གངས་ཅན་རིག་གནས་སློབ་གྲྭ།

སྤྱི་ནོར་༧གོང་ས་༧རྒྱལ་བའི་དབང་པོ་མཆོག་འདི་ག་གསང་ཆེན་སྨད་རྒྱུད་གྲྭ་ཚང་དུ་ཆིབས་ཞབས་བསྒྱུར་ཏེ་རྒྱུད་སྨད་སློབ་གཉེར་ཁང་ལ་རབ་གནས་བྱིན་འབེབས་ཀྱི་སྐབས་སུ། རྒྱུད་སྨད་གངས་ཅན་རིག་གནས་སློབ་གྲྭ་དང་འབྲེལ་བའི་བཀའ་སློབ་གནང་བ་སྙིང་བསྡུས་སུ་བཀོད་པ་ནི། གྲྭ་ཚང་སློབ་གཉེར་ཁང་ [ རྒྱུད་སྨད་སློབ་གྲྭ། ] གི་གནས་སྟངས་ཡག་པོ་འདུག །སྦྱིན་བདག་ཚོ་ལའང་ཐུགས་རྗེ་ཆེ་ཞུ།

རྩ་བའི་སློབ་གཉེར་ཁང་ཆེན་པོ་ཞིག་ཆགས་ཡོད་པ་རེད། གཞི་རྒྱ་ཆེན་པོ་ཆགས་ཡོད་པ་དེ་རྒྱུད་སྨད་གྲྭ་པ་ཁོ་ནའི་ཆེད་དུ་མ་ཡིན་པར། ད་དུང་དེ་ལས་གཞི་རྒྱ་ཆེ་རུ་བཏང་ནས།རབ་བྱུང་ཙམ་མ་ཡིན་པར་ཕྱི་རྒྱལ་དང་བོད་རིགས་སུ་ཡང་མི་རིགས་དང་ཕོ་མོ་སོགས་ཀྱི་དབྱེ་བ་མེད་པར་ནང་ཆོས་ལ་དོན་གཉེར་ཅན་སུས་ཀྱང་སློབ་སྦྱོང་བྱེད་སའི་བསྟི་གནས་སློབ་གྲྭ་ཞིག་གསར་དུ་འཛུགས་ཐུབ་ན་ཡག་པོ་ཡོང་བ་འདུས་གནང་ཞིང་། སློབ་གྲྭའི་བྱེད་སྒོ་ཁག་དབུ་འཛུགས་གནང་སྟེ། ནང་ཆོས་ངོ་སྤྲོད་ཐོག་མ་དེ་སྦེལ་ཀོབ་བོད་ཁྱིམ་ནས་སློབ་ཕྲུག་ལྔ་བཅུ་ཙམ་ཞིག་སློབ་གྲྭར་བསུ་ལེན་གྱིས་ནང་ཆོས་ངོ་སྤྲོད་གནང་ཡོད།

༢༠༡༠ ལོའི་སྤྱི་ཟླ་ ༥ པ་ནས་སློབ་སྤྱི་བློ་བཟང་དམ་ཆོས་སྐབས་དངོས་སུ་འཛིན་གྲྭ་ཚོགས་ཐོག་འཛིན་སྐྱོང་ཚགས་ཚུད་དང་། ས་གནས་ནང་ཆོས་ངོ་སྤྲོད་ཚོགས་ཆུང་དང་འབྲེལ་ལམ་ཐོག་དུས་ནས་དུས་སུ་མི་མང་བསྡུ་སྐོང་གིས་ནང་ཆོས་ངོ་སྤྲོད་ཀྱི་འཛིན་གྲྭ་འཚོགས་བཞིན་ཡོད་ལ། དེ་ཡང་སྤྱི་ལོ་ ༢༠༡༡ ནས་བཟུང་རེས་གཟའ་ལྷག་པ་འཆར་ཅན་ལ་འབྲེལ་ཡོད་ཧུན་སུར་རབ་རྒྱས་གླིང་མི་མང་སུ་ཕེབས་ལ་ནང་ཆོས་འཛིན་གྲྭ་འཚོགས་བཞིན་ཡོད།

