གདན་རབས་རིམ་བྱོན་གྱི་མཚན་ཐོ། རྗེ་བཙུན་ཤེས་རབ་སེང་གེས་དཔལ་ལྡན་སྨད་རྒྱུད་གྲྭ་ཚང་ཕྱག་བཏབ་པ་ནས་ད་ལྟའི་ [ ༢༠༢༣ ] བར་དུ། འཆད་ཉན་གྱི་བླ་རབས་སམ་གདན་རབས་རིམ་པར་བྱོན་ཏེ་སྔར་སྲོལ་རྒྱུད་འགྲེལ་ཆེན་མོ་སོགས་ཀྱི་འཆད་ཉན་གྱི་རྒྱུན་གང་ཡོད་མི་ཉམས་རྒྱུན་འཛིན་དང་གོང་སྤེལ་གནང་བ་སོགས་ཀྱིས་མཚོན་བསྟན་འགྲོའི་དོན་རླབས་ཆེན་མཛད་པའི་གྲྭ་ཚང་གི་གདན་རབས་རིམ་བྱོན་གྱི་སྐོར་རམ་ངོ་སྤྲོད་བཞུགས།
༩༦] དགེ་བཤེས་མཐུ་སྟོབས་མགོན་པོ།
ཐུབ་པས་རྗེས་བསྟན་མདོ་རྒྱུད་རྒྱ་མཚོའི་གཞུང་། །མངོན་པར་བྱང་ཆུབ་ཚུལ་བཞིན་སྒྲུབ་པའི་མཐུ། །
སྟོབས་སོགས་ཡོན་ཏན་ཚོགས་ལ་དབང་འབྱོར་མགོན། །རིགས་བརྒྱའི་བྱེད་པོ་མཆོག་ལ་གསོལ་བ་འདེབས། །
ཞེས་འབྱུང་བ་ལྟར། དེའི་རྗེས་སུ་འབྲས་བློ་གླིང་དགེ་བཤེས་མཐུ་སྟོབས་མགོན་པོ་མཆོག་མཁན་ཁྲིར་ཕེབས་པ་སྟེ། དམ་པ་འདི་ཁམས་ཏྲེ་ཧོར་དཀར་མཛེས་ཀ་བྲག་གཞིས་སྔོན་ཚང་དུ་ཡབ་རྣམ་རྒྱལ་རྡོ་རྗེ་དང་ཡུམ་བསོད་ནམས་དཔལ་འཛོམས་གཉིས་ཀྱི་སྲས་སུ་ཕྱི་ལོ་ ༡༩༣༡ ལོར་སྐུ་འཁྲུངས། དགུང་ལོ་བདུན་ཙམ་ནས་དགེ་ཚེ་རྣམ་སོགས་ཀྱི་དྲུང་ནས་ཡི་གེ་འབྲི་ཀློག་དང་བརྡ་སྤྲོད་རིག་པར་ཡང་སྦྱངས།
དགུང་ལོ་ཉི་ཤུ་དང་ཕྱི་ལོ་ ༡༩༥༠ ལོར་མཁས་པའི་དབང་པོ་སེར་བྱེས་མཁན་ཟུར་བློ་བཟང་དབང་ཕྱུག་མཆོག་གི་དྲུང་ནས་བྱང་ཆུབ་ལམ་རིམ་ཆེན་མོ། གསང་བདེ་འཇིགས་གསུམ་གྱི་དབང་། བླ་མཆོད་བཀའ་ཁྲིད་གསན་ཅིང་། གཞན་ཡང་བུ་རམ་སྣ་རིན་པོ་ཆེ་དང་བྱ་བྲལ་བླ་མ་འཇམ་དབྱངས་རིན་པོ་ཆེ་གཙོས་སྐྱེས་ཆེན་དུ་མའི་དྲུང་ནས་གསུང་ཆོས་མང་དུ་གསན། དགུང་ལོ་ཉེར་བཞི་པ་ཕྱི་ལོ་ ༡༩༥༤ ལོར་བོད་དབུས་སུ་བྱོན་ཏེ་ལྷ་ལྡན་སྨོན་ལམ་ཆེན་མོར་མང་ཇ་དང་དངུལ་ཊམ་གཉིས་རེའི་མ་ཐེབས་འཇོག་གནང་མཛད། ༧གོང་ས་སྐྱབས་མགོན་ཡབ་སྲས་གསུམ་གྱི་དྲུང་ནས་གསུང་ཆོས་མང་དུ་གསན། མེ་སྤྲེལ་ཕྱི་ལོ་ ༡༩༥༧ ལོར་མཁས་མང་བློ་གསལ་བྱེ་བའི་གླིང་གྲྭ་ཚང་དུ་ཆོས་སྒོར་ཞུགས།
སྐྱབས་རྗེ་ཡོངས་འཛིན་གླིང་རིན་པོ་ཆེའི་ཞལ་སྔ་ནས་དགེ་ཚུལ་གྱི་སྡོམ་པ་ཞུས། འབྲལ་བློ་གླིང་ཏྲེ་ཧོར་མཁན་ཟུར་རྗེ་བཙུན་བློ་བཟང་ཉི་མ་མཆོག་རྩ་བའི་ཡོངས་འཛིན་དུ་བསྟེན་པ་དང་། གཞན་ཡང་དགེ་བའི་བཤེས་གཉེན་དངོས་གྲུབ་དང་། ཤག་སྐོར་མཁན་རིན་པོ་ཆེ་ཉི་མ་རྒྱལ་མཚན། ཚུལ་ཁང་བླ་མ་རིན་པོ་ཆེ་བཅས་ཀྱི་ཞབས་ལ་གཏུགས་ནས་བསྡུས་གྲྭ་ནས་བཟུང་གཞུང་ཆེན་བཀའ་པོད་ལྔ་ལ་གསན་བསམ་སློབ་གཉེར་གནང་མུས་སྐབས་ཕྱི་ལོ་ ༡༩༥༩ ལོར་བོད་སྤྱི་ལ་དུས་འགྱུར་བྱུང་སྐབས་༧གོང་ས་༧སྐྱབས་མགོན་ཆེན་པོའི་ཞབས་རྗེས་སུ་བསྙེགས་ཏེ་རྒྱ་གར་འཕགས་པའི་ཡུལ་དུ་བཙན་བྱོལ་དུ་ཕེབས། རྒྱ་གར་ཌལ་ཧོར་དུ་ལོ་གཉིས་ཙམ་བཞུགས་རིང་༧གོང་ས་སྐྱབས་མགོན་ཡབ་སྲས་གསུམ་དང་། བྱ་བཏང་གི་རྣལ་འབྱོར་པ་ཏྲེ་ཧོར་སྐྱོར་དཔོན་རིན་པོ་ཆེའི་དྲུང་ནས་མདོ་སྔགས་ཀྱི་དབང་ལུང་མན་ངག་སོགས་ཟབ་ཆོས་དུ་མ་གསན། སྐྱབས་རྗེ་ཡོངས་འཛིན་ཁྲི་བྱང་རྡོ་རྗེ་འཆང་ཆེན་པོའི་དྲུང་ནས་བསྙེན་པར་རྫོགས་པ་དགེ་སློང་གི་སྡོམ་པ་མནོས།
