གདན་རབས་རིམ་བྱོན་གྱི་མཚན་ཐོ། རྗེ་བཙུན་ཤེས་རབ་སེང་གེས་དཔལ་ལྡན་སྨད་རྒྱུད་གྲྭ་ཚང་ཕྱག་བཏབ་པ་ནས་ད་ལྟའི་ [ ༢༠༢༣ ] བར་དུ། འཆད་ཉན་གྱི་བླ་རབས་སམ་གདན་རབས་རིམ་པར་བྱོན་ཏེ་སྔར་སྲོལ་རྒྱུད་འགྲེལ་ཆེན་མོ་སོགས་ཀྱི་འཆད་ཉན་གྱི་རྒྱུན་གང་ཡོད་མི་ཉམས་རྒྱུན་འཛིན་དང་གོང་སྤེལ་གནང་བ་སོགས་ཀྱིས་མཚོན་བསྟན་འགྲོའི་དོན་རླབས་ཆེན་མཛད་པའི་གྲྭ་ཚང་གི་གདན་རབས་རིམ་བྱོན་གྱི་སྐོར་རམ་ངོ་སྤྲོད་བཞུགས།
༥༨] ཆོས་རྗེ་བསམ་བློ་བ་གྲགས་པ་དོན་གྲུབ། [ བྱང་ཆོས་དང་། དགའ་ལྡན་ཁྲིར་ཕེབས། ]
བྱང་ཆུབ་ཆེན་པོའི་ལམ་མཆོག་མངོན་གྱུར་ཅིང་། །མཐའ་བྲལ་དོན་ལ་ཐོགས་མེད་བློ་གྲོས་རྒྱས།།
དོན་གཉིལ་ལྷུན་གྲུབ་དཔལ་ལྡན་མཛད་བཟང་ཅན། །བཀའ་དྲིན་མཚུངས་མེད་ཆེན་པོར་གསོལ་བ་འདེབས། །
ཞེས་གསལ་བ་ལྟར། དེའི་རྗེས་སུ་ཆོས་རྗེ་བསམ་བློ་བ་གྲགས་པ་དོན་གྲུབ་མཆོག་སྨད་རྒྱུད་པའི་མཁན་ཁྲིར་ཕེབས་པ་ཡིན་ཏེ། དམ་པ་འདི་ནི་འཁྲུངས་ཡུལ་ཨ་མདོ། གཞོན་ནུ་ཉིད་ནས་རབ་ཏུ་བྱུང་སྟེ་དབུས་སུ་བྱོན་ནས་གདན་ས་འབྲས་སྤུངས་སུ་བསམ་བློ་ཁང་ཚན་ཆོས་ཞུགས་མཛད། བཀའ་ཆེན་རྣམས་ལ་སྦྱངས་པ་ཆེན་པོ་མཛད་པས་མཁས་པའི་སྙན་པ་ཕྱོགས་ཀུན་ཏུ་ཁྱབ།
དཔལ་ལྡན་སྨད་རྒྱུད་དུ་ཕེབས། སྔགས་ཕྱོགས་ཀྱི་གཞུང་ཆེན་རྣམས་ལ་དེ་བཞིན་དུ་སྦྱངས་བརྩོན་མཛད་པས་མདོ་སྔགས་རབ་འབྱམས་ལ་མཁས་པར་གྱུར་ནས་སྨད་རྒྱུད་ཀྱི་བླ་མ་དབུ་མཛད་གནང་རྗེས་མཁན་ཁྲིར་ཕེབས། སྔར་ལམ་བཟང་པོ་ལྟར་ཆོས་ཐོག་སོ་སོའི་འཆད་ཉན་རྣམས་ཆད་ལུས་མེད་པར་ལོ་དུས་གཙང་གི་བར་མཛད་ནས་བྱང་རྩེའི་ཁྲི་ལ་ཕེབས། རབ་བྱུང་བཅོ་ལྔ་པའི་ལྕགས་རྟ་ཕྱི་ལོ་ ༡༨༧༠ ལོར་དགའ་ལྡན་གསེར་གྱི་ཁྲི་ལ་ཕེབས། ཆོས་འཁོར་རྒྱུན་མི་ཆད་དུ་བསྐོར། ཁྲི་ལས་ཐོག་སྐབས་༧རྒྱལ་དབང་འཕྲིན་ལས་རྒྱ་མཚོའི་ཡོངས་འཛིན་གནང་། ཁྲི་བ་ལོ་བདུན་གྱི་བར་དུ་ཆ་ཚང་བསྐྱངས་པར་བཤད།
