ ལོར་རྒྱལ་རོང་སྤྲེ་སྣང་ཞེས་པར་སྐུ་འཁྲུངས། ཆུང་དུས་ནས་རབ་ཏུ་བྱུང་། དབུས་སུ་བྱོན་ནས་འབྲས་བློ་གླིང་རྒྱལ་རོང་ཁང་ཚན་དུ་ཞུགས་ནས་མདོ་ཕྱོགས་བཀའ་ཆེན་རྣམས་ལ་བརྩོན་པ་ཆེན་པོས་སྦྱངས་པས་ལེགས་པར་དགོངས།
དཔལ་ལྡན་སྨད་རྒྱུད་དུ་ཕེབས་ནས་གསང་སྔགས་རྒྱུད་སྡེ་བཞི་ལ་གསན་བསམ་དཔྱིས་ཕྱིན་པར་མཛད་དེ་སྨད་རྒྱུད་པའི་མཁན་ཁྲིར་ཕེབས་ནས། ལོ་ངོ་བཞིའི་རིང་སྔར་སྲོལ་གྱི་འཆད་ཉན་རྣམས་ལེགས་པར་མཛད། དེ་ནས་བྱང་རྩེ་བརྒྱུད་དེ་དམ་པ་རང་ཉིད་དགུང་གྲངས་ ༥༧ ཕེབས་པ་རབ་བྱུང་བཅུ་གསུམ་པ་ལྕགས་གླང་དང་ཕྱི་ལོ་ ༡༧༨༡ ལོར་དགའ་ལྡན་གསེར་ཁྲིར་ཕེབས་ནས་ཆོས་འཁོར་བསྐོར་ཞིང་གསེར་ཁྲི་ལོ་བརྒྱད་བསྐྱངས་སྣང་།
འདིའི་ཁྲི་པ་གོང་མ་ཚེ་གླིང་ངག་དབང་ཚུལ་ཁྲིམས་ཁྲིར་ཕེབས་ལོ་ཡིན་ཚུལ་དེང་དུས་ཀྱི་བོད་རྒྱ་ཚིག་མཛོད་དང་། མཁས་བཙུན་པས་བསྒྲིགས་པ་དང་མི་མཐུན་ནོ། །
༤༣] ཆོས་རྗེ་བློ་བཟང་བཀྲ་ཤིས། [ བྱང་ཆོས་དང་། དགའ་ལྡན་ཁྲིར་ཕེབས། ]
བློ་བཟང་རྒྱལ་བའི་མདོ་སྔགས་ལམ་བཟང་པོ། །མཐའ་ཡས་གདུལ་བྱའི་བློ་མུན་བསལ་བའི་ཕྱིར། །
བཀྲ་ཤིས་དགེ་མཚན་དུ་མས་འདོམས་མཛད་པའི། །མཚུངས་མེད་ཆོས་ཀྱི་རྗེ་ལ་གསོལ་བ་འདེབས། །
ཞེས་འབྱུང་བ་ལས། དེའི་རྗེས་སུ་སྨད་རྒྱུད་ཀྱི་མཁན་ཁྲིར་ཆོས་རྗེ་བློ་བཟང་བཀྲ་ཤིས་བྱོན་པ་ཡིན་ཏེ། དམ་པ་འདི་རབ་བྱུང་བཅུ་གཉིས་པའི་ཆུ་གླང་དང་ཕྱི་ལོ་ ༡༧༣༣ ལོར་ཁམས་ཏྲེ་ཧོར་དར་རྒྱས་ཁུལ་དུ་སྐུ་འཁྲུངས། གཞོན་ནུའི་དུས་ནས་རབ་ཏུ་བྱུང་། དབུས་སུ་བྱོན་ནས་སེར་བྱེས་ཏྲེ་ཧོར་ཁང་ཚན་དུ་ཞུགས་ནས་གཞུང་ཆེན་རྣམས་ལ་སྦྱངས་པ་ལྷོད་མེད་མཛད་པས་ལེགས་པར་མཁྱེན། པཎ་ཆེན་དཔལ་ལྡན་ཡེ་ཤེས་མཆོག་ལས་བསྙེན་པར་རྗོགས།
སྔགས་ཕྱོགས་ལ་གསན་བསམ་མཛད་སླད་སྨད་རྒྱུད་དུ་ཕེབས་ནས་ཟབ་ཅིང་རྒྱ་ཆེ་བའི་རྒྱུད་སྡེ་བཞི་གའི་གཞུང་ཆེན་རྣམས་ལ་སྦྱངས་པ་ཕུལ་ཕྱིན་མཛད་དེ་སྨད་རྒྱུད་ཀྱི་མཁན་ཁྲིར་བྱོན་ནས་ལོ་དུས་རྫོགས་གྱི་བར་དུ་འཆད་ཉན་གྱི་རྐང་བཟུང་། དེ་ནས་བྱང་རྩེ་བརྒྱུད་དེ་དམ་པ་རང་ཉིད་ཀྱི་དགུང་གྲངས་ང་དྲུག་ཐོག རབ་བྱུང་བཅུ་གསུམ་པའི་ས་བྱ་ཕྱི་ལོ་ ༡༧༨༩ ལོར་དགའ་ལྡན་གསེར་ཁྲིར་ཕེབས་ནས་ཆོས་ཀྱི་འཁོར་ལོ་བསྐོར་བཞིན་ཁྲི་ལོ་བདུན་ཆ་ཚང་བར་བསྐྱངས་སོ། །