༡༩༦༡ ལོ་ནས་སྦག་ས་ཆོས་སྒར་དང་། མོན་གྷོཌི་གཞིས་སྒར་དུ་འབྲས་བློ་གླིང་ཆོས་སྒར་དུ་ཤག་སྐོར་མཁན་རིན་པོ་ཆེ་དང་། སེར་བྱེས་མཁན་ཟུར་བློ་བཟང་དབང་ཕྱུག །བློ་གླིང་མཁན་ཟུར་རྗེ་བཙུན་བློ་བཟང་ཉི་མ་སོགས་མཁས་གྲུབ་གཉིས་ལྡན་གྱི་དགེ་བའི་བཤེས་གཉེན་དུ་མ་ཚུལ་བཞིན་བསྟེན་ནས་གཞུང་ཆེན་ཁག་ལ་ཐུགས་བརྩོན་རྒྱ་ཆེར་གནང་། ཕྱི་ལོ་ ༡༩༨༠ ལོར་དགེ་ལྡན་རྒྱུགས་སྤྲོད་ཁག་ལེགས་ཕུལ་གྱིས་ཨང་དང་པོའི་གྲས་སུ་འཁོད། མེ་ཡོས་ཕྱི་ལོ་ ༡༩༨༧ ལོར་གདན་གསུམ་དུ་གྲྭ་སྐོར་དམ་འཇོག་མཛད་དེ་དགེ་བཤེས་ལྷ་རམས་པའི་མཚན་གནས་བཞེས། ས་སྦྲུལ་ཕྱི་་ལོ་ ༡༩༨༩ ལོར་དཔལ་ལྡན་སྨད་རྒྱུད་གྲྭ་ཚང་དུ་ཞུགས་ཏེ་སྐབས་དེའི་མཁན་པོ་སྒོ་སོག་གསུང་རབ་རིན་པོ་ཆེའི་དྲུང་ནས་འགྲེལ་པ་བཞི་སྦྲགས་ཀྱི་གཙོས་བདེ་གསང་འཇིགས་གསུམ་གྱི་བསྐྱེད་རྫོགས་སོགས་རྒྱུད་སྡེ་བཞི་ལ་གསན་བསམ་སློབ་གཉེར་ལ་འགྲུས་པར་མཛད། ཕྱི་ལོ་ ༡༩༩༠ ལོར་སེ་ར་ཐེག་ཆེན་གླིང་དུ་༧གོང་ས་སྐྱབས་མགོན་ཆེན་པོ་དབུ་བཞུགས་ཐོག དམིགས་བསལ་སྔགས་ཀྱི་རྩོད་རྒྱུགས་ཤིག་བཞེས་སྐབས་དམ་པ་འདི་རྩོད་རྒྱུགས་ཨང་དང་པོའི་གྲས་སུ་སོན། ཕྱི་ལོ་ ༡༩༩༢ ལོར་འབྲས་བློ་གསལ་གླིང་གི་དགེ་སྐོས་བཞེངས་པ་དང་། ཕྱི་ལོ་ ༡༩༩༤ ལོར་དཔལ་ལྡན་སྨད་རྒྱུད་གྲྭ་ཚང་གི་དགེ་སྐོས་བཞེངས་ཏེ་སོ་སོར་སྒྲིག་སྡོམ་ཐུགས་འགན་ཆེ་བཞེས་གནང་།
ཕྱི་ལོ་ ༡༩༩༥ ལོར་སྨད་རྒྱུད་དུ་ཁྲིད་ཁང་སྐྱོར་དཔོན་གནང་། བོད་རྒྱལ་ལོ་ ༢༡༢༦ ཟླ་བ་ ༨ ཚེས་ ༡༠ དང་ཕྱི་ལོ་ ༡༩༩༩ ཟླ་བ་ ༩ ཚེས་ ༢༠ དགེ་བར་༧གོང་ས་སྐྱབས་མགོན་ཆེན་པོའི་ཞལ་སྔ་ནས་རྒྱུད་སྨད་དུ་ལྟ་ཁྲིད་དྲན་པ་བཞི་ལྡན་གྱི་བཀའ་ཁྲིད་སྩོལ་སྐབས་དམ་པ་འདི་ལ་བླ་མ་དབུ་མཛད་དུ་བསྐོ་བཞག་གི་ཕྱག་རྟགས་རིན་པོ་ཆེ་སྤྱི་ཕེབས་བྱུང་བ་ལྟར་གྲྭ་ཚང་གི་སྒྲིག་ཁྲིམས་མི་ཉམས་གོང་འཕེལ་དུ་མཛད། རྒྱུད་པའི་སྒྲིག་ཡིག་ཆེན་མོར་སྣོན་འཕྲི་ལེགས་བཅོས་དགོས་པའི་བཀའ་ཁྱབ་གནང་དོན་བཞིན་ལེགས་བཅོས་ལྷན་ཚོགས་བསྐྱངས་ཏེ་ལེགས་གྲུབ་ བྱུང་། གཞན་ཡང་དགེ་བཤེས་རྣམས་བདུན་རེའི་ནང་དམ་བཅའ་རེ་འཚོག་རྒྱུ། དགེ་འདུན་བསྟར་ཆགས་སུ་བསྙེན་ཆེན་བཞུགས་མཁན་གྱི་ལམ་སྲོལ་གཏན་འབེབས། དགེ་འདུན་རྒྱུད་ལ་ཞུགས་ཟིན་དང་ཞུགས་འགྱུར་སུ་ཡང་དོལ་རྒྱལ་སྐོར་མནའ་སྐྱེལ་དམ་བཅའ་བྱེད་དགོས་པ། སྔགས་རམས་རྒན་པ་ཚོར་གྲྭ་ཤག་གི་མཐུན་རྐྱེན་དམིགས་བསལ་སྤྲོད་པ། རྡུལ་ཚོན་གྱི་དཀྱིལ་འཁོར་སློབ་གཉེར་བ་འཕར་མ་གསར་གཏོད་གནང་བ། འདུས་མང་སྤྱི་ཐབ་དཀར་ཟས་བསྟེན་པའི་སྲོལ་བཟང་བཙུགས་པ། རྗེ་བཙུན་ཤེས་རབ་སེངྒེའི་གསུང་རྒྱུད་ཀྱི་ཊཱིཀྐའི་ལུང་རྒྱུན་དཀོན་སྟབས་སྐྱབས་མཆོག་ལྡན་མ་བློ་ཆོས་རིན་པོ་ཆེའི་ཞལ་སྔ་ནས་འདུས་མང་ལ་ཊཱིཀྐའི་ལྗགས་ལུང་གོ་སྒྲིག་གནང་བ་སོགས། གང་ལ་དེ་འཚམས་ཀྱིས་གྲྭ་ཚང་རིན་པོ་ཆེར་བཀྲིན་ཆེ་བར་མཛད།