༥༩] ཆོས་རྗེ་ངག་དབང་ཆོས་འཕེལ་ལམ་བློ་བཟང་ཆོས་འཕེལ།
བློ་བཟང་ངག་གི་དབང་ཕྱུག་འཇམ་དཔལ་དབྱངས། །ཆོས་ཚུལ་ཇི་བཞིན་འཕེལ་མཛད་གདམས་པའི་མཆོག །
འགྲོ་ལ་ལེགས་པར་འདོམས་པའི་བཤེས་གཉེན་མཆོག །རྗེ་བཙུན་བླ་མའི་ཞབས་ལ་གསོལ་བ་འདེབས། །
ཞེས་གསུངས་པ་ལྟར། དེའི་རྗེས་སུ་ཆོས་རྗེ་ངག་དབང་ཆོས་འཕེལ་ལམ་བློ་བཟང་ཆོས་འཕེལ་མཆོག་སྨད་རྒྱུད་པའི་ཁྲི་ལ་ཕེབས་པར་གསལ་ཡང་འཁྲུངས་གཤེགས་དང་། འབྱུང་ཁུངས་གསལ་བར་མ་རྙེད་པས་སླར་རྙེད་ན་འདིར་བསྣན་པར་བྱའོ། །
༦༠] ཆོས་ཀྱི་རྗེ་རྒྱལ་རོང་ཡེ་ཤེས་ཆོས་འཕེལ། [ བྱང་ཆོས་དང་། དགའ་ལྡན་ཁྲིར་ཕེབས། ]
ཤེས་བྱའི་སྒྱུ་འཕྲུལ་གར་གྱི་རྣམ་རོལ་བ། །ཡེ་ཤེས་ཐུགས་ཀྱི་ཕོ་ཉ་ས་གསུམ་གྱི། །
ལུང་རྟོགས་ཆོས་ཀུན་འཕེལ་མཛད་ཅི་ཡང་འཆར། །ཡོངས་འཛིན་རྗེ་བཙུན་བླ་མར་གསོལ་བ་འདེབས། །
ཞེས་འབྱུང་བ་ལྟར། དེའི་རྗེས་སུ་སྨད་རྒྱུད་པའི་མཁན་ཁྲིར་ཆོས་ཀྱི་རྗེ་རྒྱལ་རོང་ཡེ་ཤེས་ཆོས་འཕེལ་ཕེབས་པ་ཡིན་ཏེ། དམ་པ་འདི་ནི་འཁྲུངས་ཡུལ་ཁམས་དར་རྩེ་མདོ་ཡིན་ལ། ཆུང་གཞོན་ནུའི་དུས་ནས་རབ་ཏུ་བྱུང་ཞིང་དབུས་སུ་ཕེབས་ནས་འབྲས་རྒྱལ་རོང་ཁམས་ཚན་དུ་ཆོས་ཞུགས་མཛད་དེ་གཞུང་ཆེན་ཁག་ལ་ཐུགས་གཉེར་བརྩོན་འགྲུས་རྡོ་རུས་ཐོག་པར་མཛད་པས་གཞུང་དོན་ཚིག་སྤྱི་ཙམ་མ་ཡིན་པར་ལེགས་པར་དགོངས།