༤༤] ཆོས་རྗེ་ངག་དབང་སྙན་གྲགས། [ དགའ་ལྡན་ཁྲིར་ཕེབས། ]
ངག་གི་དབང་ཕྱུག་རྗེ་བཙུན་ཙོང་ཁ་པའི། །མདོ་སྔགས་ཆོས་ཀྱི་ཐུགས་རྒྱུད་ལེགས་ཕྱུང་ཞིང་། །
སྙན་གྲགས་གསུང་གིས་འགྲོ་བློར་འདོམས་མཛད་པ། །ཡོངས་འཛིན་རྗེ་བཙུན་བླ་མར་གསོལ་བ་འདེབས། །
ཞེས་འབྱུང་བ་བཞིན། དེའི་རྗེས་སུ་སྨད་རྒྱུད་པའི་ཁྲིར་ཆོས་རྗེ་ངག་དབང་སྙན་གྲགས་ཕེབས་པ་ཡིན་ཏེ། དམ་པ་འདི་ནི་རབ་བྱུང་བཅུ་གཉིས་པའི་ལྕགས་སྤྲེལ་ཕྱི་ལོ་ ༡༧༤༠ ལོར་ཨ་མདོ་བྱ་ཁྱུང་ཡུལ་དུ་སྐུ་འཁྲུངས། སྐུ་གཞོན་ནུའི་དུས་ནས་རབ་ཏུ་བྱུང་། དབུས་སུ་བྱོན་ནས་སེར་བྱེས་གྲྭ་ཚང་དུ་ཞུགས་ནས་མདོ་ཕྱོགས་བཀའ་པོད་རྣམས་ལ་ཐུགས་སྦྱོང་ཆེན་པོ་མཛད་པས་མཁས་སྙན་གྱི་དྲི་བསུང་ཕྱོགས་ཀུན་ཏུ་ཁྱབ་པ་བྱུང་།
སྨད་རྒྱུད་དུ་བྱོན་ནས་སྔགས་ཀྱི་ཕྱོགས་ལའང་གསན་བསམ་དེ་བཞིན་དུ་མཛད་དེ་སྨད་རྒྱུད་ཀྱི་མཁན་ཁྲིར་བྱོན་ནས་བཤད་པ་རྡོ་ལག་བརྒྱུད། མན་ངག་རྡོ་ལག་བརྒྱུད། དམར་ཁྲིད་རྡོ་ལག་བརྒྱུད་ཅེས་སུ་གྲགས་པའི་འཆད་ཉན་རྣམས་སྔར་སྲོལ་བཞིན་མ་ཉམས་པར་མཛད། ༧ རྒྱལ་དབང་ལུང་རྟོགས་རྒྱ་མཚོ་དང་། ཚུལ་ཁྲིམས་རྒྱ་མཚོ་གཉིས་ཀའི་ཡོངས་འཛིན་གནང་།
ཉིད་ཀྱི་དགུང་གྲངས་ ༦༢ ཐོག་རབ་བྱུང་བཅུ་གསུམ་པའི་ལྕགས་བྱ་ཕྱི་ལོ་ ༡༨༠༡ ལོར་དགའ་ལྡན་གསེར་གྱི་ཁྲི་ལ་ཕེབས། རབ་བྱུང་བཅུ་བཞི་པའི་མེ་ཡོས་ཕྱི་ལོ་ ༡༨༠༧ བར་ཁྲི་ལོ་བདུན་རིང་བསྐྱངས་ཏེ་ཆོས་འཁོར་རྒྱ་ཆེར་བསྐོར་ཏོ། །
བློ་བཟང་རྒྱལ་བ་ཀུན་གྱི་མཐུ་དང་སྟོབས། །དེང་དུས་རྡོ་རྗེ་འཛིན་པའི་སྐུར་བསྟན་པ། །
འགྲོ་ལ་རིམ་གཉིས་ལམ་བཟང་འདོམས་མཛད་པ། །རྗེ་བཙུན་བླ་མའི་ཞབས་ལ་གསོལ་བ་འདེབས། །ཞེས་པ་དང་།
བློ་བཟང་རྒྱལ་བའི་མདོ་སྔགས་ལེགས་བཤད་ཀྱི། །ཟབ་གསང་དབྱར་གྱི་རྔ་ཆེན་སྒྲོག་པ་ལ། །
ཟླ་མེད་མཁས་བཙུན་བཟང་པོའི་རྣལ་རོལ་ཅན། །གྲགས་པ་ཤེས་རབ་ཞབས་ལ་གསོལ་བ་འདེབས། །
ཞེས་བརྒྱུད་འདེབས་གཉིས་འབྱུང་བ་བཞིན། བློ་བཟང་མཐུ་སྟོབས་ཞེས་པ་དང་། གྲགས་པ་ཤེས་རབ་སྟེ་འཆད་ཉན་ལོ་དུས་ཚང་བར་མཛད་པའི་མཁན་ཐོག་གཉིས་རིམ་བཞིན་བྱུང་སྣང་ཡང་གྲྭ་ས་གང་ནས་ཕེབས་པ་དང་། འཁྲུངས་གཤེགས་ཀྱི་ལོ་ཚིགས། བྱང་རྩེའི་ཁྲིར་ཕེབས་ཡོད་མེད་སོགས་མ་རྙེད་པས་སླད་རྙེད་ན་འདིར་བསྣན་དགོས་སོ། །