དེ་ལྟར་བླ་མ་ལོ་གསུམ་གཙང་བར་ཟིན་རྗེས་སྤྱི་ལོ་ ༢༠༠༢ ལོར་མཁན་ཁྲིར་ཕེབས་ཏེ་ལོ་གསུམ་རིང་དམ་ཆོས་འགྲེལ་པ་བཞི་སྦྲགས་ཀྱིས་གཙོས་བདེ་གསང་འཇིགས་གསུམ་གྱི་བསྐྱེད་རྫོགས་སོགས་གྲྭ་ཚང་རིན་པོ་ཆེའི་ཕྱག་བཞེས་སུ་ཡོད་པའི་འཆད་ཉན་གྱི་རིགས་ཆད་ལུས་མེད་པར་འབད་པ་ཆེན་པོས་གནང་། ཕྱི་ལོ་ ༢༠༠༥ ལོར་མཁན་པོ་ཟུར་ནས་ཕྱི་ལོ་ ༢༠༠༦ ལོར་༧གོང་ས་སྐྱབས་མགོན་ཆེན་པོའི་ཕྱག་རྟགས་སྤྱི་ཕེབས་ལྟར་དཔལ་ལྡན་སྲད་རྒྱུད་གྲྭ་ཚང་གི་མཁན་ཁྲིར་ཕེབས་ཏེ་འགྲེལ་པ་བཞི་སྦྲགས་སོགས་ཀྱི་འཆད་ཉན་དང་། གཞུང་ཆེན་ཁག་གི་དཔེ་ཁྲིད། ཁུལ་དེའི་མང་ཚོགས་ལ་ནང་ཆོས་ཀྱི་གོ་རྟོགས་སྤེལ་བ་སོགས་བསྟན་པའི་བྱ་བ་མཛད། སྲད་རྒྱུད་པའི་མཁན་ཁྲི་ལས་ཟུར་ཏེ་རང་གི་གདན་ས་འབྲས་སྤུངས་སུ་ཐུགས་དམ་ཉམས་བཞེས་ལ་གཞོལ་བཞིན་པའི་མུར་ཕྱི་ལོ་ ༢༠༢༢ ཕྱི་ཟླ་ ༠༣ པའི་ནང་གདུལ་བྱ་རྣམས་ལ་ཆོས་ཀྱི་གདམས་པ་མང་དུ་གསུངས་ཏེ་རེ་ཞིག་དགོངས་པ་ཞི་དབྱིངས་སུ་ཐིམ་ཚུལ་བསྟན་པ་དང་། སློབ་མ་གཙོ་བོར་གྱུར་པའི་གདུལ་བྱ་རྣམས་ཀྱི་དགོངས་རྫོགས་ཀྱི་མཆོད་སྤྲིན་རྒྱ་ཆེར་སྤྲོས་སོ། །
༩༧] དགེ་བཤེས་བློ་བཟང་བདེ་ལེགས་[དགེ་དབུ་མ་འཇུག་པ།]
གཞོན་ནུ་ཉིད་ནས་ངག་ལ་དབང་འབྱོར་མཐུས། །ཨ་བ་ཏྭ་རའི་མཚན་དཔལ་རབ་བཟོད་པ། །
བློ་བཟང་རྒྱལ་བའི་བདེ་སྟོང་ལེགས་སྤེལ་མཆོག །ཞྭ་སེར་རྒྱན་གྱུར་བླ་མར་གསོལ་བ་འདེབས། །
ཞེས་འབྱུང་བ་ལྟར། དེའི་རྗེས་སུ་སེར་བྱེས་དགེ་བཤེས་བློ་བཟང་བདེ་ལེགས་ [ དགེ་དབུ་མ་འཇུག་པ་ ] མཆོག་ནི་ཁམས་ཏྲེ་ཧོར་དཀར་མཛེས་མདའ་མདོ་གྲོང་དུ་ཡབ་ཚེ་དབང་ཕུན་ཚོགས་དང་ཡུམ་དོན་གྲུབ་ལྷ་མོ་གཉིས་ཀྱི་སྲས་སུ་ཕྱི་ལོ་ ༡༩༣༩ ལོར་སྐུ་འཁྲུངས། འཁྲུངས་གསར་རྡོ་རྗེ་འཆང་གིས་དམ་པ་འདི་ལ་བློ་བཟང་བདེ་ལེགས་ཞེས་མཚན་གསོལ་མཛད། དགུང་ལོ་དྲུག་ལ་སོན་སྐབས་དགེ་བཀྲ་རྒྱམ་གྱི་དྲུང་དུ་ཡོན་ཏན་ཀུན་གྱི་རྩོམ་གཞི་ཡི་གེ་འབྲི་ཀློག་ནས་འགོ་བརྩམས་ཏེ་གཞུང་ཆེན་རྒྱན་འཇུག་གཉིས་ལ་སོགས་པ་ཐུགས་འཛིན་གནང་། དགུང་ལོ་བདུན་གྱི་སྐབས་དགེ་ངག་དབང་བསྟན་འཛིན་མཆོག་ཁག་ཐེག་དགེ་རྒན་དུ་བསྟེན་ཏེ་དཀར་མཛེས་དགོན་མཚན་ཉིད་གྲྭ་ཚང་གི་ཆོས་སྒོར་ཞུགས་ནས་བློ་རྒྱུགས་འབུལ་སྐབས། དགུང་ལོ་ཆུང་ངུ་འདི་ལྟ་བུ་ནས་རྒྱན་འཇུག་གཉིས་བློ་རྒྱུགས་འབུལ་བ་ཞེས་ངོ་མཚར་དང་བསྔགས་པ་གསུངས་པ་ནས་བཏགས་མིང་ལ་དབུ་མ་འཇུག་པ་ཞེས་གྲགས།
དགུང་ལོ་བཅུ་གཅིག་སྐབས་འཁྲུངས་གསར་རྡོ་རྗེ་འཆང་བློ་བཟང་དཔལ་ལྡན་ངག་གི་དབང་ཕྱུག་དཔལ་བཟང་པོ་མཆོག་གི་ཞལ་སྔ་ནས་དགེ་ཚུལ་གྱི་སྡོམ་པ་ཞུས་ཏེ་མཚན་ལ་ངག་དབང་བཟོད་པ་ཞེས་གསོལ། ཕྱི་ལོ་ ༡༩༥༥ ལོར་དགུང་ལོ་བཅུ་བདུན་གྱི་སྐབས་དབུས་སུ་ཕེབས། ཏྲེ་ཧོར་དགེ་ཡ་མ་རྒྱ་མཚོ་ཁག་ཐེག་དགེ་རྒན་དུ་བསྟེན་ནས་སེར་བྱེས་གྲྭ་ཚང་དུ་ཆོས་སྒོར་ཞུགས་ཏེ་གཞུང་ཆེན་སློབ་གཉེར་འགྲུས་པར་གནང་། ཕྱི་ལོ་ ༡༩༥༩ ལོར་བཙན་བྱོལ་དུ་ཕེབས་ཏེ་བཀྲིན་ཟླ་མེད་༧གོང་ས་༧སྐྱབས་མགོན་བཅུ་བཞི་པ་ཆེན་པོ་དང་། སེར་བྱེས་མཁན་ཟུར་རིན་པོ་ཆེ་བློ་བཟང་དབང་ཕྱུག་དང་རྒྱུད་སྨད་མཁན་ཟུར་རིན་པོ་ཆེ་རྡོ་རྗེ་བཀྲིས་དཔལ་བཟང་པོ་སོགས་དགེ་བའི་བཤེས་གཉེན་དུ་མ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་ཏེ། སྦག་ས་ཆོས་སྒར་དུ་ལོ་བཅུ་དང་དེ་ནས་རིམ་བཞིན་ལྷོ་ཕྱོགས་སྦེལ་ཀོབ་གཞིས་ཆགས་སུ་མུ་མཐུད་ནས་མདོ་སྔགས་ཀྱི་གཞུང་ཆེན་རྣམས་བུམ་པ་གང་བྱོའི་ཚུལ་དུ་གསན་བསམ་རྒྱ་ཆེར་མཛད།
ཕྱི་ལོ་ ༡༩༦༩ ལོར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་མཁན་སློབ་སྦྲགས་མ་མཛད་ནས་བསྙེན་རྫོགས་ཀྱི་སྡོམ་པ་ཞུས། ཕྱི་ལོ་ ༡༩༨༢ ནས་ལོ་བདུན་རིང་དགེ་ལྡན་ལུགས་བཟང་གཙུག་ལག་སློབ་གཉེར་ཁང་གི་རྒྱུགས་སྤྲོད་ཆེན་མོའི་སྐབས། བཀའ་རམས་ནས་ལྷ་རམས་བར་གྱི་མཚན་གནས་ཨང་དང་པོ་ཤ་སྟག་བཞེས་པའི་ལེགས་སྐྱེས་སུ། བསྐྱེད་རིམ་དངོས་གྲུབ་རྒྱ་མཚོ་དང་རྗོགས་རིམ་རིམ་ལྔ་གསལ་སྒྲོན། རྗེ་ཤེས་རབ་སེངྒེས་མཛད་པའི་ཊཱིཀ་ཆེན་བཅས་བཞེས་གནང་མཛད། ཕྱི་ལོ་ ༡༩༨༥ ལོར་གནས་མཆོག་རྡོ་རྗེ་གདན་དུ་ལོ་དེའི་ལྷ་རམས་དགེ་བཤེས་རྣམས་དང་ལྷན་དུ་རིས་མེད་དགེ་འདུན་རྣམས་ཀྱི་སྤྱན་སྔར་དམ་འཇོག་གནང་། ཕྱི་ལོ་ ༡༩༨༨ ལོར་གནས་མཆོག་ཝ་རཱ་ཎ་སིར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་དབུས་གདན་གསུམ་འདུས་པ་རྒྱ་མཚོའི་མདུན་སར་དགེ་བཤེས་ལྷ་རམས་པའི་དམ་བཅའ་ཉིན་གཉིས་དང་། སླར་ཡང་ལོ་དེར་གདན་ས་གསུམ་དུ་ལྷ་ལྡན་སྨོན་ལམ་ཆེན་མོར་དམ་འཇོག་གནང་།
ཕྱི་ལོ་ ༡༩༨༩ ལོར་དཔལ་ལྡན་སྨད་རྒྱུད་གྲྭ་ཚང་དུ་སྒྲིག་ཞུགས་གནང་ནས་སྐབས་དེའི་མཁན་རིན་པོ་ཆེ་སྒོ་སོག་གསུང་རབ་རིན་པོ་ཆེའི་དྲུང་ནས་རྒྱུད་ཀྱི་འགྲེལ་པ་བཞི་སྦྲགས་ལ་སོགས་པས་རྒྱུད་པའི་ལོ་འཁོར་གཅིག་གི་འཆད་ཉན་རྣམས་ཆ་ཚང་ཞུས། ལོ་དེར་སེ་ར་ཆོས་སྒར་དུ་༧གོང་ས་མཆོག་དབུ་བཞུགས་ཐོག་རྒྱུད་སྨད་དགེ་བཤེས་ལྷ་རམས་པ་རྣམས་ཀྱིས་སྔགས་ཀྱི་རྩོད་རྒྱུགས་ཕུལ་བའི་འབྲས་རྟགས་སུ་མཚན་གནས་ཨང་དང་པོའི་གྲས་ཀྱི་ཕྱག་ཁྱེར་བཞེས། འཛིན་གྲྭ་དབུ་མའི་སྐབས་ནས་གཞན་ལ་དཔེ་ཁྲིད་གནང་རྒྱུའི་འགོ་བརྩམས། རིམ་བཞིན་དགེ་ཕྲུག་འཕེལ་རྒྱས་སུ་ཕྱིན་ཏེ་ཆོས་མཚམས་སྐབས་ཉིན་རེར་དཔེ་ཁྲིད་ཐེངས་བདུན་རེ་ཙམ་དང་། ཆོས་ཐོག་སྐབས་ཐེངས་དྲུག་སྐོར་ཕྱག་དཔེ་འཁྲེིད་གནང་སྟེ་བསྡུས་གྲྭ་ནས་འདུལ་མཛོད་བར་འཛིན་གྲྭ་བཅུ་དྲུག་གི་སློབ་མ་བརྒྱ་ཕྲག་དུ་མར་རྒྱུད་པའི་བླ་མ་དབུ་མཛད་མ་བཞེངས་བར་དཔེ་ཁྲིད་ཆད་མེད་གནང་བའི་ཐུགས་འགན་བཞེས།