དཔལ་སྨད་རྒྱུད་གྲྭ་ཚང་དུ་ཕེབས་ནས་ཟབ་ལམ་རྒྱུད་སྡེ་བཞི་ལ་གསན་བསམ་དཔྱིས་པྱིན་པར་མཛད་པས་མདོ་སྔགས་རབ་འབྱམས་ལ་མཁས་པའི་བཤེས་གཉེན་ཆེན་པོར་གྱུར་ཏེ། སྨད་རྒྱུད་པའི་བླ་མ་ནས་མཁན་ཁྲིར་ཕེབས། དབྱར་དགུན་གྱི་ཆོས་ཐོག་སོ་སོའི་འཆད་ཉན་རྣམས་ཚུལ་བཞིན་དུ་མཛད་ནས་མཁན་པོའི་ལོ་དུས་གཙང་མཚམས་བྱང་རྩེའི་ཁྲི་ལ་ཕེབས་ཤིང་། དེ་ནས་རབ་བྱུང་བཅོ་ལྔ་པའི་ལྕགས་འབྲུག་ཕྱི་ལོ་ ༡༨༨༠ ལོར་དགའ་ལྡན་གསེར་གྱི་ཁྲི་ལ་ཕེབས་ནས། སྨོན་ལམ་ཆེན་མོའི་གྲལ་དབུར་ཕེབས་པ་སོགས་བསྟན་འགྲོའི་བྱ་བས་དུས་འདའ་བར་མཛད་བཞིན་པར་ལོ་བདུན་ཆ་ཚང་ཁྲི་ལོ་བསྐྱངས་པར་བཤད།
༦༡] ཆོས་རྗེ་འཇམ་དཔལ་ཚུལ་ཁྲིམས། [ བྱང་ཆོས་དང་། དགའ་ལྡན་ཁྲིར་ཕེབས། ]
འཇམ་དཔལ་སྙིང་པོའི་རིང་ལུགས་ཇི་བཞིན་དུ། །ཆོས་ཚུལ་ཀུན་འཛིན་ཚུལ་ཁྲིམས་འདུས་པའི་རྗེ། །
མཁྱེན་བརྩེའི་དཔལ་མངའ་ཟབ་རྒྱས་གདམས་པའི་གཏེར། །གསུམ་ལྡན་རྡོ་རྗེ་འཛིན་ལ་གསོལ་བ་འདེབས། །
ཞེས་འབྱུང་བ་ལྟར། དེའི་རྗེས་སུ་ཆོས་རྗེ་འཇམ་དཔལ་ཚུལ་ཁྲིམས་སྨད་རྒྱུད་པའི་ཁྲིར་ཕེབས་པ་ཡིན་ཏེ། དམ་པ་འདི་ནི་འཁྲུངས་ཡུལ་ཁམས་རྒྱལ་རོང་ཡིན་ལ། གཞོན་ནུའི་དུས་ནས་རབ་ཏུ་བྱུང་། དབུས་སུ་བྱོན་ནས་གཞུང་ཆེན་རྣམས་ལ་ཐུགས་གཉེར་གཞན་འགྲན་མི་བཟོད་པར་གནང་ཞིང་གྲྭ་སྐོར་གྱི་མཚན་རྟགས་ཐོན་རྗེས་དཔལ་ལྡན་སྨད་རྒྱུད་གྲྭ་ཚང་དུ་ཕེབས་ནས་སྔགས་ཕྱོགས་རྒྱུད་སྡེ་བཞི་ལ་གསན་བསམ་དཔྱིས་ཕྱིན་པར་མཛད།
སྨད་རྒྱུད་པའི་བླ་མ་གནང་རྗེས་མཁན་ཁྲིར་ཕེབས། དབྱར་དགུན་གྱི་ཆོས་ཐོག་སོ་སོའི་འཆད་ཉན་རྣམས་ཆ་ལག་ཡོངས་སུ་རྫོགས་པ་ལོ་དུས་རྫོགས་ཀྱི་བར་ལེགས་པར་མཛད། བྱང་རྩེ་ཆོས་རྗེའི་ཁྲི་ལ་ཕེབས་རྗེས་དགའ་ལྡན་གསེར་གྱི་ཁྲི་ལ་འཁོད་ནས་ཆོས་འཁོར་བསྐོར་བཞིན་རབ་བྱུང་བཅོ་ལྔ་པའི་ལྕགས་སྟག་ནས་དེ་གའི་མེ་སྤྲེལ་བར་སྟེ་ཕྱི་ལོ་ ༡༨༩༠ ནས་ ༡༨༩༦ བར་ཁྲི་ལོ་བདུན་ཚང་བར་བསྐྱངས་སོ། །
རྒྱལ་བའི་མཛད་པ་བསྒྲུབ་ལ་འཇམ་དབྱངས་ལྟར། །བློ་དང་སྤོབས་པ་བརྩོན་འགྲུས་མཆོག་དང་ལྡན། །
