མདོ་སྡེ་བསྐལ་བཟང་ལས། ང་ནི་སྔོན་ཚེ་དམན་པར་གྱུར་པ་ན། །དེ་བཞིན་གཤེགས་པ་ཤཱཀྱ་ཐུབ་པ་ལ། །འཇམ་གང་ཞིག་ནི་དབུལ་བ་བྱས་ནས་ཀྱང༌། །དང་པོར་བྱང་ཆུབ་ཏུ་ནི་སེམས་བསྐྱེད་དོ། །ཞེས་གསུངས་པ་དང་། དེ་ཡང་སྔོན་བསྐལ་པ་ཆེན་པོ་འཛིན་མ་ཞེས་བྱ་བའི་སྐབས་འཁོར་ལོས་བསྒྱུར་པའི་རྒྱལ་པོ་རྩིབས་ཀྱི་མུ་ཁྱུད་ཅེས་བྱ་བ་ཞིག་འཇིག་རྟེན་དུ་བྱུང་ཞིང་། དེའི་བློན་པོའི་གཙོ་བོ་བྲམ་ཟེ་རྒྱ་མཚོའི་རྡུལ་གྱི་སྲས་བྲམ་ཟེ་རྒྱ་མཚོའི་སྙིང་པོ་སངས་རྒྱས་པའི་མཚན་ལ་དེ་བཞིན་གཤེགས་པ་རིན་ཆེན་སྙིང་པོ་ཞེས་བརྗོད། རྒྱལ་པོ་བློན་པོ་སྲས་དང་བཅས་པས་སངས་རྒྱས་རིན་ཆེན་སྙིང་པོ་ལ་བསྙེན་བཀུར་བྱས་ཤིང།
རྒྱལ་པོ་དང་སྲས་བློན་པོ་སོགས་སངས་རྒྱས་བྱང་སེམས་ཉན་རང་སོགས་སུ་འགྱུར་བར་ལུང་བསྟན་པ་དང་། དེ་ནས་བྲམ་ཟེ་རྒྱ་མཚོའི་རྡུལ་གྱིས་དེ་བཞིན་གཤེགས་པ་རིན་ཆེན་སྙིང་པོའི་དྲུང་དུ་པུས་མོ་གཡས་པའི་སླ་ང་ས་ལ་བཙུགས་ཏེ་འདི་སྐད་ཅེས་གསོལ་ཏོ། །
བདག་གིས་སྲོག་ཆགས་བྱེ་བ་མང་པོ་ལ་བྱང་ཆུབ་འཛིན་དུ་བཅུག་པ་དེ་དག་གིས། སྙིགས་མ་ལྔ་བདོ་བའི་དུས་ཀྱི་སེམས་ཅན་སྐྱབས་མེད་པ་དཔུང་གཉེན་མེད་པ། དེ་དག་སྤངས་ནས་རང་རང་གི་སངས་རྒྱས་ཀྱི་ཞིང་བཟང་པོ་དང༌། སེམས་ཅན་འདུལ་སླ་བ་དག་ཡོངས་སུ་བཟུང་ན། སེམས་ཅན་དེ་དག་ལ་སྙིང་རྗེ་བས་བདག་གི་སྙིང་ཤིང་ཀང་བུ་ཤའི་འདབ་མ་བཞིན་དུ་འདར་ཞིང་ལུས་ཤ་ཐང་བར་གྱུར་ན། བདག་མ་འོངས་པའི་དུས་སུ་བསྐལ་བ་གྲངས་མེད་པར་དེ་དག་གི་དོན་དུ་བྱང་ཆུབ་ཀྱི་སྤྱོད་པས་མི་སྐྱོ་བར་གྱུར་ཅིག །དེ་བཞིན་དུ་སྦྱིན་པ་དང༌། ཚུལ་ཁྲིམས་དང༌། བཟོད་པ་དང༌། བརྩོན་འགྲུས་དང༌། བསམ་གཏན་དང༌། ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྔོན་སུས་ཀྱང་བསླབ་མ་མྱོང་བ་དེལྟ་བུ་སློབ་པར་གྱུར་ཅིག །སེམས་ཅན་རེ་རེའི་དོན་དུའང་བསྐལ་པ་ཆེན་པོ་བཅུར་མནར་མེད་པའི་དམྱལ་བར་གནས་ཀྱང་མི་སྐྱོ་བར་གྱུར་ཅིག །སྐྱེ་རྒུ་ཚེ་ལོ་བརྒྱ་ཉི་ཤུ་ཐུབ་པ་དྲུག་གསུམ་ཤིན་ཏུ་བདོ་བ་ཕ་ལ་ཕར་མི་འཛིན་མ་ལ་མར་མི་འཛིན་སྡིག་པའི་ལས་ལ་དགའ་བ་ལ་སོགས་པས་ངན་འགྲོར་འགྲོ་དགོས་པའི་སེམས་ཅན་དག་འབྱུང་བར་འགྱུར་ལ། དེའི་དབང་གིས་མུ་གེ་དང༌། འཁྲུགས་པ་དང༌། ནད་ཡམས་ལ་སོགས་པ་མི་བཟང་བ་མང་པོ་འབྱུང་བའི་དུས་དེར། བདག་དགའ་ལྡན་ནས་བབས་ཏེ་མའི་མངལ་དུ་འཇུག་པར་གྱུར་ཅིག །ཅེས་སོགས་མཛད་པ་བཅུ་གཉིས་པོ་རེ་རེ་ལའང་སྨོན་ལམ་ཚད་མེད་པ་བཏབ་ཅིང་ཁྱད་པར་དུ་སེམས་ཅན་སེམས་འཁྲུལ་བ་ཉོན་མོངས་པས་དཀྲུགས་པ་རྣམས་དང༌། བུད་མེད་རྣམས་ཀྱང་བདག་གི་བསྟན་པ་ལ་རབ་ཏུ་བྱུང་བར་གྱུར་ཅིག །བདག་མྱ་ངན་ལས་འདས་ནས་ཀྱང་དམ་པའི་ཆོས་ལོ་སྟོང་དུ་གནས་པར་གྱུར་ཅིག །ལོ་ལྔ་བརྒྱར་དམ་པའི་ཆོས་ཀྱི་གཟུགས་བརྙན་གནས་པར་གྱུར་ཅིག །བདག་གི་སྐུ་གདུང་རྣམས་ལ་མཆོད་པ་དང༌། ཐ་ན་སངས་རྒྱས་ཀྱི་མཚན་གཅིག་དང༌། བསྐོར་བ་གཅིག་བྱེད་པ་དང༌། བསླབ་པའི་གཞི་གཅིག་ཙམ་འཛིན་པ་དང༌། ཚིགས་བཅད་གཅིག་ཙམ་ཀློག་པ་ཡན་ཆད་ཐེག་པ་གསུམ་པོ་དག་ལས་སླར་མི་ལྡོག་པར་གྱུར་ཅིག །བདག་གིས་བསྐལ་བ་དུ་མར་ཚོགས་བསགས་པ་དེའི་མཐུས་སེམས་ཅན་གང་དག་དམྱལ་བ་ཆེན་པོར་སྡུག་བསྔལ་མི་བཟད་པ་མྱོང་བ་དེ་དག་གི་དོན་དུ་བདག་དམྱལ་བ་ཆེན་པོར་སྐྱེས་ནས་བདག་གི་ལུས་རྡུལ་ཕྲ་རབ་ཀྱི་གྲངས་སྙེད་དུ་གྱུར་ཅིག །ལུས་རེ་རེ་ཡང་རི་རབ་ཙམ་དུ་གྱུར་ཅིག །དེ་རེ་རེས་ཀྱང་སྡུག་བསྔལ་དྲག་ཅིང་རྩུབ་པ་མི་བཟད་པ་བསྐལ་བ་ཞིང་གི་རྡུལ་སྙེད་དུ་གྱུར་ཅིག །དེ་བཞིན་དུ་དུད་འགྲོ་དང༌། ཡི་དྭགས་དང༌། ལྷ་མ་ཡིན་དང༌། མིའི་ནང་ནའང་འོན་པ་དང༌། ལོང་བ་དང༌། ལྕེ་མེད་པ་ལ་སོགས་པ་རྣམས་ཀྱི་དོན་དུ་བདག་དམྱལ་བར་སྐྱེས་པར་གྱུར་ཅིག །ཅེས་བྱ་བ་ལ་སོགས་པ་སྨོན་ལམ་ཆེན་པོ་ལྔ་བརྒྱ་བཏབ་པས། འཁོར་དེར་ཡོད་པའི་ལྷ་དང་མི་ལ་སོགས་པ་རྣམས་ཀྱི་མིག་ནས་མཆི་མ་འཛག་ཅིང་ཡན་ལག་ལྔས་ཕྱག་འཚལ་ཏེ། སྙིང་རྗེ་ཆེན་པོ་དང་ལྡན་པ་ཁྱོད་ནི། ལེགས་སོ། །ལེགས་སོ། །ཞེས་པ་བསྔགས་པ་བརྗོད་དོ། །ཕྱོགས་བཅུའི་ཞིང་ཁམས་ནས་སངས་རྒྱས་བཅོམ་ལྡན་འདས་རྣམས་ཀྱིས་མེ་ཏོག་གི་སྐྱེས་བསྐུར་ཞིང༌། ཞིང་རེ་རེ་ནས་བྱང་ཆུབ་སེམས་དཔའ་དཔག་ཏུ་མེད་པ་བྱོན་ནས་ཕྱག་བྱས་ཤིང་བསྔགས་པ་བརྗོད་དོ། །
དེ་ནས་དེ་བཞིན་གཤེགས་པར་རིན་ཆེན་སྙིང་པོས་བཀའ་སྩལ་པ། རིགས་ཀྱི་བུ། བྱང་ཆུབ་སེམས་དཔའ་གཞན་ནི་མེ་ཏོག་ལྟ་བུའོ། །ཁྱོད་ནི་པདྨ་དཀར་པོ་ལྟ་བུའོ། །སྙིང་རྗེ་ཆེན་པོ་དང་ལྡན་པ་ཁྱོད་ནི། །སྐྱེས་རྒུ་ཚེ་ལོ་བརྒྱ་ཐུབ་པའི་དུས་སུ་སེམས་ཅན་མ་རུང་བ་མི་དགེ་བཅུ་ཚང་བར་སྤྱོད་པ། མཚམས་མེད་པ་ལྔ་བྱེད་པ། ཤིན་ཏུ་འདུལ་དཀའ་བའི་སེམས་ཅན་མ་རུང་བས་གང་བ། ཞིང་མ་དག་པ་མི་མཇེད་འཇིག་རྟེན་གྱི་ཁམས་སུ་བསྐལ་བ་བཟང་པོའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ། །ལོ་བཞི་བཅུ་རྩ་ལྔར་སངས་རྒྱས་ཀྱི་མཛད་པ་བྱེད་དོ། །ཞེས་ལུང་བསྟན་ཏོ། །
