གསང་ཆེན་དཔལ་ལྡན་སྨད་རྒྱུད་གྲྭ་ཚང་དུ་གདན་ས་ཁག་ནས་སྔགས་ཀྱི་སློབ་གཉེར་ལ་ཆེད་དུ་ཕེབས་པའི་ལྷ་ཚོགས་དགེ་བཤེས་ལོ་གཅིག་གི་ཆོས་ཐོག་འཁོར་བཞིན་པ་རྣམས་ལ་ལོ་འཁོར་སྔགས་ཀྱི་རྩོད་རྒྱུགས་དང་སྔགས་ཀྱི་བྲིས་རྒྱུགས་བླངས།
གསང་ཆེན་རྡོ་རྗེ་ཐེག་པའི་བཤད་སྒྲུབ་ཀྱི་བསྟི་གནས་དཔལ་ལྡན་སྨད་རྒྱུད་གྲྭ་ཚང་དུ་སྤྱི་ལོ་ ༢༠༢༢ ལོའི་ཟླ་ ༡༡ ཚེས་ ༧ ནས ༨ སྟེ་ཉིན་གཉིས་རིང་རིམ་གཉིས་སློབ་གཉེར་ལ་ཕེབས་མཁན་གདན་ས་ཁག་ནས་དགེ་བཤེས་ལྷ་ཚོགས་རྣམས་ནས་ལོ་གཅིག་རིང་གསང་སྔགས་སློབ་གཉེར་ཉམས་བཞེས་མཐར་ཕྱིན་མཛད་པའི་འབྲས་རྟགས་སྔགས་ཀྱི་རྩོད་རྒྱུགས་གནང་ཞིང་རྩོད་རྒྱུགས་གསན་གཟིགས་རྩོད་དཔང་དུ་གདན་གསུམ་གྲྭ་ཚང་དྲུག་གི་མཁན་པོ་མཁན་ཚབ་དང་རྒྱུགས་བཞེས་གྲྭ་ཚང་འདི་ཉིད་ཀྱི་མཁན་བླ་ལས་སྣེ་དང་བཅས་པ་གདན་འཛོམས་གནང་ཡོད།
དེ་བཞིན་སྤྱི་ཟླ་ ༡༡ ཚེས་ ༩ ཉིན་དཔལ་ལྡན་སྨད་རྒྱུད་གྲྭ་ཚང་དུ་གདན་ས་ཁག་ནས་སྔགས་ཀྱི་སློབ་གཉེར་ལ་ཆེད་དུ་ཕེབས་པའི་ལྷ་ཚོགས་དགེ་བཤེས་རྣམས་ནས་གསང་ཆེན་རྒྱུད་སྡེ་བཞི་ལ་ཐོས་བསམ་ཉམས་བཞེས་ཀྱི་ཐུགས་བརྩོན་ལྷོད་མེད་མཛད་དེ་ལོ་འཁོར་སྔགས་ཀྱི་རྩོད་རྒྱུགས་གྲུབ་ནས་བྲིས་རྒྱུགས་བླངས་ཡོད་འདུག །
གསང་ཆེན་དཔལ་ལྡན་སྨད་རྒྱུད་གྲྭ་ཚང་འདི་ཉིད་དུ། འཇུག་པ་པོ་རྟེན་གྱི་གང་ཟག་དེ་ལ་དགེ་བཤེས་དང༌། བསྐྱེད་རིམ་པ་གཉིས་སུ་འདུས་པ་ལས། དགེ་བཤེས་ནི། གདན་ས་གསུམ་སོགས་སུ་མདོ་ཕྱོགས་ཀྱི་གཞུང་ཆེན་བཀའ་པོད་ལྔ་ལ་སློབ་གཉེར་མཐར་ཕྱིན་ཏེ་དགེ་བཤེས་ཀྱི་མཚན་རྟགས་བཞེས་རྗེས། དཔལ་སྡན་རྒྱུད་གྲྭ་སྨད་སྟོད་གཉིས་གང་རུང་དུ་སྔགས་ཕྱོགས་ཀྱི་སློབ་གཉེར་གནང་ཆེད་འཛུལ་ཞུགས་གནང་དགོས་པ་དང་། རྒྱུད་ལ་ཞུགས་ཏེ་ལོ་གཅིག་རིང། མཁན་ཆེན་རྡོ་རྗེ་འཆང་གི་དྲུང་ནས། དམ་ཆོས་འགྲེལ་པ་བཞི་སྦྲགས་དང། བསྐྱེད་རྫོགས་སོགས་སྔགས་ཕྱོགས་ཀྱི་གཞུང་ཆེན་ཁག་གི་བཤད་ཁྲིད་གསན་བཞེས་གནང་དགོས་པ་དང། ལྷག་པར་དགེ་བཤེས་ལྷ་རམས་པ་ཡིན་ཚེ། རྗེ་བཙུན་ཤེས་རབ་སེང་གེའི་གསང་འདུས་རྩ་རྒྱུད་ཀྱི་ཊཱིཀྐ་ལེའུ་དང་པོའམ། ཡང་ན་གཉིས་པ་ནས་བརྒྱད་པའི་བར་ཐུགས་ལ་བཟུང་ནས་ཚོགས་དབུས་སུ་བརྩི་བཞག་སྐྱོར་དགོས་པ་དང༌། དེ་ལ་དགེ་བཤེས་ཊཱིཀྐ་སྐྱོར་དཔོན་ཞེས་ཟེར་ཞིང་། དེར་མ་ཟད་སྔགས་ཀྱི་ས་ལམ་ཀྱི་རྣམ་གཞག་སོགས་རྒྱུད་སྡེ་བཞིའི་སྐོར། རྒྱུད་བཞུགས་དགེ་བཤེས་མཁས་པའི་དྲུང་ནས་ཟུར་དུ་དཔེ་ཁྲིད་ཞུས་ཤིང་། དགོང་དྲོ་ཆོས་རར་རྩོད་པ་དང་། ཆོ་ག་ཕྱག་ལེན་ཐིག་རྡུལ་ཚོན་སོགས་ཀྱང་སྦྱངས་ཏེ་ལས་བཞིའི་ཐིག་སོགས་ཀྱི་རྒྱུགས་སྤྲོད་ཀྱང་གནང་དགོས་ལ། གཞན་ཡང་ལོ་གཅིག་རིང་གྲྭ་ཚང་གི་གཏོར་ཆེན་དང་བདག་འཇུག་སོགས་ཆོ་ག་གཏོང་དགོས་པ་ཆེས་མང་དུ་ཡོད་པ་རྣམས་ལ་ཆད་ལུས་མེད་པར་ཚོགས་ཕེབས་གནང་དགོས། སྔགས་ལ་བསན་བསམ་སློབ་གཉེར་གནང་བ་ཙམ་མ་ཟད། སྔགས་ཀྱི་རྩོད་རྒྱུགས་ཆེན་མོ་འབུལ་བཞེས་གནང་དགོས་པ་དང་། ལོ་གཅིག་རིང་གསང་སྔགས་ལ་གསན་བསམ་སློབ་གཉེར་ཟིན་པའི་མཚོན་རྟགས་སུ་གྲྭ་ཚང་ནས་སྔགས་ཀྱི་ཕྱག་ཁྱེར་ཡང་གནང་བ་ཡིན། དེ་ནས་རང་གི་གདན་སར་ཕྱིར་ཕེབས་ཏེ། མདོ་སྔགས་གཉིས་ཀ་ཐོན་པའི་དགེ་བའི་བཤེས་གཉེན་དུ་གྱུར་པའོ། །