དོན་གཉིས་ལྷུན་གྱིས་གྲུབ་པའི་རྒྱལ་ཚབ་ཆེར། །དབང་སྒྱུར་རྗེ་བཙུན་བླ་མར་གསོལ་བ་འདེབས། །
ཞེས་འབྱུང་བ་ལྟར། འདིའི་བར་དུ་འཆད་ཉན་ལོ་དུས་ཚང་བར་མཛད་པའི་མཁན་ཐོག་ཅིག་བྱུང་སྣང་ཡང་མཚན་སྒྲ་མི་གསལ་བ་དང་། འཁྲུངས་གཤེགས་ལོ་དུས་དང་། གདན་ས་གང་ནས་ཕེབས་པ་སོགས་ལོ་རྒྱུས་མ་རྙེད་པས་སླར་རྙེད་ན་འདིར་བསྣན་པར་བྱའོ། །
༦༣] ཏྲེ་ཧོར་ཁང་གསར་སྐྱབས་མགོན་སྐུ་ཕྲེང་དང་པོ་རྗེ་བཙུན་བློ་བཟང་ཚུལ་ཁྲིམས།
དེའི་རྗེས་སུ་ཏྲེ་ཧོར་ཁང་གསར་སྐྱབས་མགོན་སྐུ་ཕྲེང་དང་པོ་རྗེ་བཙུན་བློ་བཟང་ཚུལ་ཁྲིམས་དཔལ་བཟང་པོ་མཆོག་སྨད་རྒྱུད་པའི་མཁན་ཁྲིར་ཕེབས་པ་ཡིན། དམ་པ་འདིའི་རྣམ་ཐར་རྒྱས་པ་དགའ་ལྡན་ཁྲི་ཟུར་བྱམས་པ་ཆོས་གྲགས་ཀྱིས་མཛད་པའི་ [ རྣམ་ཐར་དད་པའི་པདྨོ་བཞད་པའི་ཉིན་འབྱེད་ ] བྱ་བ་དེ་ཉིད་ལས་འདིར་ཤིན་ཏུ་སྙིང་བསྡུས་སུ་དགོད་པར་བྱ་བ་སྟེ། དམ་པ་འདི་ཏྲེ་ཧོར་དཀར་མཛེས་སུ་རིགས་རུས་ཕུན་སུམ་ཚོགས་པའི་སྲས་སུ་ཕྱི་ལོ་ ༡༨༣༨ ལོར་བཟང་པོའི་སྔ་ལྟས་ངོ་མཚར་བ་དང་བཅས་སྐུ་འཁྲུངས། ཆོས་རྗེ་ཚུལ་ཁྲིམས་རྒྱ་མཚོའི་ཡང་སྲིད་འཁྲུལ་བྲལ་དུ་ངོས་འཛིན་བྱུང་རྗེས་དབུས་འགྱུར་ཆོས་ཀྱི་ཞིང་སར་ཕེབས། འབྲས་བློ་གླིང་གྲྭ་ཚང་དུ་ཆོས་ཞུགས་མཛད་དེ་གཞུང་ཆེན་ཁག་ལ་སློབ་གཉེར་ལ་འགྲུས་པར་མཛད། ཕྱིར་རེ་ཞིག་རང་ཡུལ་ཏྲེ་ཤོད་ཡུལ་དུ་ཞབས་སོར་འཁོད་དེ་ཁུལ་དེའི་དམ་པ་དུ་མའི་དྲུང་ནས་དབང་ལུང་མན་ངག་རྒྱ་ཆེར་གསན།
ཕྱི་ལོ་ ༡༨༦༦ ལོར་སླར་ཡང་དབུས་སུ་བྱོན་ཏེ་རང་གི་གདན་ས་འབྲས་བློ་གླིང་གྲྭ་ཚང་དུ་ཐེམ་པ་རིམ་འཛེགས་ཀྱིས་གཞུང་ཆེན་བཀའ་པོད་ལྔ་ལ་སློབ་གཉེར་མཐིལ་ཕྱིན་པར་མཛད་དེ་སྨོན་ལམ་ཆེན་མོར་གྲྭ་སྐོར་དམ་བཅའ་བཞག་སྟེ་མཁས་པའི་གྲགས་པ་ཐོབ་ཅིང་དབུས་ཁུལ་དུ་བྱང་ཆུབ་ལམ་རིམ་སོགས་བཀའ་ཆོས་མང་དུ་གནང་།