དེ་ནས་སླར་ཡང་བྱང་ཆུབ་སེམས་དཔའ་ཆེན་པོ་དེས་འདི་སྐད་ཅེས་གསོལ་ཏོ། །བདག་བྱང་ཆུབ་ཀྱི་སྤྱད་པ་སྤྱོད་པ་ན། སེམས་ཅན་གང་དག་ཕ་རོལ་ཏུ་ཕྱིན་པ་དྲུག་ལ་བཀོད་པ་དང༌། ཐ་ན་དགེ་བའི་རྩ་བ་སྐྲའི་རྩེ་མོ་ཙམ་ལ་བཀོད་པའི་སེམས་ཅན་གཅིག་ཙམ་ཞིག་ཐེག་པ་གསུམ་པོ་དག་གིས་ཕྱིར་མི་ལྡོག་པ་ལ་མ་བཀོད་ན་བདག་གིས་ཕྱོགས་བཅུའི་སངས་རྒྱས་ཐམས་ཅད་བསླུས་པར་གྱུར་ཅིག །བདག་འཚང་རྒྱ་བར་མ་གྱུར་ཅིག །བདག་གི་བསྟན་པ་ལ་གོས་ངུར་སྨྲིག་བགོས་ནས་རྩ་བའི་ལྟུང་བ་བྱུང་བ། སྤྱོད་པ་ངན་པ་ལ་ཞུགས་པ་དང༌། བདག་ལ་སྟོན་པའི་འདུ་ཤེས་གཅིག་ཙམ་བསྐྱེད་པ་དེ་དག་ཀྱང་ཐེག་པ་གསུམ་ལ་མ་བཀོད་ན་བདག་འཚང་རྒྱ་བར་མ་གྱུར་ཅིག །ཆོས་གོས་ངུར་སྨྲིག་ལྷ་དང་བཅས་པས་མཆོད་པར་འོས་པ་སོར་བཞི་བ་ཙམ་འཆང་བ་དེ་དག་ཀྱང་དབུལ་འཕོང་དང་ནད་ཡམས་དང་དམག་འཁྲུག་ལ་སོགས་པས་གནོད་པ་མེད་པར་གྱུར་ཅིག །ཅེས་སོགས་སྙིང་རྗེ་པདྨ་དཀར་པོའི་མདོ་ལས་གསུངས་སོ། །
སྙིང་རྗེ་ཆེན་པོ་པདྨ་དཀར་པོ་ལས། ཀུན་དགའ་བོ། བྱང་ཆུབ་སེམས་དཔའི་སྤྱད་པ་སྤྱོད་པ་ན། ཅི་ཙམ་དཀའ་བ་སྤྱད་པ་དེ་དག་ཐམས་ཅད་ཁྱོད་ཀྱི་དོན་དུ་སྤྱད་དོ། །ངས་རྒྱལ་སྲིད་དང༌། སྡུག་པ་དག་ཀྱང་ཡོངས་སུ་བཏང་ཞིང༌། བུ་ཕོ་དང༌། བུ་མོ་དང༌། ཆུང་མ་དང༌། བདག་གི་སྲོག་དང༌། ཤ་དང༌། ཁྲག་དང༌། རུས་པ་དང༌། རྐང་དང༌། རྣ་བ་དང༌། སྣ་དང༌། ལག་པ་དང༌། རྐང་པ་དང༌། མགོ་དག་ཀྱང་ཡོངས་སུ་བཏང་བ་དང༌། སྡུག་བསྔལ་དུ་མ་མྱོང་བ་དེ་དག་ཐམས་ཅད་ཀྱང་ཁྱོད་ཀྱི་ཕྱིར་རོ། །ཀུན་དགའ་བོ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་དོན་དུ་གཉེར་བ་ན། གང་བྱ་དཀའ་བ་དག་ཡོངས་སུ་བཏང་བར་བྱས་པ་དང༌། སེམས་ཅན་རྣམས་ཀྱི་དོན་དུ་ངས་སྡུག་བསྔལ་གང་དག་མྱོང་བ་དེ་དག་ཐམས་ཅད། ཀུན་དགའ་བོ། གལ་ཏེ་བརྗོད་ན་བདེན་པར་ཡིད་ཆེས་པར་མི་འགྱུར་ན་ཚིག་ཏུ་སྨྲ་བ་ལྟ་