སྤྱི་ལོ་ ༢༠༡༡ ལོར་ ༧ གོང་ས་སྐྱབས་མགོན་ཆེན་པོ་མཆོག་འདི་ག་གྲྭ་ཚང་དུ་ཆིབས་བསྒྱུར་གནང་སྟེ། རིམ་ལྔའི་བཀའ་ཁྲིད་གནང་སྐབས་དང་བསྟུན། སྤྱི་ཟླ་ ༡༢ ཚེས་ ༧ ཉིན་ ༧ གོང་ས་མཆོག་གིས་གངས་ཅན་རིག་གནས་སློབ་གྲྭ་འདི་ཉིད་ལ་རབ་གནས་བྱིན་འབེབས་དང་། དབུ་འབྱེད་བཀའ་དྲིན་བསྐྱངས་ཤིང་། སློབ་གྲྭ་འདིར་ཐོག་མའི་དམིགས་ཡུལ་ལྟར་བོད་ཀྱི་ཆོས་དང་རིག་གཞུང་སྐད་ཡིག་དང་བཅས་པས་དོན་གཉེར་ཅན་རྣམས་ཀྱི་འདོད་དོན་སྐོང་ཐུབ་པ་དགོས་རྒྱུ་དང། ཚན་རིག་དང་ནང་ཆོས་ཀྱི་འབྲེལ་ལམ་སོགས་བཀའ་སློབ་ཕྱག་ཚོད་ཕྱེད་ཙམ་གནང་སྟེ། སློབ་གྲྭ་དངོས་སུ་གྲུབ་པར་བརྟེེན་ཐུགས་དགྱེས་མཉེས་ཆེན་པོ་བྱུང་ཡོད་ལ། སྐབས་དེར་སློབ་གྲྭའི་ལས་བསྡོམས་ཤིག་ཀྱང་ལྷ་སྙན་སྒྲོན་འབུལ་ཞུས་ཡོད།

གཞུང་འབྲེལ་ཟླ་དྲུག་ཟབ་ཁྲིད་འཚོགས་བཞིན་པའི་སྐབས་ཆོས་རིག་ལས་ཁུངས་ཀྱི་བཀའ་འབྲེལ་འོག་ཆོས་བརྒྱུད་རིས་མེད་ཀྱི་མཁས་པ་གདན་ཞུས་ཀྱིས་ནང་དོན་རིག་པའི་སྐབས་བབ་བརྗོད་གཞི་འདྲ་མིན་ཐོག་གསུང་བཤད་གོ་སྒྲིག་ཞུ་བཞིན་ཡོད་ཅིང།དབུས་བོད་མིའི་སྒྲིག་འཛུགས་ཆོས་རིག་ལས་ཁུངས་དང་རྒྱུད་སྨད་གངས་ཅན་རིག་གནས་སློབ་གྲྭ་ཟུང་འབྲེལ་གྱིས་གོ་སྒྲིག་ཞུས་ཏེ། སྤྱི་ལོ་ ༢༠༡༤ ནས་ལོ་རེར་གཞུང་འབྲེལ་ཟླ་དྲུག་ཟབ་སྦྱོང་འཚོགས་བཞིན་ཡོད་ལ། ད་ལྟའི་ [ ༢༠༢༣ ] བར་དུ་ཟླ་དྲུག་ཟབ་སྦྱོར་ཐེངས་བཅུ་དང་མཐོ་རིམ་སློབ་མ་བརྒྱ་ཕྲག་བརྒལ་བར་ཟབ་སྦྱོང་སྤྲད་ཡོད་པ་དང་། སློབ་ཚན་ལ་ཆོས་བརྒྱུད་བྱེ་བྲག་པའི་གཞུང་གང་ཡང་མེད་པར་རྒྱ་གཞུང་རང་གི་སྟེང་ནས་སློབ་ཁྲིད་དང་། ཞལ་འདོན་ལྟ་བུ་ལའང་རྒྱ་གར་མཁས་པའི་རྩ་བ་རང་བཀོད་སྒྲིག་བྱས་ཡོད།