ཕྱི་ལོ་ ༡༩༩༥ ལོར་དཔལ་ལྡན་སྨད་རྒྱུད་གྲྭ་ཚང་གི་དགེ་སྐོས་དང་དེའི་རྗེས་སེར་བྱེས་མཁས་སྙན་གྲྭ་ཚང་གི་དགེ་སྐོས་བཞེངས། ཕྱི་ལོ་ ༢༠༠༢ ལོར་སྤྱི་ནོར་༧གོང་ས་སྐྱབས་མགོན་ཆེན་པོ་གིས་དཔལ་ལྡན་སྨད་རྒྱུད་གྲྭ་ཚང་གི་བླ་མ་དབུ་མཛད་དུ་བསྐོ་བཞག་གི་ཕྱག་རྟགས་རིན་པོ་ཆེ་སྤྱི་ཕེབས་བྱུང་བ་ལྟར་ལོ་གསུམ་རིང་བླ་མའི་མཛད་འགན་གྲྭ་ཚང་རིན་པོ་ཆེའི་ཕྱག་སྲོལ་མི་ཉམས་གཅེས་འཛིན་འཐུས་གཙང་གནང་། ༢༠༠༥ ལོར་དཔལ་ལྡན་སྨད་རྒྱུད་པའི་མཁན་ཁྲིར་ཕེབས་ཏེ་དམ་ཆོས་འགྲེལ་པ་བཞི་སྦྲགས་ལ་སོགས་པའི་རྒྱུད་པའི་འཆད་ཉན་ཐམས་ཅད་ཉམས་པ་མེད་པར་ལོ་དུས་གཙང་གི་བར་ལེགས་པར་གནང་བ་མ་ཟད། དེའི་ཚེ་ན་དོན་གཉེར་ཅན་བརྒྱ་ཕྲག་བརྒལ་བར་བྱང་ཆུབ་ལམ་རིམ་ཆེན་མོ་དང་ལམ་རིམ་རྣམ་གྲོལ་ལག་བཅངས་བཅས་ཆ་ཚང་རེ་དང་རྒྱུན་དུ་དུས་ཚོད་གང་ཡོད་ལ་དཔེ་ཁྲིད་གནང་ནས་བསྟན་པར་སྲི་ཞུ་རླབས་པོ་ཆེ་བསྒྲུབས་པར་མཛད།
ཕྱི་ལོ་ ༢༠༡༡ ལོར་དཔལ་ལྡན་སྲད་རྒྱུད་གྲྭ་ཚང་གི་མཁན་ཁྲིར་ཕྱག་རྟགས་རིན་པོ་ཆེ་སྤྱི་ཕེབས་བྱུང་སྟེ་སྲད་རྒྱུད་པའི་ཁྲིར་ཕེབས། དེར་འཆད་ཉན་གནང་བཞིན་པའི་མུར་༧གོང་ས་ཆེན་པོས་སེར་བྱེས་མཁན་སྙན་གྲྭ་ཚང་གི་མཁན་པོར་བསྐོ་བཞག་གི་ཕྱག་རྟགས་རིན་པོ་ཆེ་སྤྱི་ཕེབས་བྱུང་བ་བཞིན་བཀའ་གསུང་དང་ལེན་ཞུས་ཏེ་ཕྱི་ལོ་ ༢༠༡༢ ལོར་མཁན་པོ་ཁྲི་སྟོན་གནང་ནས་དུས་ཡུན་ལོ་ལྔའི་རིང་སེར་བྱེས་གྲྭ་ཚང་གི་ཆོས་སྲིད་གང་ཅིའི་མཛད་འགན་ལེགས་པར་བསྐྱངས། ཁྱད་པར་༧གོང་ས་ཆེན་པོའི་བཀའ་དགོངས་ལྟར་དང་གྲྭ་ཚང་རང་ལའང་ཕྱག་སྲོལ་ཡོད་པ་བཞིན་སེར་བྱེས་ཆོས་ར་ཆེན་མོའི་ནང་འདུས་མང་ལ་བྱང་ཆུབ་ལམ་རིམ་ཆེན་མོའི་འཆད་ཁྲིད་ཟབ་རྒྱས་གནང་བས་དད་པའི་ཡུལ་དུ་གྱུར། དེང་གི་དུས་སུའང་སློབ་མ་བརྒྱ་ཕྲག་དུ་མ་ལ་གཞུང་ཆེན་ཁག་དཔེ་ཁྲིད་དང་སེམས་ལ་ཕན་པའི་བསླབ་བྱ་དང་དབང་ལུང་མན་ངག་སོགས་གནང་སྟེ་བསྟན་པའི་བྱ་བ་རྒྱ་ཆེར་མཛད་པའོ། །
༩༨] ཨ་ལགས་ཡོངས་འཛིན་སྤྲུལ་སྐུ་རྗེ་བཙུན་བློ་བཟང་ཡེ་ཤེས་བསྟན་པའི་རྒྱལ་མཚན།
བློ་བཟང་རྒྱལ་བའི་མདོ་རྒྱུད་གཞུང་ལུགས་ལ། །ཡེ་ཤེས་སྤྱན་གྱིས་གཟིགས་ཞིང་ལེགས་འདོམས་མཁས། །
བསྟན་པའི་དཔལ་གྱུར་ཟབ་ལམ་རིམ་གཉིས་ཀྱི། །རྒྱལ་མཚན་འཛིན་པའི་གཙོ་ལ་གསོལ་བ་འདེབས། །
ཞེས་འབྱུང་བ་ལྟར་འབྲས་སྒོ་མང་ཨ་ལགས་ཡོངས་འཛིན་སྤྲུལ་སྐུ་རྗེ་བཙུན་བློ་བཟང་ཡེ་ཤེས་བསྟན་པའི་རྒྱལ་མཚན་མཆོག་སྨད་རྒྱུད་པའི་མཁན་ཁྲིར་ཕེབས་པ་ཡིན་ཏེ། དམ་པ་འདིའི་སྐུ་ཕྲེང་དང་པོ་ཀུན་མཁྱེན་འཇམ་དབྱངས་བཞད་པ་སྐུ་ཕྲེང་བཞི་པའི་ཡོངས་འཛིན་རྡོ་སྦིས་ལྷ་རམས་པ་བསྟན་འཛིན་རྒྱ་མཚོ་མཆོག་དང་། སྐུ་ཕྲེང་གཉིས་པ་བླ་བྲང་བཀྲིས་འཁྱིལ་རྒྱུད་སྟོད་གྲྭ་ཚང་གི་མཁན་ཁྲིར་འཁོད་ཅིང་མདོ་སྔགས་གཞུང་ཆེན་ལ་མཁས་པའི་དབང་པོ་རྗེ་བཙུན་སྐལ་བཟང་དཔལ་འབྱོར་མཆོག་ཡིན་ལ། སྐུ་ཕྲེང་གསུམ་པ་ནི་མཁན་ཆེན་འདི་ཉིད་ཡིན། སྐྱེས་མཆོག་འདི་ཕྱི་ལོ་ ༡༩༦༣ ལོར་འཕགས་ཡུལ་རྡོ་རྗེ་གླིང་དུ་སྐུ་འཁྲུངས། སྐུ་ནར་སོན་པ་ན་སློབ་གྲྭར་ཞུགས་ཏེ་མཁྱེན་ཡོན་གྱི་རྨང་ཚུགས།
དགུང་ལོོ་བཅུ་བདུན་ཐོག་དགེ་ཚུལ་གྱི་སྡོམ་པ་མནོས་ཏེ་མཚན་ལ་ཡེ་ཤེས་མཐར་ཕྱིན་ཞེས་གསོལ། ཌེ་ར་ཌུན་ཁུལ་གྱི་ཀ་མན་ཊའོང་དུ་ཆགས་པའི་བྱེས་ཀྱི་ཆོས་གྲྭ་བཀྲིས་འཁྱིལ་གྱི་ཆོས་སྒོར་ཞུགས། ༧གོང་ས་སྐྱབས་མགོན་ཆེན་པོས་དམ་པ་འདི་ཉིད་དགུང་ལོ་བཅོ་བརྒྱད་པར་ཡོངས་འཛིན་ཚང་སྐུ་ཕྲེང་གཉིས་པའི་ཡང་སྲིད་འཁྲུལ་བྲལ་དུ་ངོས་འཛིན་ཕྱག་རྟགས་རིན་པོ་ཆེ་སྤྱི་ཕེབས་བྱུང་ཞིང་། ༧གོང་ས་མཆོག་གིས་གདན་སར་སློབ་གཉེར་ལ་ཕེབས་ཏེ་གསན་བསམ་སློབ་གཉེར་གནང་ཕྱོགས་སོགས་ཐུགས་བརྩེས་བཀའ་སློབ་ཕེབས། ལྷག་པར་༧གོང་ས་མཆོག་ནས་དམིགས་བརྩེ་མའི་དམིགས་རྣམ་སྐྱོང་ཚུལ་དང་། དྲང་ངེས་ལེགས་བཤད་སྙིང་པོ། སྐྱབས་སྨོན་ཚིགས་བཅད་མ་བཅས་བཀྲིན་བསྩལ། མི་རིང་བར་རྒྱ་གར་ལྷོ་ཕྱོགས་གདན་ས་འབྲས་སྒོ་མང་གྲྭ་ཚང་དུ་ཆོས་སྒོར་ཞུགས། མཁན་ཟུར་བསྟན་པ་བསྟན་འཛིན་མཆོག་བསམ་སྦྱོར་གཉིས་ཀྱིས་ཚུལ་བཞིན་བསྟེན་ནས་གཞུང་ཆེན་སློབ་གཉེར་ལ་འགྲུས་པར་མཛད་དེ་སློབ་གཉེར་བའི་ཁྲོད་དུ་མིག་དཔེར་འོས་པར་གྱུར།
དགུང་གྲངས་ཉི་ཤུ་པར་༧གོང་ས་སྐྱབསམགོན་ཆེན་པོའི་ཞལ་སྔ་ནས་དགེ་སློང་གི་བསླབ་སྡོམ་ཞུས་ཏེ་རབ་ཏུ་བཙུན་པའི་བརྟུལ་ཞུགས་བཟུང་། གང་གི་དགེ་བའི་བཤེས་གཉེན་བསྟན་པ་བསྟན་འཛིན་མཆོག་བསྙུང་གཞི་ལྕི་བར་བཞེས་སྐབས་དམ་པ་འདི་ཉིད་ནས་ལྷག་བསམ་རྣམ་དག་གིས་བསྙུན་གཡོག་གནང་། ཕྱི་ལོ་ ༡༩༩༠ ནས་གཞུང་ཆེན་སློབ་གཉེར་ལ་བརྩོན་པ་ཆེ་བསྐྱེད་མཛད་དེ་ཕྱག་དཔེ་ལེགས་གྲས་ཀྱི་མཚན་སྙན་བྱུང་ཞིང་དགེ་ལྡན་རྒྱུགས་སྤྲོད་ལ་ཞུགས་ཏེ་ལོ་བསྟུད་མར་ཨང་རིམ་རྩེ་མོར་སོན། ཕྱི་ལོ་ ༡༩༩༧ ལོར་སྨོན་ལམ་ཆེན་མོར་གདན་ས་གསུམ་དུ་གྲྭ་སྐོར་མཛད་དེ་ལྷ་རམས་ཨང་དང་པོའི་མཚན་སྙན་བཞེས། ཞོར་དུ་གསར་བུ་བ་མང་པོར་དཔེ་ཁྲིད་ཀྱི་མཛད་ཁུར་བཞེས།
༧གོང་ས་མཆོག་གི་བཀའ་དགོངས་ལྟར་ལྕང་སྐྱ་མཆོག་སྤྲུལ་རིན་པོ་ཆེའི་ཡོངས་འཛིན་གནང་། ཌེ་ར་ཌུན་བཀྲིས་འཁྱིལ་དགོན་པར་ཆོས་སྲིད་གཉིས་ཀར་བདག་སྐྱོང་བཀྲིན་ཆེ་བར་གནང་། ཕྱི་ལོ་ ༡༩༩༧ ལོར་དགེ་བཤེས་ལྷ་རམས་པའི་མཚན་གནས་བཞེས་ཟིན་རྗེས་དཔལ་ལྡན་སྨད་རྒྱུད་གྲྭ་ཚང་དུ་ཞོག་དང་པོའི་ཆོས་ཐོག་སྐབས་རྒྱུད་ལ་ཞུགས། དམ་ཆོས་འ༷གྲེལ་པ་བཞི་སྦྲགས་ཀྱི་གཙོས་འཆད་ཉན་དང་ཚོགས་ཆོས་སོགས་ལོ་འཁོར་གཅིག་གི་མཛད་སྒོ་མཐའ་དག་ཆད་ལུས་མེད་པར་འབད་པ་ཆེན་པོ་མཛད། ཁྱད་པར་ཚོགས་ལ་བཞུགས་སྟངས་ཚུན་རྒྱུད་པ་ཚོའི་དད་མོས་ཀྱི་ཡུལ་དུ་གྱུར་། སྐྱེས་མཆོག་འདི་ཕྱག་བཟོ་ལའང་མཁས་པས་གང་གི་ཕྱག་བསྟར་མས་བཞེངས་པའི་སྒྲོལ་དཀར་ཡིད་བཞིན་འཁོར་ལོའི་ཞལ་ཐང་ཞིག་༧གོང་ས་མཆོག་ལ་ཕུལ་སྐད། ཕྱི་ལོ་ ༡༩༩༨ ལོར་སྔགས་ཀྱི་རྩོད་རྒྱུགས་བཞེས་པའི་སྐབས་གནས་རིམ་དང་པོའི་གྲས་སུ་སོན། གཞན་ཡང་ཁུ་ནུ་དགེ་བཤེས་རྒན་རིག་འཛིན་བསྟན་པ་སོགས་དགེ་བའི་བཤེས་གཉེན་དུ་མ་ལས་སྔ་ཕྱིར་མདོ་སྔགས་ཀྱི་ཟབ་ཆོས་མང་དུ་གསན།
ཕྱི་ལོ་ ༢༠༠༦ ལོའི་ཞོག་དང་པོ་ནས་ཟླ་བ་དྲུག་གི་རིང་སྨད་རྒྱུད་གྲྭ་ཚང་གི་དགེ་སྐོས་དང་ཊཱིཀྐ་སྐྱོར་དཔོན་གནང་སྟེ་སྒྲིག་ལམ་གནོན་སྡོམ་སོགས་འཐུས་ཤོར་མེད་པར་གནང་། ལོ་དེའི་མཇུག་ཏུ་དམ་པ་འདི་ཉིད་ལ་༧གོང་ས་མཆོག་ནས་དཔལ་ལྡན་སྨད་རྒྱུད་པའི་བླ་མ་དབུ་མཛད་དུ་བསྐོ་བཞག་གི་ཕྱག་རྟགས་རིན་པོ་ཆེ་སྤྱི་ཕེབས། བླ་མ་དབུ་མཛད་ཀྱི་ཐུགས་འགན་ལོ་གཉིས་བཞེས་རིང་གྲྭ་ཚང་རིན་པོ་ཆེའི་ཆོས་སྲིད་གཉིས་ཀྱི་མཛད་འགན་ཐུགས་ཁུར་ཆེ་བསྐྱེད་མཛད། ཕྱི་ལོ་ ༢༠༠༨ ལོར་དཔལ་སྨད་རྒྱུད་པའི་མཁན་ཁྲིར་ཕེབས་ཏེ་ཁྲི་སྟོན་གྱི་སརྒ་མ་འཆོལ་བར་མཛད། གྲྭ་ཚང་འདུས་ཚོགས་སུ་བསྙེན་བཀུར་གཟབ་རྒྱས་དང་མཆོག་གསུམ་རྒྱལ་བ་རྒྱ་མཚོར་མཆོད་སྤྲིན་རྒྱ་ཆེར་སྤྲོས་ཤིང་། གྲྭ་ཚང་སྤྱི་སོར་ཐེབས་རྩ་་འཇོག་གནང་མཛད།
དོན་གྱི་གཙོ་བོ་དམ་ཆོས་འགྲེལ་པ་བཞི་སྦྲགས་དང་། བདེ་གསང་འཇིགས་གསུམ་གྱི་བསྐྱེད་རྫོགས་སོགས་ཐུགས་ཐོག་ནས་དང་དཔེ་ཐོག་ནས་གནང་དགོས་པའི་འཆད་ཉན་རྣམས་ཆད་ལུས་མེད་པར་ལོ་གསུམ་དུས་ཡུན་གཙང་བར་མཛད་དེ་གསང་ཆེན་བསྟན་པའི་མཛེས་རྒྱན་དུ་བཞེངས། དེ་ནས་རང་གི་གདན་ས་འབྲས་སྒོ་མང་གྲྭ་ཚང་དང་རང་གི་བདག་ཏུ་གྱུར་པའི་དགོན་སྡེ་བཀྲིས་འཁྱིལ་གཉིས་སུ་གསར་བུ་རྣམས་ལ་དཔེ་ཁྲིད་མང་དུ་གནང་། གཞན་ཡང་ཕྱི་ནང་གི་གདུལ་བྱ་དོན་གཉེར་ཅན་མང་པོར་གང་ལ་གང་གདུལ་གྱི་དམ་པའི་ཆོས་ཀྱི་བྱ་བ་རྒྱ་ཆེར་མཛད་དོ།།
བློ་གྲོས་མཁྱེན་བཟང་འདབ་སྟོང་རྣམ་པར་བཀྲ། །ལེགས་གསུང་ཤིས་པའི་ཟིལ་མངར་འགྱེད་པའི་ཚེ། །
རིང་ནས་འབྲེལ་བའི་སྐལ་བཟང་ཡིད་དགས་འཇོ། །མཚུངས་མེད་རིག་འཛིན་ཆེན་པོར་གསོལ་བ་འདེབས། །
དེའི་རྗེས་སུ་སེར་བྱེས་དགེ་བཤེས་བཀྲ་ཤིས་ཚེ་རིང་མཆོག་སྨད་རྒྱུད་པའི་མཁན་ཁྲིར་ཕེབས་པ་ཡིན་ཏེ། མཁན་ཆེན་འདི་ཕྱི་ལོ་ ༡༩༣༧ ལོར་ཡབ་སྒྲོལ་མ་ཚེ་རིང་དང་ཡུམ་རིན་ཆེན་ཆོས་སྒྲོན་ཟུང་གི་སྲས་སུ་ཁམས་ཏྲེ་ཧོར་དཀར་མཛེས་རྒྱལ་བཟང་ནང་སྐུ་འཁྲུངས། དགུང་ལོ་བདུན་ནས་རབ་ཏུ་བྱུང་སྟེ་ཏྲེ་ཧོར་ཁང་དམར་དགོན་པར་ཆོས་སྒོར་ཞུགས་ཏེ་དགོན་པའི་ཆོས་སྤྱོད་སོགས་བློ་འཛིན་གནང་། ལོ་དེར་དབུས་སུ་བྱོན་ནས་སེར་བྱེས་མཁས་སྙན་གྲྭ་ཚང་དུ་ཞུགས། བསྡུས་གྲྭ་ནས་གཞུང་ཆེན་ཕར་ཕྱིན་བཅས་ལ་སློབ་གཉེར་གནང་སྟེ་རིགས་ཆུང་ཚོགས་ལངས་སྦྱོར་ལམ་ཕྱི་རྒོལ་གྱི་གཟེངས་བསྟོད་ཐོབ།
ཕྱི་ལོ་ ༡༩༥༩ ལོར་བོད་དུས་འགྱུར་སྐབས་སྤྱི་མཚུངས་རྒྱ་གར་དུ་བཙན་བྱོལ་དུ་ཕེབས་ནས་ཐོག་མར་[མེ་ས་མ་རི་]དང་དེ་ནས་[སྦག་སར]་ཕེབས་ཏེ་དཀའ་ཚེགས་ཆེ་ཡང་སློབ་གཉེར་མུ་མཐུད་གནང་སྟེ་དེ་དག་ཏུ་ལོ་བཅུ་སྐོར་སོང་། དེ་ནས་ཕྱི་ལོ་ ༡༩༧༠ ལོར་རྒྱ་གར་ལྷོ་ཕྱོགས་སྦེལ་ཀོབ་ཏུ་ཕེབས་ཏེ་སློབ་གཉེར་རྣམས་མུ་མཐུད་གནང་བཞིན་ཞོར་དུ་གྲྭ་རྒྱུན་གསར་ཞུགས་རྣམས་ལ་དཔེ་ཁྲིད་ཀྱང་གནང་། རང་ཉིད་འཛིན་གྲྭ་རིམ་ཐོན་ཐོག་དགེ་ལུགས་རྒྱུགས་སྤྲོད་ལ་ཞུགས་ཏེ་བཀའ་རམས་དང་སློབ་དཔོན་ལྷ་རམས་བཅས་ཀྱི་རྒྱུགས་སྤྲོད་རྣམས་ལེགས་པར་ཕུལ་ཏེ་ཕྱི་ལོ་ ༡༩༨༣ ལོར་གདན་གསུམ་སྨོན་ལམ་གྲྭ་སྐོར་དམ་བཅའ་བཞག་སྟེ་དགེ་བཤེས་ལྷ་རམས་ཨང་རིམ་དང་པོའི་གྲས་ཀྱི་མཚན་གནས་བཞེས། བར་བར་དུ་༧གོང་ས་སྐྱབས་མགོན་ཡབ་སྲས་གསུམ་གྱི་དྲུང་ནས་དབང་ལུང་མན་ངག་དང་ཁྲིད་རྒྱུན་མང་དུ་ཞུས་།