གསང་ཆེན་རྒྱུད་སྡེ་རྒྱ་མཚོར་གསན་སྦྱོང་མཛད་བཞེད་ཀྱིས་དཔལ་ལྡན་སྨད་རྒྱུད་གྲྭ་ཚང་དུ་ཞོག་དང་པོའི་ཆོས་ཐོག་ཏུ་ཞུགས། གྲྭ་རྐྱང་གི་བརྟུལ་ཞུགས་བཟུང་སྟེ་དཀའ་སྤྱད་ཆེན་པོས་རྒྱུད་པའི་འཆད་ཉན་རྗེ་ཤེར་སེང་གི་ཊཱིཀྐ་དང་། བཤད་པ་རྡོ་ལག་བརྒྱུད་དམ་ཆོས་འགྲེལ་པ་བཞི་སྦྲགས་དང་མན་ངག་རྡོ་ལག་བརྒྱུད་བསྐྱེད་རྫོགས་གཉིས། དམར་ཁྲིད་རྡོ་ལག་བརྒྱུད་རིམ་ལྔའི་དམར་ཁྲིད་སོགས་ལ་གསན་བསམ་སྒོམ་གསུམ་ཤིན་ཏུ་འགྲུས་པར་མཛད། རྒྱུད་པའི་ཆོས་ཐོག་ཕེབས་ཡུལ་ཚོགས་མཆོད་ཨེ་ཝཾ་དང་། ཞོགས་དང་གཉིས། སྟག་རྩེ། འཕན་པོ། བདེ་ཆེན། ཚལ། འབྲས་ཧར་གདོང་། སེ་ར་ཧར་གདོང་། སེ་ར་ཆོས་སྡིངས། དབྱར་ཆོས་ཕྱི་མིག་ལུང་སོགས་སུ་འདུས་མང་དང་ལྷན་དུ་ཕེབས་ཏེ་ཆོས་ཐོག་སོ་སོའི་ཆོས་འཆད་ཉན་ལ་བརྩོན་པར་མཛད།
ཕྱི་ལོ་ ༡༨༦༧ ཙམ་ལ་སླར་ཡང་ཁམས་སུ་ཕེབས་ཏེ་རྫ་སེར་ཤུལ་དང་ཧོར་ཁོག་དགོན་སྡེ་བཅུ་གསུམ། ལི་ཐང་། དཀར་མཛེས་སོགས་ཁུལ་དེ་དག་ཏུ་བསྟན་པ་དང་འགྲོ་བའི་དོན་རྒྱ་ཆེར་མཛད། ཕྱི་ལོ་༡༨༨༩ ལོར་སླར་ཡང་དབུས་སུ་བྱོན་ཏེ་ར་ས་འཕྲུལ་སྣང་གི་གཙུག་ལག་ཁང་དུ་ཕེབས། རྟེན་མཇལ་ཞིབ་པར་མཛད་དེ་ཐུགས་སྨོན་གནང་། སྐྱབས་མགོན་༧རྒྱལ་དབང་ཐམས་ཅད་མཁྱེན་པར་འབྱོར་ཕྱག་ལུགས་མཐུན་ཞུས།
དུས་དེ་ཙམ་ན་དམ་པ་འདི་ལ་རྒྱུད་པའི་བླ་མ་དབུ་མཛད་དུ་བསྐོ་བཞག་གནང་སྟེ་ཕྱི་ལོ་ ༡༨༨༩ ལོར་བླ་མའི་ཁྲི་སྟོན་གནང་སྟེ་བླ་མའི་ཞུ་སྒོ་ལེགས་པར་བསྐྱངས། དེ་ནས་ཕལ་ཆེར་ལོ་དེ་ཉིད་དུ་སྐྱེས་མཆོག་འདི་དཔལ་ལྡན་སྨད་རྒྱུད་གྲྭ་ཚང་གི་མཁན་པོ་མཛད་དགོས་ཀྱི་བཀའ་བསྩལ། ཞོགས་དང་པོར་དཔལ་ལྡན་སྨད་རྒྱུད་གྲྭ་ཚང་གི་མཁན་ཁྲིར་མངའ་གསོལ། ཞོགས་གཉིས་པའི་ཊཱིཀྐའི་བརྩི་བཞག་དང་། གསང་འདུས་བསྐྱེད་རིམ་གྱི་འཆད་ཉན་སོགས་སྔོན་གྱི་ཕྱག་སྲོལ་མ་ཉམས་པར་མཛད་ཅིང་། གྲྭ་ཚང་གི་སྒྲིག་ཁྲིམས་དམ་ཅིང་བཤད་སྒྲུབ་ཉམས་བཞེས་གོང་འཕེལ་ལ་ཐུགས་འཁུར་འགྲན་ཟླ་བྲལ་བ་བཞེས། དེ་ལྟར་ལོ་གཉིས་བར་གསང་སྔགས་བསྟན་པའི་འབྱུང་གནས་སྨད་རྒྱུད་གྲྭ་ཚང་དུ་མཁན་ཁྲིའི་མཛད་ཁུར་ལེགས་པར་བཞེས་ཏེ་དགོངས་ཞུ་གནང་ངོ་། །
དེ་ནས་བཀྲིས་ལྷུན་པོ་སོགས་སུ་ཕེབས་ཏེ་བསྟན་འགྲོའི་བྱ་བ་རྒྱ་ཆེར་མཛད་ཡོད་དོ། །ཟུར་མཆན། ཆོས་འབྱུང་འདིའི་མཆན་བུར་གསལ་བ་བཞིན། ལོ་གསུམ་འཆད་ཉན་མཛད་ཁོམ་མ་བྱུང་བ་རྣམས་ལ་བླ་བརྒྱུད་གསོལ་འདེབས་བཅུག་པའི་ཕྱག་སྲོལ་མེད་གསུངས་པ་ལྟར། ཏྲེ་ཧོར་ཁང་གསར་སྐྱབས་མགོན་དམ་པ་འདི་ཡང་ལོ་གཉིས་ལས་མཁན་པོ་མཛད་ཁོམ་མ་བྱུང་བས་མཁན་རྒྱུན་གསོལ་འདེབས་མེད་པ་གསལ་ལོ། ། [ དམ་པ་འདིའི་རྣམ་པར་ཐར་པ་རྒྱས་པ་ནི་དགའ་ལྡན་ཁྲི་ཟུར་བྱམས་པ་ཆོས་གྲགས་ཀྱིས་མཛད་པའི་རྣམ་ཐར་དད་པའི་པདྨོ་བཞད་པའི་ཉིན་བྱེད་དེ་ཉིད་དུ་བྱུང་བས་གཟིགས་འཚལ། ]
སྐལ་བཟང་སྐྱེ་རྒུ་ཡོངས་ཀྱི་དཔལ་དུ་ཤར། །རྣམ་མང་རྒྱུད་སྡེ་རྒྱ་མཚོའི་དོན་ལ་མཁས། །
རྒྱལ་བའི་མཛད་པ་མ་ལུས་སྒྲུབ་མཛད་པའི། །རྡོ་རྗེ་འཛིན་པའི་གཙོ་ལ་གསོལ་བ་འདེབས། །
ཞེས་འབྱུང་བ་ལྟར། དེའི་རྗེས་སུ་སྨད་རྒྱུད་པའི་མཁན་ཁྲིར་ཆོས་རྗེ་སྐལ་བཟང་རྣམ་རྒྱལ་མཆོག་ཕེབས་པ་ཡིན་ཏེ། དམ་པ་འདི་འཁྲུངས་ཡུལ་གཉལ་གྲ་འོར་ཞེས་པ་དེ་ཡིན་ཞིང་། གྲ་འོར་དགོན་དུ་རབ་ཏུ་བྱུང་ནས་སེར་བྱེས་གྲྭ་ཚང་དུ་སློབ་གཉེར་མཛད། ཕྱིས་སུ་དགེ་བཤེས་གྱི་མཚན་རྟགས་བཞེས་ནས་རྒྱུད་ལ་ཕེབས་ཏེ་རྒྱུད་པའི་མཁན་པོར་བྱོན་ནས་འཆད་ཉན་ལོ་དུས་ཚང་བར་མཛད་སྣང་།
འདི་གྲྭ་རྐྱང་སྐབས་ཡོངས་འཛིན་ཕུར་ལྕོག་པས་མཚོ་ཊཱིཀ་པར་གསར་བཞེངས་སྐབས་གཉལ་གྲ་འོར་དགོན་པར་མ་དཔེར་ལེན་པར་མངགས་གཏོང་མཛད་ལུགས་༧རྒྱལ་དབང་སྐུ་ཕྲེང་བཅུ་གསུམ་པའི་མཛད་རྣམ་དེབ་གྱི་ཤོག་གྲངས་ ༡༦༣ དུ་རྗེས་སུ་རྒྱུད་སྨད་མཁན་པོ་བྱེད་མི་སེར་བྱེས་གཉལ་དགེ་བཤེས་སྐལ་བཟང་རྣམ་རྒྱལ་དང་། ཞེས་འཁོད་སྣང་ངོ་། །
འདིའི་མཚན་བརྒྱུད་འདེབས་བསྡུས་པར་སྐལ་བཟང་མཁས་གྲུབ་ཅེས་འགོད་ནོར་ཤོར་འདུག །
༦༥] ཆོས་ཀྱི་རྗེ་བློ་བཟང་རྒྱལ་མཚན། [ བྱང་ཆོས་དང་། དགའ་ལྡན་ཁྲིར་ཕེབས། ]
བློ་བཟང་རྒྱལ་བའི་གསང་གསུམ་འདབ་བརྒྱའི་ཚལ། །ཚུལ་ཁྲིམས་སྦྲང་རྩིས་གཏམས་ཤིང་བསྟན་པའི་ཁུར། །
ཡོངས་བཟུང་བཤད་སྒྲུབ་རྒྱལ་མཚན་འཛིན་པ་ལ། །མཉམ་མེད་མཆོག་གི་སྤྲུལ་སྐུར་གསོལ་བ་འདེབས། །
ཞེས་གསུངས་པ་ལྟར། དེའེ་རྗེས་སུ་སྨད་རྒྱུད་པའི་མཁན་ཁྲིར་ཆོས་ཀྱི་རྗེ་བློ་བཟང་རྒྱལ་མཚན་མཆོག་ཕེབས་པ་ཡིན་ཏེ། དམ་པ་འདི་ནི་འཁྲུངས་ཡུལ་གཙང་། སེར་བྱེས་གྲྭ་ཚང་དུ་གཞུང་ཆེན་རྣམས་ལ་ཐུགས་གཉེར་གནང་ནས་གྲྭ་སྐོར་མཚན་རྟགས་སྤྱི་མཚུངས་ལྟར་བཞེས།
དཔལ་ལྡན་སྨད་རྒྱུད་དུ་ཕེབས་ནས་སྔགས་ཕྱོགས་སྐོར་ལ་གསན་སྦྱོང་མཛད་དེ་སྔགས་ཀྱི་དམ་བཅའ་བཞག་ནས་བླ་མ་དང་མཁན་ཁྲིར་རིམ་བཞིན་ཕེབས། ཆོས་ཐོག་སོ་སོའི་འཆད་ཉན་རྣམས་མཁན་པོའི་ལོ་དུས་རྫོགས་ཀྱི་བར་དུ་ཆད་ལུས་མེད་པར་འཐུས་གཙང་གནང་ནས་བྱང་རྩེ་ཆོས་རྗེའི་ཁྲིར་ཕེབས།