སྤྱི་ལོ་༢༠༡༠ལོར་སློབ་གྲྭ་དབུ་བརྙེས་པའི་ལོ་ནས་བཟུང་བོད་ཁྱིམ་ཡིག་ཚང་ཁག་དང་འབྲེལ་ལམ་དང་ཕྱར་གྲུ་མཉམ་འདེགས་ཀྱིས། བོད་ཁྱིམ་དགུན་ཁའི་གུང་སེང་དང་བསྟུན་ཟླ་བ་གཅིག་རིང་གངས་ཅན་རིག་གནས་སློབ་གྲྭར་སློབ་ཕྲུག་བསུ་ལེན་གྱིས། སློབ་ཚན་དང་དགེ་རྒན། བཞུགས་གནས་དང་ཞལ་ལག་ཡིག་ཆས་སོགས་གོ་སྒྲིག་དང་། དབྱར་ཁར་སམ་བྷོ་ཊ་གུང་སེང་དང་བསྟུན་འབྲེལ་ཡོད་གཞིས་འགོ་མཆོག་དང་དགེ་རྒན་ཕ་མའི་ལྷན་ཚོགས་དང་འབྲེལ་ལམ་ཞུས་ཤིང་། དེ་དག་དང་མཉམ་རུབ་ཐོག་ཟླ་བ་གཅིག་རིང་སློབ་ཕྲུག་རྣམས་གངས་ཅན་རིག་གནས་སློབ་གྲྭར་བསུ་ལེན་བྱས་ཏེ། བོད་ཀྱི་སྐད་ཡིག་དང། རིགས་ལམ། ནང་ཆོས་བཅས་ཀྱི་འཛིན་གྲྭ་འཚོགས་བཞིན་ཡོད་ལ། ད་ལྟའི་ [ ༢༠༢༣ ] བར་དུ་དབྱར་ཚོགས་ཟླ་གཅིག་ཟབ་སྦྱོང་ཐེངས་བཅུ་གཅིག་དང་། སློབ་ཕྲུག་བརྒྱ་ཕྲག་བརྒལ་བར་ཟབ་སྦྱོང་སྤྲད་ཡོད་པ་དང་། ཕྱི་རྒྱལ་བ་དོན་གཉེར་ཅན་རྣམས་ལ་ཁོང་ཚོའི་རེ་འདོད་དང་དུས་ཚོད་ལ་དཔགས་པའི་སློབ་ཚན་འཆར་འགོད་དང་གོ་སྒྲིག་བྱས་ཏེ། ལོ་ཁ་ཤས་དང། ཟླ་བ་ཁ་ཤས། ཡང་ན་བདུན་ཕྲག་གཅིག་ཙམ་ལ་སློབ་སྦྱོང་བྱེད་འདོད་ཡོད་པ་དག་ལ་བོད་ཀྱི་སྐད་ཡིག་དང་ནང་ཆོས་ཀྱི་སློབ་སྦྱོང་སྤྲོད་མུས་དང་། གཞན་སློབ་གྲྭ་གཞན་དང་འབྲེལ་ལམ་གནང་སྟེ་ཤེས་ཡོན་ཡར་རྒྱས་དང་ཉམས་མྱོང་བརྗེ་རེས་གནང་བ་དང་། རང་གཞུང་ཤེས་རིག་སོགས་དང་མཉམ་འབྲེལ་གྱིས་དགེ་རྒན་ཟབ་སྦྱོང་དང་། དམིགས་བསལ་སློབ་ཕྲུག་ལ་རིགས་ལམ་སོགས་སློབ་ཁྲིད་གནང་མུས་སུ་ཡོད་དོ། །

༢༠༢༣ ལོའི་འཛིན་གྲྭ་སློབ་ཚན་དང་ཚོགས་དུས་ཀྱི་རེའུ་མིག །[ དཔེ་མཚོན་ཙམ་དུ་བཀོད་པ། ]

ཕྱག་ལེན་རྒན་རྣམས་ནས་དགོང་དྲོའི་སྐྱོར་སྦྱང་དང་། མཚན་ཉིད་དཔེ་ཁྲིད་རྒན་རྣམས་ནས་དགོང་དྲོའི་རྩོད་པ་བཅས་ལ་གཟིགས་རྟོགས་གནང་རྒྱུ།