ཕྱི་ལོ་ ༡༩༨༤ ལོར་དཔལ་ལྡན་སྨད་རྒྱུད་གྲྭ་ཚང་དུ་རྒྱུད་ལ་ཞུགས་ནས་ལོ་གཅིག་རིང་གསང་ཆེན་རྡོ་རྗེ་ཐེག་པའི་གཞུང་ལ་ཐོས་བསམ་སློབ་གཉེར་དང་ཚོོགས་ཆོས་འགྲིམ་རྒྱུ་ཚུལ་མཐུན་གནང་ཞིང་ཞོར་དུ་རྒྱུད་པ་གསར་བུ་རྣམས་ལ་དཔེ་ཁྲིད་ཀྱང་གནང་། རྒྱུད་པར་ལོ་གཅིག་ཆོས་ཐོག་འཁོར་ནས་རང་གི་གདན་སར་ཕེབས་ཏེ་གྲྭ་རྒྱུན་གསར་ཞུགས་རྣམས་ལ་གཞུང་ཆེན་དཔེ་ཁྲིད་སོགས་བསྟན་པའི་བྱ་བ་མཛད། ཕྱི་ལོ་ ༡༩༨༨ ལོར་རྒྱུད་པར་ཊཱིཀྐ་སྐྱོར་རྒྱུ་དང་སྔགས་ཀྱི་དམ་འཇོག་དགེ་སྐོས་བཅས་ལེགས་པར་ གནང་། ཕྱི་ལོ་ ༡༩༩༠ ལོར་༧གོང་ས་སྐྱབས་མགོན་ཆེན་པོ་དབུ་བཞུགས་ཐོག་དམིགས་བསལ་སྔགས་ཀྱི་རྩོད་རྒྱུགས་བཞེས་སྐབས་ཨང་རིམ་དང་པོའི་གྲས་སུ་སོན།
ལོ་དེར་༧གོང་ས་ཆེན་པོ་དང་བླ་མ་བཟོད་པ་རིན་པོ་ཆེའི་བཀའ་དགོངས་ལྟར་ཕྱི་རྒྱལ་[ཨོའོསི་ཊི་ལི་ཡ་]རུ་བྱོན་ཏེ་དེར་ཡོད་སྤྱན་རས་གཟིགས་ཀྱི་ཆོས་ཚོགས་གཙོས་ཉེ་འཁྲིས་ཆོས་ཚོགས་དང་རྒྱལ་ཁབ་འགའ་ཞིག་ཏུ་ཕེབས་ཏེ་ནང་ཆོས་དོན་གཉེར་ཅན་རྣམས་ལ་བློ་སྦྱོང་སྐོར་དང་གྲུབ་དོན་ས་གསུམ། རྒྱན་འཇུག་གཉིས་སོགས་གང་ལ་དེ་འོས་ཀྱི་དམ་པའི་ཆོས་ཀྱིས་དེ་དག་གི་རེ་བ་སྐོང་བར་མཛད། ཁྱད་པར་ཁུལ་དེར་རེ་འདུན་ཅན་འགའ་ཞིག་ལ་རབ་བྱུང་དང་དགེ་བསྙེན་གྱི་སྡོམ་པ་ཡང་གནང་། སྐབས་དེ་དག་ཏུ་བོད་ལྗོངས་ཕ་ཡུལ་དཀར་མཛེས་སུ་ཐེངས་གསུམ་ཙམ་བྱོན་ཏེ་ཁུལ་དེའི་སེར་སྐྱ་དོན་གཉེར་ཅན་དུ་མར་ལམ་རིམ་བཀའ་ཁྲིད་སོགས་དམ་པའི་ཆོས་ཀྱིས་ཚིམ་པར་གནང་།
ཕྱི་རྒྱལ་དང་བོད་དུ་ཕེབས་པ་བཅས་ལ་ལོ་ངོ་བཅོ་བརྒྱད་རིང་བསྟན་འགྲོར་སྨན་པའི་བྱ་བས་དུས་འདའ་བར་མཛད། ཕྱི་ལོ་ ༢༠༠༩ ༧གོང་ས་མཆོག་ནས་དཔལ་ལྡན་སྨད་རྒྱུད་པའི་བླ་མ་དབུ་མཛད་དུ་བསྐོ་བཞག་གི་ཕྱག་རྟགས་རིན་པོ་ཆེ་སྤྱི་ཕེབས་བྱུང་། རྒྱུད་པའི་གསུང་སྲོལ་ལྟར་བླ་མ་ཆོས་སྲིད་གཉིས་ཀྱི་དབུ་ཁྲིད་ཅེས་པ་ལྟར་དུ་བླ་མ་ལོོ་གསུམ་རིང་གྲྭ་ཚང་གི་ཚོགས་ཆོས་སློབ་གཉེར་སྒྲིག་ལམ་ཀུན་སྤྱོད་སོགས་གང་ཅིའི་ཐད་ནས་གཟིགས་སྐྱོང་གི་ཐུགས་འགན་ཆེ་བསྐྱེད་མཛད། ཕྱི་ལོ་ ༢༠༡༢ ལོར་དཔལ་ལྡན་སྨད་རྒྱུད་པའི་མཁན་ཁྲིར་ཕེབས་ཏེ་ལོ་གསུམ་དུས་ཡུན་གཙང་བར་བཞུགས་ཏེ་མཛད་པའི་གཙོ་བོ་འཆད་ཉན་ནི། ཐུགས་ཐོག་ནས་གསང་བདེ་འཇིགས་གསུམ་གྱི་བསྐྱེད་རིམ་དང་། ཊཱིཀྐ་ལེའུ་དང་པོ་དང་གཉིས་པ་ནས་བརྒྱད་པའི་མཚམས་སྦྱར་བར། རིམ་ལྔའི་དམར་ཁྲིད། སོ་ཐར་གྱི་མདོ་རྒྱས་པ་སོགས་ཤོག་གྲངས་གསུམ་བརྒྱ་བརྒལ་བ་ཐུགས་ལ་བཟུང་ནས་གསུང་དགོས་པ་དེ་ལྟར་དུ་གནང་། དཔེ་ཐོག་ནས་དམ་ཆོས་འགྲེལ་པ་བཞི་སྦྲགས་དང་། གསང་འདུས་བསྐྱེད་རིམ་དངོས་གྲུབ་རྒྱ་མཚོ་དང་རྫོགས་རིམ་རིམ་ལྔ་གསལ་སྒྲོན། བདེ་མཆོག་སྦས་དོན་ཀུན་གསལ། ཁྲིད་ཆེན་བརྒྱད་བཅས་ཚིག་འབྲུ་གཅིག་ཀྱང་མ་ལུས་པར་འཆད་ཉན་མཛད་དེ་གསང་ཆེན་བསྟན་པའི་གསོས་སྨན་དམ་པར་གྱུར་ཅིང་། ཟུར་ནས་རང་གི་གདན་ས་དང་ཕྱི་ནང་གི་སྐྱེ་བོ་དུ་མར་དམ་པའི་ཆོས་ཀྱི་དགའ་སྟོན་སྩོལ་བཞིན་བསྟན་འགྲོའི་བྱ་བ་མཛད་དོ།།