དེ་ནས་རབ་བྱུང་བཅོ་ལྔ་པའི་ལྕགས་གླང་སྟེ་ཕྱི་ལོ་ ༡༩༠༡ ལོར་དགའ་ལྡན་གསེར་གྱི་ཁྲིར་ཕེབས། ཆོ་འཕྲུལ་སྨོན་ལམ་ཆེན་མོའི་གྲལ་དབུར་མཛད་པ་སོགས་ཆོས་འཁོར་རྒྱུན་མི་ཆད་དུ་བསྐོར་ཞིང་རབ་བྱུང་དེ་གའི་མེ་ལུག་གི་བར་དུ་ཁྲི་པ་ལོ་བདུན་མཛད་པར་བཤད། ཁྲི་ཟུར་ནས་༧གོང་ས་བཅུ་གསུམ་པ་ཆེན་པོ་རྒྱ་སོག་གི་ཡུལ་གྲུ་རྣམས་སུ་ཆིབས་སྒྱུར་སྐབས་ཁོང་རྒྱལ་ཚབ་མཛད་དེ་ཕྱི་གླིང་ཨིན་ཇིའི་རྒོལ་ཟིང་ལ་གདོང་ལེན་མཛད་པ་སོགས་ཀྱིས་ལ་མོ་ཤར་ཁྲི་ཟུར་ཞེས་སྐབས་དེ་ཙམ་ནས་མཚན་སྙན་ཆེ་བ་བྱུང་སྣང་། ཕྱིས་སུ་ཉིད་ཀྱིས་བཞེངས་པའི་རྩེ་ཐུགས་རྗེ་ཆེན་པོའི་གཟུངས་གཞུག་ནང་ངན་གཏད་ཡོད་ལུགས་དབྱེན་བཅོས་པས་༧གོང་ས་བཅུ་གསུམ་པ་ཆེན་པོས་ནང་གཟུངས་རྣམས་ཕྱིར་བཏོན་ནས་སླར་ཕུལ་ཀྱང་སྐུའི་ནང་མ་ཆུགས་པའི་ལོ་རྒྱུས་སྣང་།
༦༦] མཁྱེན་རབ་ཡོན་ཏན་རྒྱ་མཚོ། [ བྱང་ཆོས་དང་། དགའ་ལྡན་ཁྲིར་ཕེབས། ]
ངོ་མཚར་བཀོད་པའི་ཚོགས་གཉིས་བསྲུབས་པ་ལས། །མ་སྨད་མཆོག་གི་བང་རིམ་མངོན་པར་མཐོར། །
ལེགས་གོམས་ཚུལ་གྱིས་གཞན་ཕན་ཉི་ཟླས་བརྒྱན། །རྣམ་དག་ཁྲིམས་ལྡན་དབང་པོར་གསོལ་བ་འདེབས། །
ཞེས་འབྱུང་བ་ལྟར། འདི་ཡང་མཚན་སྒྲ་མི་གསལ་ཡང་གོང་འོག་གི་བབ་ལས་མཁྱེན་རབ་ཡོན་ཏན་རྒྱ་མཚོ་མཆོག་རྒྱུད་སྨད་ཀྱི་ཁྲིར་བྱོན་པར་མངོན་ཏེ། དམ་པ་འདི་ནི་འཁྲུངས་ཡུལ་དབུ་འབྲི་ཁུང་དང་། འབྲས་ཏྲེ་ཧོར་ཁང་ཚན་དུ་ཞུགས་ནས་གཞུང་ཆེན་ལ་ཐུགས་གཉེར་མཛད་རྗེས་དཔལ་ལྡན་སྨད་རྒྱུད་དུ་ཕེབས་ནས་མཁན་ཁྲིིར་བྱོན་ཏེ་འཆད་ཉན་མཛད།
བྱང་རྩེ་བརྒྱུད་ནས་རབ་བྱུང་བཅོ་ལྔ་པའི་ཤིང་སྟག་སྟེ་ཕྱི་ལོ་ ༡༩༡༤ ལོར་དགའ་ལྡན་གསེར་གྱི་ཁྲི་ལ་ཕེབས་ནས་ཆོས་འཁོར་བསྐོར། རབ་བྱུང་དེ་གའི་ས་ལུག་བར་ལོ་དྲུག་རིང་ཁྲི་བ་མཛད། འདིས་ཕྱོགས་བསྡུས་མཛད་པའི་རྡོར་དབྱིངས་ཀྱི་སྒྲུབ་དཀྱིལ་ཞིག་འདུག་པ་ད་ལྟ་དགའ་ལྡན་ཚ་བ་དང་བསམ་བློ་གཉིས་ཀྱིས་སྟག་རྩེ་སྒྲུབ་མཆོད་སྐབས་གསུང་གིན་ཡོད་འདུག །