ཅི་སྨོས། ཀུན་དགའ་བོ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་དེས། སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན། ཁྱོད་ཀྱི་དོན་དུ་སྡུག་བསྔལ་མི་བཟད་པ་རྩུབ་ཅིང་དྲག་པའི་ཚོར་བ་འདི་ལྟ་བུ་དག་མྱོང་ངོ་ཞེས་དེ་སྐད་བཤད་ན། དེ་བཞིན་གཤེགས་པ་དེས་བདག་ཅག་གི་དོན་དུ་དཀའ་བ་སྤྱད་དོ། །ཞེས་གལ་ཏེ་བྱིས་པ་སོ་སོའི་སྐྱེ་བོ་དག་ཚིག་བཞི་པ་གཅིག་གིས་སྙིང་རྗེ་བསྐྱེད་ན། ཀུན་དགའ་བོ། སེམས་བསྐྱེད་པ་དེའི་འབྲས་བུ་ཡང་མྱ་ངན་ལས་འདས་པ་ཡིན་ཏེ། ཐ་མ་མྱ་ངན་ལས་འདས་པའི་བར་དུ་འགྱུར་བར་ང་སྨྲ་ན། ཀུན་དགའ་བོ། ང་ལ་དགེ་བའི་རྩ་བ་བསྐྱེད་པ་ལྟ་ཅི་སྨོས། ཞེས་གསུངས་སོ། །
ཐུགས་རྣམ་པ་ཐམས་ཅད་མཁྱེན་པའི་ཡེ་ཤེས་ཆོས་ཀྱི་དབྱིངས་ལ་རྟག་ཏུ་མཉམ་པར་བཞག་པ་ལས་གཡོ་བ་མེད་བཞིན་དུ་མཛད་ཆེན་བཅུ་གཉིས་སོགས་སྐུའི་བཀོད་པ་དཔག་ཏུ་མེད་པས་འགྲོ་བའི་དོན་མཛད་པའི་ཚུལ་ནི། དེ་ཡང་སངས་རྒྱས་རྣམས་ཀྱི་དེ་ཁོ་ན་ཉིད་ནི་ཆོས་ཉིད་དུ་བལྟ་བར་བྱ་བ་དང༌། འདྲེན་པ་སངས་རྒྱས་རྣམས་ཀྱི་ཆོས་ཀྱི་དབྱིངས་དེ་ཉིད་ནི་ཆོས་ཀྱི་སྐུའོ། །ཆོས་ཉིད་ཀྱི་སྐུ་དེ་ནི། བདེན་འཛིན་གྱིས་བཅིང་པའི་བློས་ཤེས་པར་བྱ་བ་མ་ཡིན་ཏེ། དེ་ནི་བློ་དེས་རྣམ་པར་ཤེས་མི་ནུས་པར་གསུངས་སོ། །
དེས་ན་ཆོས་ཀྱི་སྐུ་དེ་ལས་གཡོ་བ་མེད་བཞིན་དུ་སྐྱེ་བ་མངོན་པར་སྐྱེ་བའི་ཚུལ་ནི། སྔོན་སྐྱེ་དགུ་རྣམས་ཀྱི་ཚེ་ལོ་ཉི་ཁྲི་ཐུབ་པའི་དུས་ན། བཅོམ་ལྡན་འདས་འོད་སྲུངས་འཇིག་རྟེན་དུ་བྱོན་ནོ། །དེའི་དུས་སུ་སྟོན་པ་ཐུགས་རྗེ་ཆེན་པོ་དང་ལྡན་པ་འདི་ཉིད་བྲམ་ཟེ་ཁྱེའུ་བླ་མ་ཞེས་བྱ་བར་གྱུར། དེ་ནས་འཕོས་པའི་ཚུལ་བསྟན་ཏེ་དགའ་ལྡན་གྱི་ལྷ་རྣམས་ཀྱི་སྟོན་པ་བྱང་ཆུབ་སེམས་དཔའ་དམ་པ་ཏོག་དཀར་པོ་ཞེས་བྱ་བར་གྱུར་ཏོ། །དེར་སྐྱེ་བ་གཅིག་གིས་ཐོགས་པའི་བྱང་ཆུབ་སེམས་དཔའི་ཚུལ་བཟུང་ནས། དགའ་ལྡན་གྱི་ལྷ་རྣམས་གཙོ་བྱས་པའི་ལྷ་ལ་སོགས་པའི་འགྲོ་བ་རྣམས་སྨིན་པའི་ཕྱིར་ཆོས་སྟོན་པར་མཛད་དོ། །
དུས་དེར་འཛམ་བུའི་གླིང་དུ། ཆུ་ཀླུང་སྐལ་ལྡན་ཤིང་རྟ་ཞེས་བྱ་བ་ཆུ་བོ་གངྒཱའི་འགྲམ། གྲོང་ཁྱེར་ཆེན་པོ་སེར་སྐྱ་གཞི་ཞེས་བྱ་བར་འཁོར་ལོས་བསྒྱུར་པའི་རྒྱལ་པོའི་རྒྱུད་ལས་བྱུང་བ་ཤཱཀྱའི་རིགས་རྒྱལ་པོ་སེངྒེ་འགྲམ་ཞེས་བྱ་བས་རྒྱལ་སྲིད་བྱེད་དོ། །རྒྱལ་པོ་དེ་ལ་སྲས་བཞི་སྟེ། ཟས་གཙང་དང༌། ཟས་དཀར་དང༌། བྲེ་བོ་ཟས་དང༌། བདུད་རྩི་ཟས་སོ། །སྲས་མོ་ཡང་བཞི་སྟེ། གཙང་མ་དང༌། དཀར་མོ་དང༌། བྲོ་བོ་མོ་དང༌། བདུད་རྩི་མོའོ། །ཤཱཀྱའི་གྲོང་ཁྱེར་ལྷས་བསྟན་ཞེས་པ་ན་ཤཱཀྱ་ལེགས་པར་རབ་སད་ཅེས་བྱ་བས་རྒྱལ་སྲིད་སྐྱོང་བ་ལས། རྒྱལ་པོ་དེ་གཉིས་ཀར་ཡང་རྒྱལ་སྲིད་བདེ་ཞིང་ཕུན་སུམ་ཚོགས་པ་ཆོས་དང་ལྡན་པས་རྒྱལ་སྲིད་སྐྱོང་ངོ༌། །སེང་གེ་འགྲམ་ནི་བདག་གི་རྒྱུད་ལ་འཁོར་ལོས་བསྒྱུར་བའི་རྒྱལ་པོ་བྱུང་ཡང་ཅི་མ་རུང་ཞེས་སྨོན་པར་བྱེད་དོ། །རྒྱལ་པོ་ལེགས་པར་རབ་སད་ཀྱང༌། སེངྒེ་འགྲམ་དང་གཉེན་དུ་འགྱུར་བར་སྨོན་ནོ། །ལེགས་པར་རབ་སད་ལ་བུ་མོ་མཆོག་ཏུ་གྱུར་པ་ཞིག་བཙས་པ་ན། སྐྱེ་བོ་ཐམས་ཅད་ཀྱིས་འདི་ནི་མིའི་བུ་མོ་མ་ལགས་ཏེ། ལས་ཐམས་ཅད་ཀྱིས་སྤྲུལ་བའི་སྒྱུ་འཕྲུལ་ལོ་ཞེས་ཟེར་པས། དེའི་མིང་སྒྱུ་འཕྲུལ་མར་བཏགས་ཤིང༌། དེ་ནས་ཡང་ཕྱིས་ཤིག་ན་ལེགས་པར་རབ་སད་ཀྱི་བཙུན་མོ་ལ་བུ་མོ་སྔ་མ་ལས་ཀྱང་ཆེས་ལྷག་པའི་བུ་མོ་ཞིག་བཙས་པར་གྱུར་ཏེ། དེའི་མིང་ལྷ་མོ་སྒྱུ་འཕྲུལ་ཆེན་མོ་ཞེས་བཏགས་ཤིང༌། མཚན་མཁན་རྣམས་ཀྱི་ལུང་བསྟན་པ། འདི་ལས་ནི་སྲས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་དང་ལྡན་པ་འཁྲུངས་པར་འགྱུར་ཞིང༌། དེ་ནི་འཁོར་ལོས་བསྒྱུར་བའི་རྒྱལ་པོར་འགྱུར་རོ་ཞེས་ཟེར་རོ། །
དེ་ནས་ཕྱི་ཞིག་ན་ལེགས་པར་རབ་སད་ཀྱིས། རྒྱལ་པོ་སེང་གེ་འགྲམ་ལ་འཕྲིན་དུ་སྤྲིངས་ཏེ། བདག་ལ་མཆོག་ཏུ་གྱུར་པའི་བུ་མོ་གཉིས་ཤིག་མཆིས་པ་ལས། གང་བཞེད་པ་ཞིག་གཞོན་ནུ་ཟས་གཙང་གི་བཙུན་མོར་བཞེས་ཤིག །སེངྒེ་འགྲམ་གྱིས་སླར་སྤྲིངས་པ། བུ་མོ་གཉིས་ཀ་ཡང་གཞོན་ནུ་ཟས་གཙང་ལ་དགོས་པ་ཞིག་ཡོད་མོད་ཀྱི། རེ་ཞིག་ཆུང་བ་བླང་སྟེ་ཅིག་ཤོས་ཀྱང་བརྟག་པར་བྱའོ་ཞེས་སྤྲིངས་ནས་ལྷ་མོ་སྒྱུ་འཕྲུལ་ཆེན་མོ་གཞོན་ནུ་ཟས་གཙང་མའི་བཙུན་མོར་བླངས་སོ། །
དེ་ནས་དུས་གཞན་ཞིག་ན། ཤཱཀྱ་བ་རྣམས་ཀྱི་དགྲ་སྐྱ་སེང་ཞེས་བྱ་བའི་རྒྱལ་རིགས་རི་ཁྲོད་པ་དག་ཡོད་དེ། དེ་རྣམས་འདུལ་བར་གཞོན་ནུ་ཟས་གཙང་མངགས་ཤིང༌། དེ་ནས་དེས་སྐྱ་སེང་གི་ཚོགས་རྣམས་ལེགས་པར་ཐུལ་ཏེ་འཁོར་བ་ན། ཤཱཀྱ་རྣམས་ནི་རིགས་མཉམ་པ་ལས་ཆུན་མ་བཞག་པར་མི་བྱ་བའི་ཁྲིམས་དང་ལྡན་པ་ཡིན་པས། ཤཱཀྱའི་ཚོགས་རྣམས་ཀྱི་གནང་བ་བྱིན་ནས། སྒྱུ་འཕྲུལ་མ་འཁོར་ལྔ་བརྒྱ་དང་བཅས་པ། དཔལ་དང་འབྱོར་བ་ཆེན་པོས་གཞོན་ནུ་ཟས་གཙང་གི་བཙུན་མོར་བླངས་སོ། །
ཕྱི་ཞིག་ན་རྒྱལ་པོ་སེང་གེ་འགྲམ་འདས་ཏེ། སྲས་ཀྱི་ཐུ་བོ་རྒྱལ་པོ་ཟས་གཙང་མ་རྒྱལ་སྲིད་དབང་ཕྱུག་ལ་ལོངས་སྤྱོད་ཅིང༌། དེའི་མངའ་འབངས་རྣམས་ཀྱང་མཆོག་ཏུ་འབྱོར་ཞིང་བདེ་བ་རྒྱལ་པོ་སྔ་མ་ལས་ཀྱང་ལྷག་པ་ཙམ་དུ་གྱུར་ཏོ། །
